ئەیلول 20, 2019

بەكر كەریم حەسەن*

 

فەیلەسوف و نوسەری روسی دوستویفسكی دەلێ"هەڵسان بە هەر هەنگاوێكی نوێ، یان دەربڕینی هەر ووشەیەكی نوێ زۆرترین ترس لای خەڵك دروست دەكات".
وەزارەتی پەروەردە لەگەڵ دەستبەكاربوونی كابینەی نوێ و داڕشتنی پەیام و دیدگای چوار ساڵەی داهاتوو پاڵپشت بە نەخشە رێگا و پلانی نوێ ئومێدی بوژانەوە و نوێ بونەوەی پەروەردەی لێ چاوەڕوان دەكرێ، بەڵام گرنگتر جێ بەجێ كردنیەتی بۆیە بۆ بوژانەوە و نوێ بوونەوەی پرۆسەی پەروەردە و فێركردن لە هەرێمی كوردستان پێویستیمان بە هەبوونی دیدگایەكی رۆشن و دوورمەودا هەیە پاڵپشت بە نەخشە رێگایەكی پەروەردەیی هەڵچنراو بە ئەزموون و شارەزایی پەروەردەكارانی ویژدان زیندوویی ناو كایەی پرۆسەی پەروەردە بەنیەت و ئیرادەیەكی راستگۆ و دوور لە هەموو بەرژەوەندییەكی تایبەت و تاكە ئامانج و مەبەست هەستانەوەی پەروەردە و گەڕانەوەی متمانە لە نێوان پەروەردە و كۆمەڵگە بەگشتی ئەویش بە دەست بارگرتنی هەموو لایەك بۆ بوژانەوە و نوێ بوونەوەی پرۆسەی پەروەردە بەگشتی پەڕەناوكردن و دەستەبژێری لە كۆی جومگە جۆراوجۆرەكانی پەروەردە و هێنانە كایەی ژینگەیەكی لە بارو رەخساو بۆ تەكاندان و داهێنان لە پەروەردە پاڵپشت بە پلانێكی دیراسەت كراو بۆ چاككردنی باروگوزەرانی مامۆستایان بە گشتی و راهێنان و مەشقی بەردەوام بە مامۆستایان و كەم كردنەوەی زۆری ژمارەی قوتابیان لە پۆلەكان و گەڕانەوەی ئەو قوتابیانەی قوتابخانەیان جێ هێشتووە، هەروەها گەڕانەوەی مامۆستایان بۆ قوتابخانە حكومییەكان و گرنگیدانی زیاتر بە قوتابخانە حكومییەكان و باشتركردنی ئاست و جوانتركردنی ژینگەی قوتابخانەكان و جێ بەجێ كردنی سیستەمی پەروەردە و پلانی پەرەپێدان و گەشەپێدان و بوژانەوەی پەروەردە و فێركردن لە هەموو قوناغەكانی باخچەی منداڵان و قوتابخانە بنەڕەتی و ئامادەیی و پەیمانگاكان. لە بیرمان نەچێت گەربمانەوێ هەر پێشكەوتنێك و گەشەسەندنێك لە پەروەردە ببینین، پێویستە سەرەتا گرنگی بە مامۆستا بدەین لە هەموو روویەكەوە (دارایی و گوزەران، كۆمەڵایەتی، پسپۆڕی)، چونكە مامۆستا پێشمەرگەی جێ بەجێ كردنی سیستەمی پەروەردەیە لە سەنگەرەكانی هەرە پێشەوە كە پۆل و قوتابخانەیە.
بۆیە گرنگە مامۆستایانیش بە ئیرادەیەكی تۆكمە و ویژدانێكی ئاسودە ئامادەی سەركەوتنی پرۆسەكە و پاراستنی ئەمانەتە مێژووییەكە بن بۆ ئەوەی بتوانین لە داهاتوودا تەكانێك و بازدانێك بە پرۆسەی پەروەردە بدەین لە بەرژەوەندی كۆمەڵگە و هەرێمی كوردستان بەگشتی.
*بەرێوەبەری گشتی چاڵاكی وەرزش و هونەر
ماستەر لە كارگێڕی پەروەردەیی

 

© 2017 Hawler