ئەم پەڕەیە چاپ بکە

ئەگەر "پیاو" بوومایە

قژێكی كورت، كراس و پانتۆڵێكی كوڕانە، زۆریش شانازیم بە خۆمەوە دەكرد كە بە كوڕان دەچم، تەنانەت حەزم دەكرد وەكو ئەوانیش هەڵسووكەوت بكەم، نەك وەكو كچێك، هەر ئەوەندە دەزانم حەزم دەكرد كوڕ بوومایە، لە بەر ئەوەی تایبەتمەندی جیاوازیان هەبوو .
"ئوریانا فالاچی" نووسەر و رۆژنامەنووسی ئیتالی لەكتێبی "رەگەزی لاواز" دەڵێ‌: هەموو كات هەوڵم دەدە تا ئەو جێگایەی دەكرێت لە بارەی رەوشی ئافرەت و ئەو شتانەی پەیوەندی بەوانەوە هەیە هیچ شتێك نەنوسم ، نازانم بۆچی پێی دڵگران دەبووم وبە رای من بابەتەكە وەك گاڵتەیەكە دەچوو، خۆ ئافرەت لە رەچەڵەكی تر نییە یان لە هەسارەیەكی تر نەهاتووە كە لە بارەیانەوە بنوسرێت، ئەویش بە جیا و لە بەشێكی تایبەت لە رۆژنامە ، وەك بەشی وەرزشی، سیاسی ، كەش و هەوا، چونكە ئافرەت و پیاو بۆ ئەوە دروست بوون كە بەیەكەوە بژین ... دواتر تێگەیشتم جیاوازییەك هەیە، ئەگەر كێشەی پیاوان زیاتر كێشەی رەچەڵەك و پارەو وپیشە بێت ، ئەوە كێشەی ئافرەتان یەك بابەتە ، " وەك ئافرەت لە دایك بوون". چەمكی "ئافرەتبوون" لە هەر كۆمەڵگەیەك پەیوەستە بەو بڕوا و نەریتی ئەو كۆمەڵگەیە كە چۆن پێناسەی دەكات ،بۆیە باسكردن لە رەوشی ئافرەت لە هەر جێگەیەك دەرهاویشتەی تێروانینی كولتورە جیاوازەكانە. بەڵام ئەوەی گرنگە ئەوەیە كە كێشەی ئافرەت بابەتێكی جیهانیە، دیاردەی كوشتنی ئافرەت بە بیانوی جیاواز ، خۆسوتاندن، پەلاماردان و ئیهانەكردن دەستدرێژیكردن،بە كەم سەیركردنی وەك كالایەك، كۆمەڵە واتایەكن كە هەنووكە گشتگیرن و پێویستیان بە چارەسەری گونجاوە. لەو سەردەمە، ئافرەتان هەر چەند بەهێز بن، بەڵام لە دونیایەكی جیاواز لە پیاویان دەژین، بۆیە هوشیاری كۆمەڵایەتی، پەروەردەكردنی تاك و پێشكەوتنی وڵات ئەو كاتە مانای دەبێت كە عەقڵیەت و بڕواكان بۆ واتای "یەكبوون" و" دادپەروەری كۆمەڵایەتی" نێوان ئافرەت و پیاو بگۆڕدرێت.
ئەگەر توانیبام جارێكی تر بگەڕێمەوە بۆ كاتی منداڵیم، لە جیاتی كراس و پانتۆلێكی كوڕانە،تەنوورەیەك و كراسێكی گوڵداری كچانەم دەپۆشی و بە قردیلەیەكی پەمەیی قژم دەبەست، چونكە بەراستی تێگەیشتووم"ئافرەتبوون " شانازییەكی پیرۆز و بەرپرسیاریەتییەكی مەزنە". ئافرەتێك دەیگوت: ئەگەر پیاو بوومایە، دەستی ئافرەتێكم دەگرت و پێ‌ بە پێی وەرزەكان پیاسەم لەگەڵیدا دەكرد و بۆم باسی خۆشەویستی و جوانییەكانی ژیان دەكرد، بۆ ئەوەی بێ‌ ترس هەنگاو بۆ ژیان بنێت.