تشرینی یەکەم 21, 2019

هاودەنگ فاروق

 

وەک چۆن کشانەوەیان لە حکوومەتی کوردستان لەم زەمان و زەمینەیەدا جێی پرسیار و گومان بوو، زیارەتە سیقۆڵییەکەی کۆمەڵ و گۆڕان و ئەوی دیکە بۆ بەغدا، هیچ پەیوەندی بە مافی زەوتکراوی خەڵکی کوردستانەوە نەبوو، بەڵکو مەشهەدێکی ناشیرنی خەجاڵەتئامێز و خۆبەبچوکزانیی وەفدە حزبییەکە بوو لە بەردەم عەببادی، ئەم دوو حزبە تا ناز و نیعمەت و ئیمتیازات لە حکومەتی کوردستان مابوو ڕووقایمانە لە سەری ژووری کابینەکە بە کورسیوە چەسپابوون، وەختێکیش خێروبێر نەما و هەڵبژاردن جیددی و نزیک بوو، تایی موزایەدات و ڕیکلامی پێشوەختەی هەڵبژاردن دایگرتوون.
ئەگەر ئەم دوو حزبە خۆپەرست و دووژمندۆستە بخەیتە بەر حساباتی وردەوە، دووانه‌ی هەرە گەندەڵترین حزبی کوردستانین، چوونکە ئەگەر پارتی و یەکێتی هەر تەنیا گەندەڵ بن، ئەمان گەندەڵ و چەواشەکاریشن، ئەوە گەندەڵی و هەڵویستی نانیشتمانییە، لەم ڕۆژگارە نالەبارەدا ڕیزەکانی کوردستان تێکبدەیت و ڕوو لە کەعبەی شەرمەزاری بەغدا بکەیت و بۆ دوژمنەکەت بنوشتێیەوە، بەرژەوەندیە حزبی و شەخسییەکانت لە بەغدا بینیەوە.
لە راستیدا دۆخی کوردستان بەرگەی کەرتکردنی زیاتری ڕیزەکانی گەلی کوردستان ناگرێ، هەر کەس و لایەنێک کار لە سەر پەرتەوازەیی و لێکترازان و لاوازکردنی ناو ماڵی کورد بکات بە هەموو پێوەرێک لە خانەی خیانەتدایە، چونکە پیلانی دژە کورد ئاشکرایە کە مەرامی گەمارۆدانی هەرێمی کوردستانە، نەهێشتنی سیادەی نیشتمانییە، دابڕاندنی کوردە لە دنیا و لاوازکردنی سەنگ و پێگەی سیاسی و دیبلۆماسەتی کوردستانە لە جیهاندا، ئەمەش ستراتیژیەتی دوژمنانی ئیقلیمی و حکومەتی بەغدایه‌، سەردانە پڕ له‌ شەرمەزارییەکەی هەفتەی ڕابردوویش هەر لەو چوارچێوەدایە و بۆ خزمەتکردنی ستراتیژی دوژمنانی کورد بوو..
ئەوانەی پێیان وابێ ئەم سێ گروپە نامەسئولە کوردییە دەتوانن هەوڵێکی ئیجابی بۆ دابینکردنی مووچە و نەرمکردنی سیاسەتی ڕەق و زاڵمانەی بەغدا بەرامبەر بە کورد دەدەن، دەبێ کەسانێکی دیماگۆجی فریوخواردوو بن، چونکە حکومەتی بەغدا دەمێکە بە کردەوە سەلماندوویەتی کە جگە لە بەڵێنی درۆ و کات کوشتن و هەوڵی وشککردنی وزە و خوێن لە جەستەی کوردستان، هیچی دیکەی نییە بیدا بە کورد.
بە پێی زانیارییەکان یەکێک لە تەوەری داواکاریی ئەم دوو حزب و نیوە، ئەوە بووە؛ کە بەغدا هەرەس بە حکومەتی کوردستان بێنێ و بێ گەڕانەوە و هەماهەنگی هه‌ولێر ڕاسته‌وخۆ لە خەزێنەی بەغداوە، مووچەی فەرمانبەرانی کوردستان بدات، ئەمەش هەوڵێکی دیکەیە بۆ هەڵوەشاندنەوەی کیانی سیاسی کوردسان.
حکومەتی کوردستان هەڵقوڵاوی شەرعیەتی گەلە و یاساییه‌ تەنانەت ئەو دوو حزبەیش کە تازە سەنگەریان گۆڕیوە و چوونەتە بەرەی بێگانە دەنگیان بەم حکومەتە داوە و تا دوێنێ به‌شداربوون، بۆیە هەموو دەستکێشی و هاوکارییەکی نێوخۆیی کورد لەگەڵ حکومەتی عەببادی بێ گەڕانەوە بۆ حکومەتی کوردستان، هیچ شک و گومانی تیان نییە کە خیانەتە، خیانەتکارییش زووبێ یا درەنگ تووندترین سزای گەل و مێژوویی به‌دوادادێ و دەبێ باجەکەی بە گران بده‌ن.!

© 2017 Hawler