تەمموز 23, 2018

غازی حەسەن

لایەنە سیاسییەکان مەسەلەی موچە وەکو کارتێک و ئامانجێکی سیاسی بەشێوەیەکی فراوان لەهەڵبژاردن بەکاردەهێنن، ئەمەشیان لەپێناو دابینکردنی موچە بۆ موچەخۆران نییە، بەلکو بۆ هێرشکردنە سەر دەسەڵاتە، بۆ ئەوەی زۆرترین دەنگ کۆبکەنەوە، هەروەها گوتاری بەکارهێنانی کێشەی موچە، ئاڕاستەی حکوومەتی توندڕەوی عێراق ناکەن، کە بۆتە سەرچاوەی نەهامەتی و بڕینی موچەی فەرمانبەرانی هەرێمی کوردستان، بەلکو دەیانەوێت دەسەڵاتی کوردستان تۆمەتبار بکەن. تەنیا لەهەندێک بواردا دیماگۆگیانە قسە دەکەن و سیاسەتی بانێک و دوو هەوایە لەبارەی ئەم پرسە هەستیارە پیادە دەکەن. کێشەی موچە بۆتە هۆکارێک رێژەی بەشداری لەدەنگدان کەم بکاتەوە. لای هەندێک لایەنی سیاسی، کە هەندێکیان خۆیان داوایان لە مالکی و دواتریش لە عەبادی کردووە، بڕینی موچە وەکو کارتێکی سیاسی دژی دەسەڵاتی هەرێمی کوردستان بەکاربهێنن، لەپێناو هەڵوەشانەوەی ئیدارەی هەرێم، ئەمڕۆ بەتوندی دەیانەوێت نان و بژێوی خەڵک، وەکو پڕوپاگەندەی سیاسی لەهەڵبژاردن بەکاربهێنن.
بێگومان بەکارهێنانی ئەم مەسەلەیە، وەکو کارتێکی سیاسی لەرووی دەروونی و کۆمەڵایەتی زیانێکی زۆر بەهاووڵاتیان دەگەیەنێت، چونکە لەلایەک راستیی بڕانی موچە چەواشەکاری تێدا دەکرێت، هەروەها لەهەمان کاتیشدا وەکو کارتێکی سیاسی لەرووی دەروونی و کۆمەڵایەتی بەکاردەهێنن، کە زیانێکی زۆر بەهاووڵاتیان دەگەیەنێت، لەلایەک راستییەکان ئاوەژوو دەکرێتەوە، لەلایەکی دیکەشدا خودی هاووڵاتیان وەکو ئامێر دژی لایەنە رکابەرەکان بەکاردەهێنرێت، ئەمەش مەترسیدارە و چونکە نابێت هاووڵاتیان بەکیان و گیانێکی لاواز و بێ کاریگەریی سەیر بکرێت.
هاووڵاتی و دەنگدەر چی دەوێت؟ ئەمە پرسیارێکە پێویستە لایەنە سیاسییەکان بەوردی و واقیعی مامەڵەی لەگەڵ بکەن، چونکە تێگەیشتنی هەڵە، گوتاری هەڵە بەرهەم دەهێنێت، بۆیە دەبێت بەوردی رەچاوی خواست و داواکارییەکانی دەنگدەر بکرێت.
گەلێک لەدەنگدەران پێش ئەوەی باسی موچە، مەسەلەی گەندەڵی، رۆتینی ئیداریی، مەسەڵەی داو ودەرمان، پارەی جوتیاران لەبەغدا بکەن، لەنوێنەری لایەنەکان دەپرسن، ئەرێ ئێوەش وەکو کاندێدەکانی دیکە، پشتمان تێدەکەن و لێمان ناپرسنەوە و تەلەفۆنەکانتان دادەخەن و هەر بۆ دەنگ کۆکردنەوە سەردانمان دەکەن و ئیدی ببڕای ببڕای ناتان بینینەوە.
ئەمە داواکاری یەکەمی خەڵکە، داوکارییەکی زۆر سادەیە، بەڵام واتا و مەبەستێکی زۆر قوڵ و ستراتیجی لەپشتە. دەنگدەر پێش هەموو شتێک، پێش ئەوەی باسی ژیان و گوزەران و مافەکانی و چۆنیەتی چارەسەری کێشەکانی هەولێر لەگەڵ بەغدا بکات، داوا دەکات متمانە و پەیوەندی بەردەوام لەنێوان ئەوان و لایەنەکان هەبێت، لەنێوان ئەوان و کاندێدەکان هەبێت. کەچی لایەنە سیاسییەکان بەتایبەتی ئەوانەی بەرنامەی تێکشکاندنی دەنگیان بۆ کۆکردنەوەی دەنگ هەیە، ئەوانەی دەیانەوێت نان موچە و ژیانی خەڵک وەکو کارتێکی هەڵبژاردن و حزبی و سیاسی بۆ کۆکردنەوەی دەنگ بەکاربهێنن، رەچاوی ئەوە ناکەن، ئەم گوتارە هیچی کەمتر نییە لەموچە بڕینەکە، بەتایبەتی، کە مەسەڵەکان بەهەڵگەڕاوەیی و چەواشەکارانە بەکاردەهێنن.
موچەخۆران پێویستیان بە چارەسەری بنەڕەتی کێشەی موچە هەیە، پێویستیان بەوە نییە هەندێک کەس و لایەن کێشەکانی ئەوان تەنیا وەکو پڕوپاگەندەی هەڵبژاردن بەکاربهێنێت، هاووڵاتی پێویستی بە متمانە و پەیوەندی بەردەوام لەنێوان خۆی و نوێنەری لایەنە سیاسییەکان هەیە، پەیوەندییەک، کە دەبێتە هۆکار بۆ چارەسەری خواست و پێویستی و گوزەران و ژیانی رۆژانەیان. لایەنە سیاسییەکانیش پێویستە بیر لەدرێژەدان بەپەیوەندی بەردەوام و دروستکردنی متمانەیەکی پتەو لەنێوان خۆیان و هاووڵاتی هەیە.

© 2017 Hawler

Please publish modules in offcanvas position.