تەمموز 09, 2020

‎هاودەنگ فاروق

 

‎لە بەردەم گۆڕانکاریی ئەو رووداوانەی لە دنیاو دەوروبەرمان ڕوو دەدەن، لە ژێر تەپوتۆزی ململانێی جەمسەرە جیهانی و گۆڕانکاریی هاوکێشەی هێزە ئیقلیمییەکان، هێرشی پەتای "کۆڕۆنا"ش سەربار، ئەگەر جیهان جارێک پێویستی بە گۆڕینی سیستەم و بەخۆداچوونەوە هەبێت، ئێمەی کورد دەبێت بە گشتی هەم بە خۆماندا بچینەوە، هەمیش خۆمان پێناسە بکەینەوە؛ ئایە ئێمە خەریکی چین؟ لە كوێی گۆڕانکاریی و ململانێ هێزە گەورەکانین؟ بەرژەوەندییە سیاسی و ئابووریەکانمان لە کوێن؟
ئەگەر ئەو ڕووداوانەی کۆتایی، بێنینە پێش چاوی خۆمان، ئەوەمان پیشان دەدات، ئێمە لە باروودۆخێکی زۆر باشدا نین، ئەو چوار پێنج ساڵەی کۆتاییش لە مەحەک بدەین، لە چەندین لاوە هەوڵی گەمارۆدان و بچووککردنەوەی قەوارەی هەرێمی کوردستان لە ئارادایە.
‎لە سەرووبەندی ڕیفراندۆم و ١٦ی ئۆکتۆبەرەوە و تا دەگاتە ڕووداوەکانی رۆژئاوای کوردستان، داگیرکردنی عەفرین و سەرێکانی، بچووککردنەوەی جوگرافیا و قەڵەمڕەوەی دەستەڵاتی ڕۆژئاوای کوردستان، نەهێشتنی شتێک بە ناوی هێزی باکووری کوردستان، ئەمانە هەموو سەلمێنەری ئەو ڕاستییە تاڵەن، کە بزووتنەوەی سیاسیی کوردی لە سەر ئاستی ناوچەکەدا، تا ڕادەیەک خاوەنی ئەو سەنگەی خۆی نەماوە، تاکە ترووسکاییەک مابێ مانەوەی حكومەتی هەرێمی کوردستانە، لە نێو دەستەڵاتی هەرێمیشدا، بوونی پارتی دیموکراتی کوردستانە کە زۆرینەی کورد بە چاوی ئومێدەوە لێی دەڕوانن و بە پارێزەری ئاسایشی نەتەوەیی کورد و قەوارەی سیاسیی هەرێمی کوردستانی دەزانن، پارتی لە بەردەم تەحەددیی گەورەدایە، بەرەنگاری سەرسەخت دەکات و ئیدارەی قەیرانی دوای قەیران دەدات، شانی بەرپرسیارێتیی داوەتە بەر هەموو کێشە و تەنگژەکان حزبە هاوبەشەكانیش لە حكوومەتدا هاوڕێی نیوەی ڕێگان و لە بەرپرسیارێتی قەیرانەكاندا خۆیان دەدزنەوە.
‎پارتی لە بەر تیشك و رووناكایی مێژووی پڕ هەوراز و نشێوی سەدەیەك خەباتی گەلی کوردستاندا، دەزانێ ئەوەی دەبێ هاوكێشەكان لە نێو كوردستاندا بە سوودی میللەتی كورد یەكلا بكاتەوە، بە شێوەیەك كە ئیتر نەكەوینە بەر نەفرەتی نەوەكانی دواڕۆژ، هەر خۆمانین، ئەگینا لە دەرەوی سنوورەكانی كوردستان هیچ هێز و لایەنێك چاوی بە دەستکەوت و سەركەوتنەكانمان هەڵنایە.
‎ کورد بۆ ئەوەی ئەو هێزەی کە لە ساڵانی نەوەدەکانەوە تا ٢٠١٤ و شەڕی داعش هەیبوو لە دەستی نەدات، دەبێ یەکڕیز و یەک دەنگ بێت، لە سەر پرسە نێوخۆیی و دەرەکییەکان لە سەر بنەمای یەک ستراتیژ ئیش بکات، ئەگەر وا نەکات مەترسیی زۆر هەیە شتێکی ئەوتۆی لەو هێزو پێگەیەی هەیەتی لە بن دەستیدا نەمێنێت.
بۆ ئەوەی لە رۆژی پێویستدا شتێکمان لە ژێر دەستدا بێت، پێویستە سەرمایەکی باشمان هەبێت، سەرمایەگوزاریش هەر ئەوە نییە هەندێک پارەی یەدەگمان هەبێت، کە نیمانە، سەرمایەگوزاری هەر ئەوەش نییە ئێمە چەک و تەقەمەنی و پێشمەرگەمان زۆر هەبێت، بەڵکو سەرمایەگوزاری گەورە ئەوەیە، ببینە خاوەن دامودەزگایەکی بەهێزی نەتەوەیی کە هەموو کورد لە دەوری کۆ ببێتەوە، ئەگەر نەتوانین ئەوە بکەین، هەر لە ناو قەیراندا دەمێنینەوە و دەکەوینە بەردەم ئایندەی قەدەرێکی نادیار، بەڵام لە پێناو ئەو سەرمایە گەورە مەعنەویەدا دەبێ بە گیانێكی لێبوردەییەوە پێکەوە كار بكەین و متمانەی میللەتەكەمان كە گەورەترین سەرمایەو پشتیوانمانە لە دەست نەدەین و باشتر بیپارێزین.

© 2017 Hawler