کانونی دووەم 19, 2021

"رۆڵە گیان، ژن خۆی بەهێزە"

نەسرین حەسەن 

 

نەنكم، بە نەخوێندەواری خۆی كەسایەتییەكی بەهێزی لە ناو گوند هەبوو، وێرای كاری" مامانی"،بە گژوگیای كوردەواری زۆربەی نەخۆشی چارەسەر دەكرد، بە دەست و پەنجە رەنگینكەشی دیزە و گۆزەی دروست دەكرد، چەندین ئیشی تر

كە زۆر جیگەی سەنجی خەڵك بوو، جارێكیان لێم پرسی،كە چۆن ئەو هەموو ئیشە فێر بووە، ئەویش بە زەردەخەنەیەكی جوان و كاریگەر وەڵامی دامەوە و گوتی:"رۆڵە گیان، ژن خۆی بەهێزه"

"مری ئان ویلیامسون" نووسەر و مامۆستای زانكۆ دەڵی: "هەندێ‌ جار كاتێك باس لە هێز دەكرێت، شتێك لەو كاتەدا كە بیری لێدەكەینەوە، مرۆڤێكە هێزی زۆری هەیە، یان خاوەن سامانێكی زۆرە، بەرای من ئافرەتی گەورە و بەهێز ئەو كەسە نییە پارەیەكی زۆری هەبێت، بەلكو ئافرەتی گەورە كەسێكی بڕوا بەخۆبوون و نەترسە كە بە تواناكانی رێگای ژیان بۆ خۆی دەدۆزێتەوە، هەندێ‌ كەس پێیان وایە ئافرەت بۆ سەركەوتن پێویستی بە پیاوێك هەیە هەست بەو جیاوازییانە بكات كە لە كۆمەڵگەدا هەیە، پیاوێك خۆی بە گەورەتر لە ئەو نەزانێت و وەكو خۆی سەیری بكات، بەڵام ئەو بیرو باوەرە لەوانەیە بۆ كاتی ئێستا زۆر گونجاو نەبێت، چونكە ئێستا ئافرەت هەوڵ دەدات پشت بە توانا و لێهاتوویێ‌ خۆی ببەستێت و و لە ژیانیدا سەركەوتوو بێت، بە مەرجێك باوەڕی بە خۆی هەبێت، پیاو لەو قۆناغەدا پێویستە لە بواری مەعنەوی پاڵپشتی ئافرەت بێت بۆ ئەوەی خۆی و تواناكانی بناسێت وهەستی بڕوا بە خۆبوونی بەهێز بكات". ئەوەی ئەمڕۆ ئافرەت ئەنجامی دەدات، ململانێیە لەگەڵ باروودۆخەكانی ژیان و یەكەم هەنگاویش بەهێزكردنی هێزی شاراوەی دەروونی و رێكخستننەوەی ئەو هێزانەیە بۆ دۆزینەوەی رێگە چارەی گونجاو بۆ دروستكردنی هاوسەنگی لە نێوان رۆڵی ئافرەت لە ماڵەوە و كاری دەرەوە، هەرچەندە لەوانەیە ئەستەمیش بێت، چونكە ئافرەت ناچارە لە نێوان پێداویستییە سەرتاییەكانی خۆی و داخوازییەكانی ئەو كەسانەی بۆی گرنگن هاوسەنگی دروست بكات، ئەمەش بە واتای بەهێزی ئافرەتە.

"سیمین دانشور "شاعیری ئێرانی دەڵی: "بەراستی ئافرەتبوون ئەركێكی قورسە، ناچاری وەك كابانێك هەڵسوكەوت بكەی، وەكو پیاوێك كار بكەی، وەكو كچێكی گەنج دەربكەوی و وكو بەساڵاچوویەك بیر بكەیەوه."هەر لە سەر ئەم وتەیە بیری قسەكەی نەنكم كەوتمەوە كە دەیگوت :"رۆڵە گیان، ژن خۆی بەهێزه."

 

© 2017 Hawler