کانونی یەکەم 07, 2019

بوێری و نەبەردیەکەی پێغەمبەری ئیسلام

عومەری چنگیانی

 

وەكچۆن خەرمانەگوڵی سێ هەفتەی ڕابردووی ئەم مانگی ڕەبیعی یەكەمەمان تەرخان كرد بۆ باسی "چەند هەڵوەستەیەك بە دیار پەروەردەی قورئانیەوە بۆ محەمەد پێغەمبەر – دروود و سڵاوی خوای لەسەر بێت – "لە 25ی مانگەكەدا كە بەرانبەربوو بە 22 ی نۆڤەمبەری 2019لەسەر دوانگەی "مزگەوتی خەدیجەكوبرا"وە گوتاری ژمارە شەستوچوارمان بۆ درێژەدان بوو بە هەمان بابەت و بەشی چوارەمی باسەكەمان ڕوونكردەوە كە لێرەدا دەیخەینەوە بەردیدی ئێوەی بەڕێز و، باسمان لە "چەمكی بوێری و لایەنی ڕووبەڕوونەی پێغەمبەر كرد – دروود و سڵاوی خوای لەسەر بێت - بۆ نەیارەكانی ئیسلام" و هاوكات تیشكیشمان خستە سەر بابەتی گرنگی سڵاوات دان لە پێغەمبەر – دروود و سڵاوی خوای لەسەر بێت - .

چەمكی بوێری پێغەمبەر – دروود و سڵاوی خوای لەسەر بێت -:
گومان لەوەدا نییە كە خەبات – جیهاد - كردن لە پێناوی خوادا توانا و هەست و بوێریی و بڕوا پێبوون و بڕوا بەخۆبوونێكی بێ سنووری دەوێت، كە پێغەمبەر – دروود و سڵاوی خوای لەسەر بێت - هەموو توانایەكی پێویستی مەعنەوی و مادیی هەبوو لەوبوارەدا و، خەرجیشی كرد و، زۆر بە باشی فەرمانی خوای جێبەجێكرد كە وەك ئایەتی سەد و پەنجاو نۆی سورەتی "ئالی عیمران" فەرمووی :
"كە بڕیاری نێو ناخت هاتە سەر جیهاد – پاش ڕاوێژكردن بە یاران – پشتیوان - تەوەكول - ببەستە بەخوا ".
بەڵێ هەر لە یەكەم ڕۆژی بانگەكەیەوە دەیزانی كە ئەو ڕێگای ئەوی لەسەرە و ئەو ئەركەی بەو سپێردراوە، بە گوڵوگوڵزار چواردەوری نەگیراوە، بەڵكو هەر زوو "وەرەقەی كوری نەوفەل"یش ئەوەی پێگوت و پێشبینی ئەوەی پێدا كە ڕۆژێكدێ خزمەكانی دەربەدەری دەكەن و ماڵ و سامان و زێدی خۆیشی پێ جێدەهێڵن، ئەوە هیچ كاری لە هەستی نەكرد كە بە موو لە بەرەو ئامانج چوونەكەی واز بێنێ و مل بە بت و بتپەرستی بدات، كە وێڕای ئەو بوێرییە بێ سنوورەی خۆی هەمیشە هاندەرێكی تەواو بوو بۆ دروستكردنی كەسایەتی جەربەزە و بوێر لە نێو یارەكانیدا كە ئەوەیشی بەشێك بو لە جێبەجێكردنی فەرمانی خوا وەك شەست و پێنج هەمین ئایەتی سورەتی"ئەنفال" دەفەرمێت:
"ئەی پەیامگەیینی ئێمە هانی بڕوادارن بدە لەسەر داكۆكیكردن و جەنگین و ڕووبەڕووبوونەوە".
یان حەفتا و سێهەمین ئایەتی سورەتی"تەوبە: كە دەفەرمێت:
"ئەی پەیامگەیێنی ئێمە خەبات – جیهاد - بكە لە بەرانبەر بێ بڕوا- كافر- و دووڕووەكان و لەبەرانبەریاندا توندو ڕەقبە".
لێرەدە جێی خۆیەتی باس لە ڕاستییەكی نەشاراوە بكەم ئەویش خۆی لەو هەوڵە چەواشەكارییانەدا دەبینێتەوە كە لە ژێر دروشمی لێكجودای زۆروبۆردا لێرەولەوێ بەدی دەكەم، هەوڵێكی زۆری كەم بەهاكردنی ماندووبوون لە پێناوی خوا و بانگەشە بۆ یەكخواناسی و بایەخدان بە بنەماكانی ئیسلام كە خەریكە لەتامیشی دەردەكەن و، دەبینین دەیان سیمینار و كۆڕو كۆنفراس و چالاكی دەبەسترێت لەژێر ناونیشانی پێكەوە ژیانی شوێنكەوتەی ئایینە لێكجوداكانی كوردستان، وەك بلێی كێشەی پێكەوە نەژیانی ئایینیمان هەبێت، كە مێژوو و واقیعیش دەیسەلمێنێ كە سەد یەكی لێكحاڵی نەبوونی سیاسییەكان كێشەی شوێنكەوتەی ئایینە لێك جیاكانمان نەبووە و نییە لە كوردستان، تا كار گەیشتوەتە ئەوەی زۆرجار لە هەندێك كۆلكەخوێندەواری ئایینی دەبیستین دەڵێن جیاوازی لە نێوان ئایینەكانا هەر نییە، ئەوەیش لەولاوە بوەستێ كە زۆرجار هەوڵی نەزۆك درا بۆ دوورخستنەوەی ئەو ئایەتانەی باس لە دژایەتی داگیر كەر دەكەن لە پڕۆگرامی خوێندنی قوتابیاندا، ئەوە ماوە لێمان بخوازرێت چاوێك بە قورئاندا بخشێنینەوە و ئەوەی بەلای ئەوانەوە جێگای ترسە تیای نەهێڵین، دیارە بە ئەركی دەزانم هۆشداری بدەم بە مامۆستایانی ئایینی كە پێویستە زۆرتر و باشتر لە ئێستا بەرچاو ڕوون بین و ڕووبكەینەوە زانست و ئەوەمان لە یاد بێت كە هەر هەوڵێك بۆ كەم بەهاكردنی هێز نە لەبەرژەوەندی ئایینیی و نە لەبەرژەوەندی نەتەوەیی و نە بەرژەوەندی نیشتمانمانە.

© 2017 Hawler