کانونی یەکەم 07, 2019

پێشمەرگەی كوردستان و بەس!

جەمال عەبدوڵا

 

• كە پێشمەرگە درووستبووە بۆ ئەوە درووستبووە كە بەرگری لە كوردستان بكات، بۆ ئەوە درووستنەبووە كە بەرگری لە كاك فڵانی بەرپرس بكات جا ھەر بەرپرسێك بێت، كە پێشمەرگە درووستبووە بۆ ئەوە درووستبووە كە بەرگری لە كوردستان بكات، بۆ ئەوە درووستنەبووە كە بەرگری لە كاك حزب یان كاك تەكەتولی ناو حزبێك بكات ئینجا ھەر حزب و ھەر تەكەتولێك بێت .
• ھەوڵەكانی یەكخستنی پێشمەرگە بەردەوامن بەڵام یەكخستنی پێشمەرگە لەڕووی سەربازیەوە و گۆرینی ناوی یەكەی حەفتاو ھەشتا بە لیواو فەوج و سریەو فەسیل و حەزیرە و پۆشینی یەك جۆر جلوبەرگ و كردنەوەی خولی ڕاھێنانی سەربازی و وەرزشی بەیانیان و ساحەی عەرەزات، ئەمانە ھیچیان یەكخستنەوەی ھێزی پێشمەرگە نین . تیڤی و ڕاگەیاندن و بەرپرسان كەیفی خۆیانە چی دەڵێن، بەڵام ھەتا ئەو كاتەی كە پێشمەرگەی كوردستان ھەر ھەموویان تێر تێر نەبن بە ھۆشیاریی نیشتیمانی، ھێزی پێشمەرگەی كوردستان حسابی یەكخستنی بۆ ناكرێت، ھۆشیاریی نیشتیمانی بەو مانایەی كە دەبێت پێشمەرگەی كوردستان تەنھا ئینتیمای بۆ كوردستان ھەبێت وەك نیشتیمانی ھەمووان و ئەگەر لێیان پرسی تۆ پێشمەرگەی كێیت ؟ ئەم پرسیارە وەك تاوان سەیر بكات چونكە كە وتیان تۆ پێشمەرگەی كێیت واتە مەبەستیانە بڵێن تۆ پێشمەرگەی چ كەسێكیت ؟ بەڵام كوردستان نیشتیمانە نەك كەس جا ھەر كەسێك بێت ! ھۆشیاریی نیشتیمانی بەو مانایەی كە دەبێت پێشمەرگەی كوردستان تەنھا ئینتیمای بۆ دامودەزگا دەوڵەتی و دەستووریەكان ھەبێت و ئەگەر لێیانپرسی تۆ پێشمەرگەی بارەگا یان نوسینگەی كام حزبیت ؟ ئەم پرسیارە وەك تاوان سەیر بكات چونكە كەوتیان تۆ پێشمەرگەی كام بارەگا یان نووسینگەی كام حزبیت واتە مەبەستیانە كوردستان بكەیت بە قوربانی بارەگا یان نووسینگەی حزب یان تەكەتول یان كەسێكی ناو حزبێك ھەروەك ھەتا ئێستا زیاتر لەجارێك ڕوویداوە بۆ نموونە لە كشانەوە شومەكەی پێشمەرگە لە 16 ی ئۆكتۆبەری 2017 لە خوورماتو و كەركووك ! خۆ ئەوە بۆ كوردستان نەبوو تەنانەت بۆ حزبیش نەبوو ئەوە بۆ چەند كەسێك بوو ! جا حەیف نیە پێشمەرگە بەو بەرزیەی خۆیەوە ببێت بەقوربانی بارەگاو نووسینگەی حزب یان تەكەتول یان كەسێكی ناو حزبێك ؟ ئەگەر كوردستان نەبێت كەس و حزب و تەكەتول چین ؟ ھەتا لەناو مۆخی سەری پێشمەرگەدا كوردستان جێگەی كەس و حزب و تەكەتول نەگرێتەوە ھێزی پێشمەرگە حسابی یەكخستنی بۆ ناكرێت ئینجا تیڤی و ڕاگەیاندن و بەرپرسان كەیفی خۆیانە چی دەڵێن!.

© 2017 Hawler