شوبات 28, 2020

حكومه‌تا هه‌رێما كوردستانێ دێ ژ قه‌یرانا دارایی رزگار بیت

به‌ده‌ل گابێركی

پشتی سه‌رۆكێ حكومه‌تا هه‌رێما كوردستانێ پرۆژه ‌یاسایه‌ك ئاماده‌كرییه‌ بۆ كرنا چاكسازییان دناڤ هه‌یكه‌لێ حكومه‌تا هه‌رێما كوردستانێ بۆ هندێ پاره‌كێ زێده‌ بۆ حكومه‌تێ بزڤریت و سیسته‌مه‌كێ دادپه‌روه‌رانه‌ بۆ فه‌رمانبه‌رێن هه‌رێمێ بهێته‌دانان.
سه‌رۆكێ حكومه‌تێ نێچیرڤان بارزانی دگه‌ل ئه‌نجومه‌نێ وه‌زیران پشتی ئاماده‌كرنا ڤی پرۆژه‌یی ئاراسته‌یی په‌رله‌مانێ كوردستانێ كری، بۆ هندێ بهێته ‌دیراسه‌تكرن و پاشی ب رێكا یاسایه‌كا تایبه‌ت ده‌نگدان ل سه‌ر بهێته‌كرن، تا كو حكومه‌ت وی پرۆژه‌ یاسایی جێبه‌جێبكه‌ت.
ئه‌ڤه‌ پتر ژ مه‌هه‌كێ یه‌ شه‌ش لژنێن په‌رمانێ كوردستانێ ده‌رباره‌یی پرۆژه‌یاسایێ چاكسازیێ ل دور مووچه‌ و ده‌رماله‌ و به‌خشین و ئیمتیازاتێن دیتر ل په‌رمانی دانوستاندن ل سه‌ر دهێته‌كرن.
لڤێره‌ ئه‌رێ نه‌یا گرنگه‌ په‌رله‌مانێ كوردستانێ له‌زێ د ده‌رئێخستنا ڤی پرۆژه‌یی بكه‌ت، ژ به‌ركو نوكه‌ ژ هه‌رده‌مه‌كی پتر وه‌لاتیێن هه‌رێما كوردستانێ پێدڤییا ب چاكسازییان هه‌ی و به‌رێ هه‌موویان یێ ل ڤان چاكسازییان بۆ هندێ هه‌رێما كوردستانێ ژ قه‌یرانا ئابۆری رزگار ببیت.
گرنگه‌ ئه‌ڤرۆكه‌ گورانكاری د وێ نه‌دادپه‌روه‌رییا مووچه‌یان دا بهێته‌كرن و كه‌سێن ده‌رماله‌یێن زێده‌ یان مووچه‌یه‌كێ زێده‌ وه‌ربگریت و نه‌یێ ژ هه‌ژی بیت بهێته‌برین یان كێمكرن ئه‌رێ حكومه‌ت و په‌رله‌مان دێ شێن ڤێ چه‌ندێ كه‌ن یانژی ئه‌و پرۆژه‌یه‌ژی دێ وه‌كو هه‌موو پرۆژه‌ یاسایێن دیتر ب تنێ دێ مینیته‌ ل سه‌ر په‌له‌گرافه‌كێ و ناهێته‌ جێبه‌جێكرن.
ل وه‌لاتێن جیهانێ ده‌مێ قه‌یرانه‌ك دروست دبیت هه‌ر زوی ده‌ست ب چاكسازییان دكه‌ن و وه‌لاتێن خوه‌ رزگار دكه‌ن شه‌ڤ و رۆژان دكه‌نه‌ ئێك بۆ هندێ هه‌ر چه‌ند زویتره‌ ژ وێ قه‌یرانێ رزگار ببن، به‌لێ ل هه‌رێما كوردستانێ دێ بینی پارتێن سیاسی ئێك نینن و هه‌ر ئێك دژی یێ دیتر كاردكه‌ت و ناهێلن كه‌سێن سه‌ركه‌فتی ژی ب روولێ خوه‌ راببن گه‌له‌ك پارتێن سیاسی ل هه‌رێما كورستانێ هه‌نه‌، ئه‌گه‌ر بزانن قه‌یران دێ چاره‌سه‌ر بیت، به‌س نه‌ ل سه‌ر ده‌ستێ وان قه‌بیل ناكه‌ن و دێ چه‌ندین كێشه‌ و ئاریشان په‌یداكه‌ن.
دیسان یا پێدڤییه‌ حكومه‌ت ژبلی چاكسازییا مووچه‌ی د چه‌ندین بوارێن دیتر ژی دا چاكسازییان بكه‌ت وه‌كو چاكسازی د كه‌رتێ تایبه‌ت دا بۆ نموونه‌ نۆژداره‌ك كار دكه‌ت و شه‌ڤا وی ب ئێك ملیون دینارانه‌ دڤێت ئه‌و نۆژدار باجێ ژ وی پاره‌یی بده‌ت و ئه‌گه‌ر حكومه‌ت باجێ ب شێوه‌یه‌كێ شه‌فاف ژ هه‌موو كه‌سان وه‌ربگریت ب تایبه‌تی ئه‌ڤێن داهاتێن وان زێده‌ دێ بیته‌ ئه‌گه‌رێ هندێ پاره‌كێ زێده‌ بكه‌ڤیته‌ ده‌ست حكومه‌تێ و حكومه‌ت ژی دێ شێت ب وێ رێكێ چه‌ندین پرۆژه‌یێن گرنگ بۆ وه‌لاتیان د هه‌موو بیاڤاندا كه‌ت.
هه‌روه‌سا ئێك ژ خالێن هه‌رن گرنگ بۆ چاكسازیێ چالاككرنا سیسته‌مێ بانكی یه‌ كو فه‌رمانبه‌ر پارێ خوه‌ هه‌موویێ ژ بانكێ نه‌كێشن ئه‌وژی ب رێكا كارته‌كا ئه‌لكترۆنی ل وی ده‌می ژی دێ هه‌موو ده‌مان بانكان پاره‌ تێدا هه‌بن و حكومه‌ت دێ شێت ب وی پاره‌یی گه‌له‌ك پرۆژه‌یێن دیتر ڤه‌كه‌ت و تا حكومه‌ت چاكسازیێن جددی د هه‌موو بیاڤان دا نه‌كه‌ت ژ قه‌یرانا دارایی رزگار نابیت.
ل دوماهیكێ سه‌رۆكێ حكومه‌تێ نێچیرڤان بارزانی چه‌ندین جاران بزاڤكرینه‌ هه‌موو پارتێن سیاسی د ئێك ده‌نگ بن، به‌س مخابن نه‌ك ئێك ده‌نگ نه‌بووینه‌ به‌لكو گه‌له‌ك چووینه‌ به‌غدا و مه‌لاقی بۆ عه‌بادی كرینه‌ و گوتیێ مووچێن فه‌رمانبه‌رێن هه‌رێما كوردستانێ نه‌هنێره‌ و ئاسته‌نگ ل هه‌مبه‌ری حكومه‌تا هه‌رێما كوردستانێ دروستكرینه‌ لڤێره‌ پرسیارا سه‌ره‌كی ئه‌وه‌ ئه‌رێ دێ پرۆژه‌یاسایا چاكسازییێ ل په‌رله‌مانێ كوردستانێ د به‌رژه‌وه‌ندییا وه‌لاتییان دا ده‌رچیت یان نه‌.

© 2017 Hawler