تەمموز 11, 2020

كێ لە بری كورد قسە بكات؟

فارس نەوڕۆڵی

 

گۆڕانكارییە كۆمەڵایەتی و سیاسی و ئابوورییەكانی جیهان و ناوچەكە، ئەوەمان پێدەڵێن كە گۆڕانكاری هەمەلایەنە لە ڕۆژهەڵاتی ناوەڕاست ڕوودەدات. ئەمەش، لە ئەنجامی گۆڕانی جیهانبینیی خەڵكی ناوچەكەیە بۆ هەمووكایەكانی ژیان، سەدەكانی پێشوو، لە ئەنجامی شەڕە گەورەكان و ڕێكکەوتنەگەورەكان، كورد بە دەس بەتاڵ و باركراو بە تراژیدیا لێی دەرچووە. ئێستا جووڵە جیهانی و ناوچەییەكان ئاماژەكانی ئەوەمان پێدەڵێن كە كورد دەبێ وردتر و دوورتر بیربكاتەوە. لێرەوە، دەبێ كۆی كورد تێگەیشتنی دیكەی بۆ پرسی كورد هەبێت دەبێ پێش ئەوەی پرسی كورد بەپرسێكی یاسای، سیاسی، مۆڕاڵی، ئابووری ببینێت دەبێ تێبگەین كە پرسێكی فەلسەفییە، پەیوەستە بە ململانێی بوون و نەبوون، بریتییە لەبەریەك كەوتنی دوئاگای جیاواز، ڕاستە ئەم شەڕە شەڕی نەتەوەیە، بەڵام ئەگەر بگەڕێینەوە بۆ مێژووی دێرین ئەمە شەڕی بوون ناسانەیە لە نێوان دوو ڕوانگەی جیاواز بۆ ژیان ئەگەر دیكارتی پرسەكەمان بخوێنینەوە تێدەگەین كێشەی ئێمە كێشەی بوونی ئێمەیە، چون ئێمە هەین و نین، كەواتە ئێمە لە پارادۆكس دا دەژین، ئەوەی لەم دۆخە ڕزگارمان دەكات چییە؟ لێرەدا دیكارت بەرەو ئەو شوێنەمان دەبات كە نەریتێكی نوێ بكەینە ڕۆشنایی، بۆ پرسەكەمان، ئەمەش لەوێوە دەبێت تەسەورەكانی پێشوو لە خۆمان داماڵین، گەمە بچووكەكانی ناو ماڵی كوردی دەست لێ هەڵگرین، گەورەتر بیربكەینەوە، چونكە ژیانی سیاسی و كەلتووریی ئێمە جێگای بەزەییە و هەژارە. بۆ ڕاست كردنەوەی ئەم بارودۆخە پێویستمان بە بنەمایە، ئەو بنەمایەش پێویستی بە دیدێكی ڕووناكی نوێ هەیە، كاتێ دیكارت، دێت دەگەڕێتەوە بۆ ناوخۆی، ئەو پێیوابوو (ئەوەی كە منی مرۆڤ دەتوانم دڵنیابم لێی، دڵنیا بوون لە دەرەوە نییە، بە ڵكو دڵنیابوونە لە خۆم. من لەیەكەم قۆناغدا پێش ئەوەی زانست لەسەر دەرەوەی خۆم پەیدا بكەم، دەبێ زانست لەسەر خۆم پەیدا كەم، دەبێ دڵنیا بم لە خۆم، دواتر هەوڵدان بۆ دڵنیایی لەدەرەوە، لە قۆناغی دووهەم دا لە ڕێگای ناسینی خۆمەوە هەوڵی ناسینی جیهان بدەم) ئەمە كێشە مێژووییەكەی كوردە بێ ئەوەی خۆی بناسێ دەیەوێ جیهان بناسێ، لە كاتێكدا ئێمە لە بری پێناسەی خۆمان،خەریكی پیاهەڵدانی خۆمانین، ئەمەش لە گەمەیەكی بچووك تێ ناپەڕێ، ئێستا ناوچەكە لە گۆڕانكاریی خێرادایە، ڕووداوەكانی بەهاری عەرەبی و كێشەی ئێران و ئەمەریكاش ئەوەمان پێدەڵێن، كە هێزی ناوچەكە تەنها بەرامبەر كورد هێزبوون، ئەویش لە پەرتەوازەیی هێزی كورد خۆیەتی، ئەگینا، ئەوە تا دەبینرێ ئەو دەوڵەتانەی بە درێژایی مێژوو كورد دە چەوسێننەوە بەرگەی گەمەیەك و گورزێكی جددیی هێزەكانی نێودەوڵەتی ناگرن، ئەمە پێماندەڵێ پێویستە كورد بگەڕێتەوە بۆ ناو خۆی، ناو مێژووی خۆی، ناو مێژووی ململانێ ناوخۆییەكانی خۆی، ناو ئێستا، ئەمەش پێویست دەكات هەرلایەك نەترسێ و دان بەهەڵەی خۆی دا بنێ پرسیارێك لەخۆمان بكەین، ئێستا پێویستمان بە چییە، بۆ قسەكردن لەگەڵ دەرەوەی خۆمان؟ ئەمەش پێویستی بە خوێندنەوەیەكی هێندە قووڵ نییە، تەنها ئەوەیە پرسیار بكەین و پێناسەی پرسیارەكەش بكەین، لێرە نامەوێ بێمە ناو كێشەكانی گەندەڵی و ئەو بابەتانەی بەڕێوەبردن ئەوە قسەمان لەسەركردووە، پرسیارێك ئێستا دەبێ لە خۆمانی بكەین ئەوەیە، ئایا لەم دۆخە ئاڵۆزەی ڕۆژهەڵاتی ناوەڕاست، كە ژاندەیگرێ بۆ لەدایك بوونێكی نوێ، قسەكەرێك ناوەندێك نەبێ لەگەڵ جیهانی دەرەوەی كورد دا بەناوی هەمووكوردەوە قسە بكات، ئایا كاتێ وەفدێكی باڵای ئەمەریكا،ئەوروپا، ناوچەیی، عێراقی، دێتە كوردستان بۆ پرسێكی گرنگی ستراتیجی ئەمە ناوی لێ دەنێن چی؟ دەبێ لەهەولێرەوە تا هەڵەبجە و پارێزگا بە پارێزگا سەردانی ناوەندی سیاسی و كەسایەتیی سیاسی بكات، بزانێ ڕای كورد چییە؟ ئەرێ پرسیار ناكەن ئەو نوێنەرانەی كە دێنە كوردستان و دەگەڕێنەوە حاڵی ئێمە چۆن دەگەیەننە ناوەندەكانی بڕیار، ئەمە پێیدەڵێن پاشاگەردانی سیاسی، چارەسەری ئەم پاشا گەردانییە ئەوەیە جێگایەك ناوەندێك دامەزرێ بۆ ئەوەی جێگایەبێ لەبری هەموو كورد قسەبكات، بۆ ئەم مەبەستە پێشنیار دەكەم ناوەندێك بۆ دروستكردنی بڕیار دامەزرێ لە نوێنەری هەموولایەنە سیاسییەكان و ڕۆشنبیران و دۆستانی كورد لە هەركوێ هەن. بەڵام ئەم كەسانە لەو جۆرە كەسانەبن كە ئەقڵیان بە سیاسەت بە فكر بە بەرژەوەندی و چاكەی گشتی بشكێ، دەكرێ ئەم ناوەندە لە پرسە ستراتیژییەكاندا، راوێژ بداتە سەرۆكایەتی هەرێم، بۆ چۆنیەتی وەرگرتنی بڕیار بۆ قسەكردن لەگەڵ دەرەوەی ماڵی كوردستان، خۆ ئەگەر كەسی یەكەمی حزبەكان لەم دەستە یان ناوەندەدا ئەندام بن، ئەوا دروستكردنی بڕیار ئاسانتر و خێراتر دەبێت، چیتر كەسیش ناڵێ من ئاگام لەم جۆرە جووڵە و بڕیارانە نییە، كەواتە بۆ دەرباز بوون لەو پاشاگەردانییە سیاسییە دەبێت جێگایەك هەبێت بۆ پرسە گرنگەكان، لەبری كۆی هەرێمی كوردستان گفتوگۆ لەگەڵ دەرەوەی ماڵی كوردستان بكات. بەردەوامبوونی ئەم شێوازە و فرە ناوەندییە لە ڕاستیدا كورد و سەركردایەتی لە ئاست دەرەوەی ماڵی كورد دا دەخاتە بەردەم پرسیارێكی بێ وەڵام.
تێبینی :
سوود لە
1.كورد ناسی
2.كۆرسەكانی فەلسەفە
وەرگیراوە

© 2017 Hawler