ئایار 27, 2018

"هەرجارەو ئایەتێك" لایەك لە گشتگێری وشەی "سڵاو "لە قورئاندا

لەم تەمومژە خەماوی و بارە نالەبارە دەروونی و ئابووریەی هەموولایەكماندا كە هەمیشە قورئان بەشێكی سەرەكی چارەسەری لا دەست دەكەوێت.
لەم دنیا بە"چەرمی چۆلەكە"كراوەی ئێمەدا كە بەناو كەسایەتییەكانی ئایین سەرباری سیاسییەكان ئەوانیش هەر خەریكی بەرتەسك كردنەوەی میهرەبانی خوای گەورەن، لە خزمەت سی و سێ هەمین ئایەتی سورەتی "مرێم"دابووم، كە خوای گەورە باسی عیسای كوڕی مرێم مان بۆ دەكات – سڵاوی خوایان لەسەربێت – و باس لەوە دەكات كە نزای كردووە و گوتوویەتی:
"سڵاوی تایبەتی و دیاری كراو و سنووردار لەوڕۆژە بێت كە تێیدا هاتوومەتە دنیاوە و لە دایك بووم و لەوڕۆژەیش بێت كە تێیدا ئەمرم و لەوڕۆژەیش كە تیایدا زیندوو دەكرێمەوە ".
وشەی"السلام" بۆم بووە جێگای پرسیار، داخۆ بۆچی بە"مەعریفە"هاتووە، كە تایبەتمەندییەتیی دەگەیێنێت؟
گەرچی تەواوی ئایەتەكە هەڵدەگرێ زۆری لەسەر بگوترێت و ڕەنگە ئێرە بەشی ئەوە نەكات، وەلێ ناكرێ هەڵوەستەی بە دیارەوە نەكەم.
گومان لەوەدا نییە دەكرێ سڵاوەكەی عیسا – سڵاوی خوای لەسەربێت – وەك نزاو خواست لێكدانەوەی بۆبكرێت، نەك وەك هەواڵ و باس، بەمانا ئەوە خواستی ئەوە، نەك بڵێ من ئەوەم، ئەگەر مانای دووەمیش بێت، واتە عیسا – سڵاوی خوای لەسەربێت – باس لە میهرەبانی خوا دەكا لەسەری .
هەڵبژاردنی سێ كاتە كەیش – كاتی لەدایك بوون و مردن و زیندووكردنەوە –، گرنگی خۆیانیان هەیە و پێویستی بە یارمەتی خواهەیە .
دەستەواژەی"سلام" لە قورئاندا:
گەربمانەوێ باس لە دەستەواژەی"سلام" بكەین لە قورئاندا، پێویست بەوە دەكات بگەڕێینەوە بۆ ئەو زانست و بابەتانەی كە لە ڕووی ڕەوانبێژییەوە باس لەلایەنی موعجیزەیەتی قورئان دەكەن، وێڕای وردەكاری زمانەوانییش.
لە قورئاندا وشەی "سەلام" بە هەموو داڕشتنەكانیەوە زیاتر لە سیودووجار هاتووە و، لە هیچ جێگایەك سەلامی خوا بە"مەعریفە" نەهاتووە! كە ئەمە جێگای وێستانە بەدیارییەوە و، یەكێكە لە نیشانەكانی گەورەیی و بێ سنووری میهرەبانی خوای گەورە!
 من لێرەدا چەند نموونەیەكیان دێنمەوە:
1/ لە پانزەهەمین ئایەتی سوڕەتی"مریەم" دا كە باسی "یەحیا"ی كوڕی "زەكەریا" دەكات – سڵاوی خوایان لەسەربێت – بە شێوەی داڕشتنی"نەكیرە" كە گشتگیرییەت دەگەیێنێت دەفەرموێت:
"سڵاوی لێبێت ئەوڕۆژەی كە هاتە دنیاوە و لەوڕۆژەیشدا كە تێیدا دەمرێ و لەوڕۆژەیش كە تێیدا بەزیندوویی بە ئاگا دینرێتەوە".
2/ لە ئایەتەكانی سورەتی"هود"یشدا كە دێتە سەرباسی ڕزگاركردنی"لووت" پێغەمبەر – سڵاوی خوای لەسەربێت - لە پەنجاو نۆهەمین ئایەتدا دەفەرموێت:
"سڵاوی بێ سنوور لەسەر ئەوبەندانە بێت كە بۆخوا سوڵحاون و خوا بۆخۆیی تایبەت كردوون و هەڵیبژاردوون و پاڵاوتوونی".
3/ لە باسەكانی پەیوەست بە "نوح" پێغەمبەریشەوە – سڵاوی خوای لەسەربێت – لە حەفتا و نۆهەمین ئایەتی سورەتی"صافات"دا دەفەرموێت:
"سڵاوی بێ سنوور لە نوح بێت لە نێو هەموو جیهاندا".
4/ لە باسەكانی پەیوەست بە "ئیبراهیم" پێغەمبەریشەوە – سڵاوی خوای لەسەربێت – لە سەد و نۆهەمین ئایەتی سورەتی"صافات"دا دەفەرموێت:
"سڵاوی بێ سنوور لە ئیبراهیم بێت ".
5/ لەباسەكانی پەیوەست بە "موسا" پێغەمبەر و "هارون"ی برایەوە – سڵاوی خوایان لەسەربێت – لە سەدوبیست هەمین ئایەتی سورەتی"صافات"دا دەفەرموێت:
"سڵاوی بێ سنوور لە موسا و هارون بێت ".
6/ لەباسەكانی پەیوەست بە خۆشییەكانی بهەشتەوە، لە پەنجاو هەشتهەمین ئایەتی سورەتی"یس"دا دەفەرموێت:
"سڵاوێكی بێ سنوور كە بڕیار و وتاری پەروەرینێكە كە سیفەتی وایە میهرەبانییەكانی بێ سنوورن".
7/ لەكۆتایی سورەتی"زومەر"یشدا كە باس لە بەرەو بهەشت بردنی بهەشتییان دەكات لە ڕۆژی دواییدا، ئەو كەژاوەیەمان بۆ بەرجەستە دەكات و لە حەفتاو سێ هەمین ئایەتدا دەفەرموێت:
"ئەوانەی خۆ پارێز و لەخوا ترس و خاوەن بڕوا و كردەوە چاك بوون، كە ژاوەكەیان بەرەو بهەشت دەبرێت و پۆل بە پۆل كاتێ دەگەنە بەردەمی بهەشت، دەبینن دەرگاكانیان بۆ واڵا كراوەوە و دەرگاوانەكان پێیان دەڵێن . سڵاوی بێ سنووری خواتان لێبێت . بەخێر بێن و خۆشی لێببینن و بچنە نێوییەوە بۆ هەمیشە و بێ بڕانەوە".
دواوشە: وەك كورد دەڵێ "مشتێك نموونەی خەروارێكە"، ئەو چەند نموونەیەمان كە هێنایەوە بیری ئێوەی بەڕێز، تەنها بۆ تیشك خستنە سەربابەتەكە بوو و بەس، دەنا دەكرێ هەر ئایەتێكیان بكرێتە توێشووی گوڵخەرمانێك و سەرجەم ئایەتەكانی تریشم بهێنایەتەوە، بەڵام چونكە ناشوكری نەبێت خوێندنەوە و بایەخدان بە نووسین كەم بووە، ئێمەیش ناچارین بابەتەكان لە كورتی ببڕێنینەوە

 

                                    عومەری چنگیانی
.

© 2017 Hawler

Please publish modules in offcanvas position.