ئەیلول 25, 2020

 

شەهلا گەرمیانى

ڕۆژی نمایشی شانۆ گەریەكە پێكەوە بەڕێكەوتن .. لەڕێگا هەندێك شتی لەسەر شانۆ بۆ باسكرد بۆ ئەوەی پێش وەخت ئاشنایەكی هەبێت وپەلكێشی بكات بۆ نێو دونیای هونەر.. بەڵام ئەو ناو بەناو هەر سەری بۆ ڕادەوەشاند! دواجار گەشتنە بەردەم هۆڵەكە و ڕۆشتنە ژوورەوە ... ژمارەیەكی بەرچاو لە ئامادەبووان هاتبوون .. لێرەو لەوێ‌ چەند كەسێك  بەیەكەوە  گفتوگۆیان دەكرد ، هەندێك بە پێوە و هەندێكیش دانیشتبون لە چاوەڕوانی دەستپێكردن . هاوڕێ  میوانەكەی بەدەم ڕێكردنەوە چاوی دەگێڕا بەناو هۆڵەكەدا! بۆیە پێی وت: ئەوە چیتە هەر سەر دەسووڕێنیت بەملاو ئەولادا ؟ دە وەرە بابڕۆین دانیشین لە جێگایەك  ئەوەندەی  نەماوە دەست پێ‌ بكات . ئەویش سەری هێنایە پیشەوە وبەخێرایی پێی وت : كاكە بوەستە جارێ‌ مەڕۆ پەلەت چیە  تۆ جارێ‌ پێم بڵی .. ئەو پیاوە كێیە ؟ هەست ئەكەم بینیومە شێوەی نامۆ نیە لەبەرچاوم! ئەویش لەجێگاكەی خۆی وەستاو ئاڕاستەی چاوەكانی  كرد لەو جێگایەی كە ئەو سەیری دەكات و دواجار پرسی : كامن پیاو ؟ هاوڕێكەی چاوی لەسەر پیاوەكە ڕاگرتبوو نەوەك لەبەر چاوی ون بێت وپێی وت : ئەها ئەوەی كە وەستاوە لە تەك ئەو چەند گەنجە گفتوگۆ دەكەن لای كورسیەكانی ڕیزی پێشەوە كراسێكی سپی لەبەردایە ڕیشی داناوە پێم وایە لە تەلەفزیۆن بینیومە ، لەچاو پێكەوتن وشتی وا  خێرا وڵامی دایەوە : بەڵی.. بەڵی بینیومە ئەوە نووسەرێكی زۆر بەتوانایە خاوەنی چەندین كتێبی  چیرۆك  وڕۆمانە. ئاخر تۆ ناخوێنیتەوە ئەگینا باشتر دەتناسیەوە .. نەیهێشت هاوڕێكەی هەنگاوێكی تر بڕوات قۆڵی گرت وجارێكی تر بە پەرۆشەوە پرسی : ئەی.. ئەو خانمەی كە لە تەنیشتی ستیجەكە وەستاوە لە گەڵ چەند كەسێكدا ئەها ملپێچێكی شینی لە ملە ئەوە.. ئەو هونەرمەندە نیە كە لە درامای  ڕەمەزانی  ئەمساڵدا  بەشدار بو ؟ هاوڕێكەی  سەیری ئەو  جێگایەشی كردو دیسان وڵامی دایەوە : بە ڵێ‌ ... خۆیەتی . دیارە تۆ هەر بە شێوە دەیانناسیتەوە ؟  ناویشیان  نازانی ! دەی ئێستە زووكە بابڕۆین دانیشین  ئەوكات باشتر بۆخۆت سەرنج بدە وپرسیاریش بكە . هاوڕێ‌ میوانەكەی زەردەخەنەیەكی كردو وبەخێراییی پێی وت : نا نا ... جارێ‌ بوەستە پەلە مەكە .. بابڕۆین وێنەیان لە گەڵ  بگرین تاوەكوو شانۆگەریەكە دەستی پێ‌ نەكردووە . هەلێكی وام بۆ دووبارە نابێتەوە .سوپاس بۆ تۆ كە منت هێنا بۆ ئێرە ..دەی با برۆین .. هاوڕێكەی  هەندێك دەموچاوی دابەیەكدا  پێی وت: وێنەی چی خۆ ئێمە بۆ وێنە گرتن نەهاتوین ؟ تۆ ئارەزووی خۆتە بڕۆ وێنە بگرە  من ئەڕۆم دائەنیشم و جێگاشت بۆ ئەگرم ، زۆرت پێ‌ نەچێت باشە  خێراكە ئەوەندەی نەماوە دەست پێ بكات . هاوڕێكەی بە پەرۆشەوە ڕۆشت و چەند وێنەیەكی سێڵڤی و وێنەی ئاسایی بە موبایلەكەی خۆی گرت لە تەك نووسەرو هونەرمەندەكە پاشان هاتەوە لە تەنیشتی دانیشت...بەڵام هەر سەری دەسوراند بەم لاو ئەولادا وەكو وابێت بە دوای نێچیرێكدا بگەڕێ‌ ! دوای چەند خولەكێك هۆڵەكە تاریك كراو هەموان كەوتنە جموجۆڵ ودانیشتن ... ووردە ووردە ئیدی دەنگ وژاوەژاوی ناو هۆڵەكە كۆتایی هات و ئامەدەبوان بە بێدەنگی چاویان خستە سەر تەختەی شانۆكە ...دواجار نمایش دەستی پێكرد...دوای تێپەڕبونی چەندین خولەك ..سەرنجی دا هاوڕێ میوانەكەی هەر سەرقاڵی موبایلەكەیەتی ئاگای لە نمایشەكە  هەرنیە ! لەپڕ ئامادەبوان دایان لە قاقای پێكەنین ...ئاخر بابەتی شانۆگەریەكە هەندێك تەنز ئامێز بوو.. بەهەلی زانی چرپاندی بە گوێیدا : تۆبۆچی هاتویت كەی ئێستە كاتی موبایلە ؟ ئەویش هەربە چرپەوە وڵامی دایەوە : سەیری وێنەگیراوەكان ئەكەم بزانە جوان دەرچوونە . زانی سوودی نیە پشت گوێی خست و گەڕایەوە بۆلای نمایشەكە كات تێ پەڕی و بەشی یەكەمی شانۆگەریەكە تەواو بوو ... لەگەڵ هەڵكردنی  ڕووناكی هۆڵەكە ئەو كات هاوڕێ كەی  سەری هەڵبڕی  لەخوای ویست جارێكی تر دەستی كردەوە بە چاوگێڕان بەناو هۆڵەكەدا ، لەپڕ خێرا هەستایە سەر پێ‌ و ڕۆشتە ڕیزی پێشەوە لە تەك كەسێكی تردا وێنەیەكی گرت.. سەرنجی دا گۆرانی بێژێكی ناسراو بوو.. سەرێكی باداو هەناسەیەكی هەڵكیشا بۆیە لە داخا كاتێك  گەڕایەوە بۆلای هیچی پێ‌ نەوت !ئەویش بە خۆشحاڵیەوە موبایلەكەی كردەوەو  وێنەكانی پیشانی هاوڕێكەی داو وتی : ئەها سەیركە زۆر گرنگن ئەم وێنانە هەمویان دائەبەزێنم لە فەیس بووك وسناپ و داروبەرد ... جا ئەو كات ببینە دنیایەك لایك وكۆمێنتم بۆ دێت .. سەیرێكی كاتژمێرەكەی دەستی كردو پاشان پێی وت : هاورێ‌ گیان  مۆڵەتم دەدەیت من بڕۆم ؟ ئیتر تاقەتم نەما هەندێك كارم هەیە . بە سەرسورمانەوە وڵامی دایەوە: ڕۆشتنەوەی چی جارێ‌ شانۆگەریەكە ماویەتی . هێشتا یەك بەشی تەواو بووە ... ئێ‌ نابێ‌ هەمووی ببینیت  ئیتر بۆچی هاتوویت ؟ بێ‌ ئەوەی چاوەڕوانی مۆڵەت بێت بەدەم ڕێكخستنی جلەكانیەوە  موبایلەكەی خستەوە گیرفانی و وتی: بەخوا... من لەبەر تۆ هاتم تاقەتی ئەم شانۆگەری و شتانەم هەر نیە ، سبەینێ‌    دەتبینمەوە...هاوڕێكەی بە زەردە خەنەیە كی گاڵتە جاڕی وسەرسوڕمانەوە سەیرێكی كرد وپێی وت : بڕۆ... بۆ ناڕۆی بۆچی تۆ چی  تێگەیشتیت لە ناوەڕۆكی  شانۆگەریەكە تاوەكوو چاوەڕوانی  كۆتایەكەی  بیت ؟  كە وێنە لە تەك هونەرمەندا ئەگریت وبڵاوی ئەكەیتەوە ئەی چی ئەزانیت لەسەر هونەرەكەی ؟ تۆ وێنە لەگەڵ نووسەر دەگریت  بەڵام یەك كتێب ناخوێنیتەوە ! ئاخر ئەوان پەیامیان پێیە ، ئەبێ‌ لە پەیامەكەیان بگەیت ... نەك تەنها وێنەیان لەگەڵ بگریت وبڵاوی بكەیتەوە تۆ تەنها ڕووكەش وسیمایانت دەوێت بۆ ئەوەی بە هاوڕێكانت بڵێی من ئەم كەسایەتیانە دەناسم لەكاتێكدا هیچ لە ناوەڕۆكی پەیامەكانیان نازانیت !.. ئەویش پەلەی ڕۆیشتنی بوو بێ‌ گوێ‌ دانە ووتەكانی هاوڕێ كەی بەهێمای دەست خواحافیزی لێكردو وبە جێی هێشت  ... چاوی لەسەری بوو تاوەكو لەدەرگای هۆڵەكە ڕۆشتە دەرەوە بە تەواوی  لەبەر  چاوی  وون بوو ..

© 2017 Hawler