شوبات 23, 2020

بابسالاری ژی ئێکە ژ خالێن سەرەکی یێن پاشڤەمانا جڤاکی

شەیما مستەفا

 

جودا ژ چەوانیا بکار ئینانا ڤان زاراڤان د بوارێ رێزمانی دا بکار ئینانا ڤان زاراڤان د ژیانا ڕوژانە دا دیاردەکا جڤاکی یە و هزرێ ددەتە مە دەربارەی ڕەوشەنبیریا جڤاکی، ژن ئانکو ڕەگەزەکە ژ مروڤان و بەرامبەر زەلام دهێتە بکار ئینان، ئانکو پارچا سەرەکی یا مروڤی یە. ژ بلی ڤی زاراڤی نموونێن دی وەك مێ ژی هەنە بەلێ ئەڤ زاراڤە بتنێ د دەمێن دیارکری دا دهێتە بکار ئینان بو دیارکرنا ڕەگەزی بەرامبەر زاراڤێ نێر. د جڤاکی دا زاراڤێن بچویك کرنێ یان ژی بێ بهاکرنێ پتر دهێنە بکار ئینان وەك ژنك، بچویك، عەیال بو هەڤژینا ژن دهێنە بکار ئینان و بەروڤاژی زاراڤێن بلندکرنا پلەیا زەلامی دهێنە بکار ئینان، ئەڤە هەمی دبنە ئەگەرێ وێ چەندێ ب چاڤەکێ کێم بەرێ خوە بهێتە دان بو ژنێ و ببیتە پلا دووێ ژ مروڤان. و بێگومان ئێکە ژ خالێن پاشکەفتنا جڤاکی ژ لایێ جڤاکی ڤە. د سەردەمێن کەڤن دا ئەڤ چەندە داب و نەریتەك بوو تایبەت ل دەمێ کەسەکی کچا خوە دا با شویی بێی وەرگرتنا بوچوونا وێ ئەڤ چەندە دکر و خوە ددانا تاکە بریاردەر، ئانکو شویکرن بێی ڕەزامەندیا کچێ بوو و بابێ وێ یان برایێ وێ یان کەسەك د ناڤ خێزانێ دا ئەڤ بڕیارە ل جهێ وێ ددا و ئەڤە بێگومان تراژیدیەك جڤاکی یە، دیسان گوتنێن وەك دێ کەینە نەعال و کینە پێ وە، یان دێ بتە گوهاركەك بو گوهێ وە، ئەڤە هندەك گوتنێن مشەنە د ناڤ جڤاکی دا، یان ژی کچ مالێ خەلکێ نە، ئەڤە بوچوونا هزرا پاشکەفتی د ناڤ جڤاکی دا دیار دکت و بەلگەنامەیەك زندی یە دەربارەی بوچوونا جڤاکی بو ژنێ، کچ یان ژن د ڤی حالەتی دا دهێتە وەسف کرن وەك کەل و پەلەك و کڕین و فروتن پێ بهێتە کرن، ئانکو ئالاڤەك بازرگانی یە و زەلام خودان مافە ل سەر هەر بریارەکێ، سیستەمێ بابسالاری ژی ئێکە ژ خالێن سەرەکی یێن پاشڤەمانا جڤاکی و بوویە ئەگەرێ گەلەك ئاریشەیێن دەم درێژ.

© 2017 Hawler