تشرینی یەکەم 17, 2019

ڕێبازی پێغەمبەران چاو و ڕاو و بتپەرستیی نییە!

عومەر چنگیانی

 

ئەمڕۆ هەژدەی مانگی محەڕەمی 1441ی كۆچیە و وەك بینیمان لە ماوەی سەرەتای ساڵەوە، تا دە ڕۆژ، ئەوانەی بەخۆیان دەڵێن هەوادارانی ئالوبەیتی پێغەمبەر – دروود و سڵاوی خوای گەورە لەسەرپێغەمبەر و ئالوبەیت و یار و سەرجەم شوێنكەوتوانی - بینیمان وەك نەریتی ساڵانەیان بە سەدان هەزار درۆی شاخداریان درا بە گوێدا و بەردەوام ئەوكلتوورە، نەك نوێكردنەوە و بەخۆدا هاتنەوەیەكی تێدا بكرێت، بەڵكو بە "مۆدێرن" كردنی تێدا كرا تا بگاتە ئەوەی كە بێ شەرمانە ژمارە تەلەفوونی حسێنی كوڕی عەلی – خوایان لێ ڕازی بێت – بڵاو بكرێتەوە و كار بگاتە ئەوەی بە پێش چاوی كامێراوە هاوڵاتییەكی عەرەبی عێراقی گوایە خەوی بینیوە بە حسێنەوە پێی وتووە سێ گوللە بنێ بەخۆتەوە و هاوار بكە "یا حسێن" ئیتر هیچت لێ نایە و، كردی و هیچی لێهات و، وەك دەڵێن بە نەخۆشخانەیشدا نەگەیشت و لەناو چوو. ئاپۆڕای میوانانی ئێرانی بۆ "كەربەلا و نەجەف" وەك دوو سەرچاوەی دارایی شیعە و خزمەتكردنی پۆلیس و سوپای عێراقی بۆیان و نیشاندانی سەدان دیمەن كە چۆن ئەو سوپا ڕسواكراوە عێراقیە، ڕسواییان پێ دەكرا و پۆلیسی ئیتیحادی هەر خەریكی خزمەتكردن بوون بە میوانان، بەڵام نەك خزمەتێكی پەیوەند بە كار و پیشە بەڕێزەكەی پۆلیسەوە! بەڵكو شێلانی پێی ئێرانییەكان و ماچكردنی دەستودامەنیان، كە هەموو ئەم دیمەنانە پێمان دەڵێن لەبەر دەم مرۆڤی خورافات پەروەردا سنوورێك نییە پێی بوترێ سنووری عەقڵ، وەك چۆن لەبەردەم سیاسییەكانی عێراقدا شتێك نەماوە پێی بوترێت "بەها" و ڕەوشت و نیشتمان و هاوڵاتی و عێراقی بوون و، لەبەردەم ئێرانیشدا شتێك نییە بەدەر لە تۆڵەی چەند ساڵەی شەڕی ئێران عێراق و پەرەدان بە مەزهەب و شەقوپەق كردنی هەر یەكگرتوویییەكی مسوڵمانان و سەپاندنی عەقڵی پڕ لە خورافاتی بێ سنوور و كڵاونانە سەر خەڵك و دەمامك دانان و نەهێشتنی ئازادی تاك و...هتد. گەرچی لێرە و لەوێ دەبینم هەندێك دەنگی پیرۆز و مرۆڤ پەروەر لەناو برا شیعەكانیشدا بڵند دەبێتەوە و، ئەوانیش جارو بار ئەوە وەبیر دێننەوە كە ئایینی خوا چەواشەكاری نییە. ئاخر كاتێ هەرتاكێك دەرفەت دەدا بە مندیل بەسەر، یان قەڵەم بەدەست، یان هەركەس لەژێر هەرناوێكدا بێت، بیخەڵەتێنێ ئاوای لێدێت، زۆر جارچەند دێڕێكم لە مام هەژاریڕەحمەتی "1" وەرگرتووە و، بە نموونە هێناومەتەوە و ئەمڕۆیش دەیخەمەوە نێو نووسینەكەم. (دنیا پڕیەتی لە پیاوی فێڵباز، كە لەسەرفریودانی دڵسادە و بەستەزمان دەژین، بنیادەمن لە شكڵی تۆ، بگرە تۆ جوانتر و رێكوپێكتریشی لەوان، بەڵام دەبینی بەڕدێن، بە كەوای شۆڕ، بە مێزەری زل و تەزبیح و متوموورو چی و چی، خۆیان لە خەڵك گۆڕیوە، دەڵێ‌: وەرە بتبەمە بەهەشتێ‌.
یان ئەفەندیەکیچاویلکەبەچاوە، خۆی لەسەرخەڵك بە هەیبەتكردووە، كۆمەڵێك دڵسادە دوای خۆی دەدا؛ وەرن حیزبم دروست كردووە، واتان بۆ دەكەم وا بكرێ.
لەوانەدا زۆر ئاگاداری خۆتبە، دەتوانی بێینیە بەرچاوت، ئەو كابرایەی دەڵێ‌: شێخم، ریشی بتاشرێ‌، شۆرتێكی دەبەركرێ‌، پێخواس بێ‌، یان وەك چیرۆكەكەی (چیخۆف) لە حەمام رووت بێتەوە، چۆن مەیموونێكی لێدەردەچێ‌، دەكرێ‌ بڵێی: تۆ بۆشتێك نادەی بە من، تا بتبەمە بەهەشت، خۆ هی هەردووكمان حەواڵە بە دوای مردنە!
یان كابرای سیاسیکاری خاوەن حیزب، ئەگەر تۆ لە پێشمەوە بیت، لە سەنگەردا، قبوڵمە، بەڵام تۆ بۆخۆت لەوپەڕی خۆشیدا بژی و من بەكوشتن وگرتندا بدەی، خوا هەڵناگرێ‌)(2)(3).
لەكۆتاییدا سەدوهەشتەمین ئایەتی سورەتی "یوسف" دێنمەوە بیری هەموولایەك كە خوای گەورە ڕووی گوتار و فەرمانی دەكاتە محەمەد پێغەمبەر – دروود و سڵاوی خوای لەسەر بێت – و دەفەرمێت: "پێیان بڵێ ئەمە ڕێبازی منە و خەڵكی بانگدەكەم بۆلای خوا، بانگی من بۆ خوایە و ئیشەكەیشم لەسەر چاوڕۆشنی و بەرچاوڕوونییە نەوەك چاو و ڕاوكردن لە هیچ كەسێك، منیش و هەركەسیش شوێن من بكەوێت هەر لەسەر بەرچاوڕوونی خەڵك بانگ دەكەین، دووری بۆخوا لە هیچ لەكەیەك و هەرگیز من یەكێك نیم لە هاوەڵ بۆخوا پەیداكەران". وا بزانم ئەم ڕاستە ڕێگا نیشاندانە گەورەترین وەڵامە بۆئەوانەی وا دەزانن یان پڕو پاگەندەی ئەوە دەكەن كە شوێنكەوتنی ئیسلام"چاوبەست"ـە و "ئایین تریاكی گەلانە"، گەرچی زۆر بەداخەوە ئاكاری خودی مسوڵمانان پێچەوانەیە.
پەراوێز:
(1)عەبدوڕەحمان شەرەفكەندی لە ساڵی1921لە شاری مەهاباد لەدایك بووە و لە 21/2/1991 لە شاری كەرەج كۆچی دوایی كردووە.
(2) بنواڕەچێشتی مجێوردا لاپەڕە ٧.
(3) یەكەمجار حەڤدە ساڵ و شەش مانگ و چواردە ڕۆژ لەمەوبەر، ئەم قسانەی "مام هەژار"م لە3ی3ی2002 لە ژمارە 3626 ڕۆژنامەی برایەتی – ئەم خەباتەی ئێستا- دا بڵاوكردۆتەوە.

© 2017 Hawler