کانونی یەکەم 03, 2020

مەشخەڵ كەوڵۆسی

 

سەرۆكی ناوەندی چاوی كورد
بەدرێژایی مێژووی ململانێی عەرەب ئیسرائیل، هیچ كاتێك ئیسرائیل هێندەی ئیستا لەڕووی دیپلۆماتی و ماركێتینەوە بەهێزنەبووە. تەواوی سەرۆكەكانی ئەمریكا لەسەر بنەمای پابەندبونیان بە ئۆقرەیی و مانەوەو بەهێزتركردنی ئیسرائیل هەڵدەبژێردرێن. بەڵام هیچكام لەو سەرۆكانەش وەكو "ترامپ" ڕاشكاوانەو بوێرانە هەنگاویان نەناوە، ئەو توانی بەوەتیرەیەكی بەهێز و گوڕەوە ڕاستی پشتیوانی خۆی بۆ ئیسرائیل لەهەستیارترین جومگەوە پیشان بدات، كەبریتی بوو لەگواستنەوەی باڵیۆزخانەی وڵاتەكەی لە "تەلئەبیب"ەوە بۆ "ئۆرشەلیم" یان قودس.
لەئیستادا و لەدوای هاتنە پێشەوەی " ڕێككەوتنی سەدە" وڵاتانی عەرەبی ڕیزیان بەستوە بۆ ئاشتەوایی و ڕێككەوتن لەگەڵ ئیسرائیلدا، لەدوای ئیمارات شانشینی بەحرەینیش هاتە پێشەوە، كە هەردوو وڵاتەكە پێكەوە لەكۆشكی سپی ئاشتبوونەوەیان لەگەڵ ئیسرائیل ڕاگەیاند، بەگوتەی وەزیری دەرەوەی بەحرەین" عەبدول لەتیف زەیانی" ڕێككەوتنەكە سەدان پرۆژەی ئابوری زەبەلاح و كرانەوە بەڕووی یەكتردا دێنێتە كایەوە.
لەهەموو ئەوانەش گرنگتر، زۆرێك لەچاودێران و ناوەندەكانی بڕیار پێیان وایە ڕێككەوتن و ئاشتەوایی ئیمارات و بەحرەین لەبنەڕەتدا بۆ ڕێگە خۆشكردن و زەمینەسازیكردنە بۆ ڕووداوە گەورەكە كەبریتییە لە ئاشتەوایی نێوان "سعودیە و ئیسرائیل" ئەگەر ئەم چاوەڕوانییە لەجێگەی خۆیدا بێت كەواتە ئیمە دەكەوینە بەردەم جەمسەرگیرییەكی زۆر قوڵ لەناوچەكەدا.
جەمسەرگیری ئەمجارە پێكهاتەیەكە لە:ئابوری، ئایدۆلۆژیای نوێ، دیدێكی تازە بۆ ڕیفۆرمی ئاینی چونكە لەئیستاوە پیاوانی ئاینی سعودیە و بەشێك لەنوسەرە سعودییەكان دەستیان كردۆتە ڕێگە خۆشكردن و دۆزینەوەی پاساوی لۆژیكی و ئاینی بۆ ئەوەی "محەمەد بن سەلمان" بتوانێت ئەركی سەرشانی لە ئاشتكردنەوەی سعودیە لەگەڵ ئیسرائیل ڕاپەڕێنێت.
جەمسەرگیری هەردوو بەری كەنداو، وڵاتانی عەرەبی لەلایەك، كۆماری ئیسلامی ئێرانیش لەلایەكی ترەوە، لەهەمبەر قۆناغی نوێی ناوچەكەدا، دابەشبونێكی قوڵ لەسیاسەت و بەرژەوەندی ناوچەكەدا دروست دەكات.
پێم وایە پێویستە كورد لەم ئاڵوگۆڕە زۆر بەئاگابێت و زۆر بەوردی پۆینتەكانی ناو هاوكێشەكە بخوێنێتەوە. دەڵێم بیخوێنێتەوە نەك مامەڵەی نوێ بكات چونكە بەبڕوای من ئەم ئاڵوگۆڕە دەوڵەتەكان دەگرێتەوەو هێز و كارەكتەرەكانی خوار دەوڵەت پێویست ناكات لەڕووە سیاسییەكەیەوە زۆر شۆك ببن یان چاوەروانی ئاڵوگۆڕی دراماتیكی و ڕاستەوخۆ بكەن.
هێزەكانی خوار دەوڵەت، وەك كورد بۆ نمونە چونكە ڕاستەوخۆ یاریكەری نێودەوڵەتی نیە، دەكرێ لەڕووی ماركێتینەوە دەستوپەنجە لەگەڵ كایەی نوێی ناوچەكەدا نەرم بكات.
بەمانایەكی تر: كورد پێویستە لەئیستاوە سەیری ئەو پاساوانە بكات، سەیری ئەوچارەدۆزییە فیكری و پڕوپاگەندەییانە بكات كە هێزە عەرەبییەكان بۆ ئاشتەوایی لەگەڵ ئیسرائیل دەیانهێننەوەو دەیانەوێت لەڕێگەی ئەو پاساوانەوە قەناعەت بە شەقام و ڕای گشتی گەلەكانیان بهێنن بەوەی كارێكی باشیان كردووە.
چونكە لەدێر زەمانەوە هەر خودی عەرەب، چ وەك شەقام چ وەك دەوڵەت و ناوەندە سیاسیی و بڕیاردەر و میدیاكانیان كورد بە هەبوونی پەیوەندی لەگەل ئیسرائیل تۆمەتبار دەكەن. ئیستا بەئاشكرا و بێ هیچ پەردەیەك ڕیزیان بەستوە بۆ ئاشتەوایی لەگەل ئەو دەوڵەتەدا.
عەرەبەكان هەموو پاساوە سیاسی و مێژووی و ئەخلاقییەكانیان بۆ تۆمەتباركردنی كورد و گەلانی تری غەیرە كورد لەدەستدا، ئەوان لەكاتێكدا خۆیان پەیوەندی دەبەستن بەچ پاساوێك دەیانەوێت كورد لە مەلیك مەلەكی تربێت و ئەو شەڕە بۆ ئەوان بكات. لەكاتێكدا ئەوە ئیسرائیل نیە كە خاك و ئایندەی كوردی داگیركردووە.
دەبێ ئەو ڕاستییە بكرێتە مادەی ئیعلامی كاریگەر و وتوێژی چر دروست بكات لەگەڵ ئەوانەی هەبوونی پەیوەندی لەگەل ئیسرائیلیان كردبووە گەورەترین چەك بۆ لێدان لە بزوتنەوەی ڕزگاریخوازی كوردستان. ئەوەتا دەمامكیان كەوت و دەركەوت خۆیان بە هەرچوار پەلەوە لەو مەیدانەدان. لەكاتێكدا هیچ پێویست نیە كورد ئەو شەڕە بۆ ئەوان بكات، چونكە عەرەب دەیانەوێت خاكیشمان داگیربكەن و ئیمەش لەبری ئەوان شەڕی فەلەستین بۆ ئەوان بكەین!. هیچ پێویست ناكات كورد خۆی لەو مەیدانەدا ببینێتەوە.

© 2017 Hawler