شوبات 27, 2020

جەمال عەبدوڵا

• مەبەست لە كەمكردنەوەی شان و شكۆ و لێدان لە مەقامی دینی و مەزھەبیی سەید عەلی سیستانی نیە، بەڵكو مەبەست لەو فەشەل و ھەڵدێرەیە كە تووشی عێراق بووە . مەبەست لە داڕزانی ئەو دامودەزگایانەیە كە بەحساب دامودەزگای دەوڵەتی عێراقن . ئێوە وەرن سەیر بكەن : -
1 : - حكوومەتی عێراق پارەی گەنمی جوتیارانی ھەرێمی كوردستان نانێرێت، دوو وەزارەتی كشتوكاڵ ھەن یەكێكیان وەزارەتی كشتوكاڵی حكوومەتی عێراق و ئەوی تریان وەزارەتی كشتوكاڵی حكوومەتی ھەرێمی كوردستانە كەچی بۆ ناردنی پارەی گەنمی جوتیاران لەھەرێمی كوردستانەوە دەچن بۆ لای سیستانی بۆ ناردنی پارەی گەنم ! ئایا سیستانی وەزیری كشتوكاڵە یان عەلافە و گەنمی جوتیارانی ھەرێم لە سایلۆكەی سیستانیدایە ؟
2 : - بەبڕیاری فەیلەقی قودسی ئێران و ڕەزامەندیی عەبادی و ڕێككەوتنی ژێربەژێری بەشێكی ناوخۆمان، حەشدی شەعبی سوارسەری كەركووك و خورماتوو دەكرێت و نزیكەی 200 ھەزاركەس لە خەڵكەكەی ئاوارە دەكرێن، كەچی بۆ چارەسەركردنی كێشەی ئەو ئاوارانە دەچنە لای سیستانی . ئایا سیستانی فەریق ئەوەل ڕوكنە لەسوپای عێراق و ئەو كەركووك و خورماتووی بەودەردەبرد یان وەزیری كۆچ و كۆچبەرانی عێراقە یان نوێنەری نەتەوەیەكگرتووكانە لە عێراق ھەتا بێت و كێشەی ئاوارەكانی خورماتوو چارەسەربكات ؟
3 : - بودجەی ھەرێمی كوردستان لای حكوومەتی عێراق گیری خواردووە، كەچی پێشنیاز دەكرێت بۆ ئەوەی كورد بچێتە لای سیستانی بۆ ئەوەی سیستانی بودجەی ھەرێمی كوردستان بنێرێت . ئایا سیستانی سەرۆكی ئەنجوومەنی وەزیرانی عێراقە یان وەزیری دارایی ؟ سیستانی لەچی و لەكام پارەی بەردەستی بودجە بۆ ھەرێمی كوردستان بنێرێت ؟ سیستانی خومس واتە پێنجیەكی واریداتی ئەو شیعانەی لایە كە بەگوێرەی قەناعەتی مەزھەبیی خۆیان ئەو پێنج یەكە لەواریداتی خۆیان دەنێرن بۆ سیستانی وەك مەرجەعی خۆیان بەڵام خۆ بودجەی ھەرێمی كوردستان لەناو ئەو پێنجیەكەدا نیە و بودجەی ھەرێمی كوردستان دەبێت لە واریدات و داھاتی گشتیی عێراق دابینبكرێت نەك لە خومسی شیعەكانی سیستانی مەرجەع !
4 : - حكوومەتی عێراق پابەندی دەستووری عێراق نەبووەو نابێت كەچی دەچن بۆلای سیستانی بۆ ئەوەی حكوومەتی عێراق پابەندی دەستوور بێت ! نەك ھەردەستووری عێراق بەڵكو لایەنێكی دەستوور بەگشتی لەھەر وڵاتێكی خاوەن دەستووردا بۆ دیاریكردن و ڕێكخستنی دەسەڵاتەكانی دامودەزگاكانی دەوڵەت و پەیوەندیەكانی نێوان ئەو دەسەڵاتانەیە لەگەڵ یەكتردا . بەڵام خۆ سیستانی لەناو دەستووری عێراقدا پەیوەندیی بەھیچكام لەو دامودەزگایانەوە نیە كە بەحساب دامودەزگای دەوڵەتی عێراقن . ئەی كەواتە لە پارەی گەنمی جوتیارانەوە ھەتا پێویستیی پابەندبوون بەدەستوور، سیستانی بۆچی ؟ ئەگەر بەڕاستی دەوڵەت ھەبێت و ئەم دەوڵەتە بەڕاستی خاوەنی دامودەزگابێت و ئەم دامودەزگایانەش پابەندی دەستووربن دیسانەوە سیستانی بۆچی ؟ ئایا بەردەوام ھانابردنەبەر سیستانی خۆی لەخۆیدا باشترین و گەورەترین بەڵگەی داڕزان و داوەشینی عێراق نیە بە دامودەزگاو بەرپرسەكانیشیانەوە ؟.

© 2017 Hawler