تەمموز 19, 2019

رەمەزان نصرالدین كێڤلی

 

لێبورین ئێكە ژوان چەمكان كو زور دهێتە گوهلێبون و بكارئینان د بازنێ رەوشەنبیریا كومەلایەتی و ئایینی دا و رێزگرتن ل هزر و كریارێن كەسێ بەرامبەر دهێتە گرتن، نەخاسمە بەرامبەرێن جیاواز ژلایێ ئاینی و ئایدولوجی و نەتەوەیی ڤە، نەهێلانا وێ جیاوازیێ ب شێوەیەكی یە كو كاریگەریێ ل سەر پێكڤە ژیانا ئەوان پێكهاتێن جیاواز نەكەت، لدەمێ سەرهلدانا بزاڤا چاكسازیا (بروتستانتا) ل ئەوروپا ئەڤ چەمكە زور ب بەرفەرهی هاتە بەلافكرن تاكو چویە دناف ئەدبیاتێن سیاسی دا و ژ ئەوی دەمی تانوكە جەدەلەكا مەزن ل سەر هەیە چونكە بەشەك ژ توندرەوێن ئایینی و نەتەوەیی ئەڤی چەمكی ب دابەزینەك دبینن ل سەر بابەتێ پرەنسیپێن رەوشتی، دبینن كو ئەڤە كودەتایەكا سپی یە ل سەر كەلتور و داب و نەریتێن وان نەخاسمە دەمێ تو رێزێ ل هەمی كریارەكێ دگری د بازنێ لێبورینێ دا، ل سەر دەمێ (رومانی) یا گرنگی ب ئەڤی بابەتی هاتیە دان و ئێكەم كەسێ ئەڤ چەمكە ب فەرمی بكارئینای (باول لودكویك) بویە بەرامبەری جڤاتا (كونستانس/ ئێكە ژ جڤاتێن گرێدایی كەنیسا كاسولیكا ل ئەوی سەردەمی.
گومان تێدا نینە مە كوردان ب فەلسەفەكا باوەرپێكری ئەف چەمكە بكارئینایە هەر لسەر دەمێ شێخێ مەزن (عبدالسلام بارزانی) تاكو (شورەشا ئەیلولا مەزن) گرنگیەكا ئێك جار مەزن ب بابەتێ لێبورینێ هاتیە دان د پەرتوكا (بارزانی و بزاڤا رزگاری خوازا كوردی) یا بەرێز (مسعود بارزانی) دا و چەندین نمونە لسەر ئەڤی بابەتی هاتینە نڤیسین ژوانا دەمێ (بارزانی) چوینە د هەوارا (ئەرمەنیان) دیسان باس ل هەلویستەكێ نەڤیێن پاشایێن ئەرمەنیا دهێتە كرن دەمێ ل واشنتن هەڤدوو دبینن ئەوژی ب ئەڤی رەنگی بویە (د دەمێ خو دا پاشایێ ئەرمەنیا لدەف زاروكێن خو پەسنا رولێ بارزانیان كربو و پشتی كو بارزانیێ نەمر دهێتە رەوانەكرن بو (واشنتن) ب مەرەما چارەسەریێ ژ نیشكەكێ ڤە خێزانەكا ئەرمەنی دبینن و دان ستاندن دناڤبەرا وان دا دروست دبیت و نەڤیێن پاشایێن ئەرمەنیا پەسنا رولێ كوردان دكەن د پشتەڤانی كرنا ئەرمەنان دا و نوكە ژی ل كوردستانێ ئەرمەن شانازیێ ب هەمی ناسنامێن خو دبەن چ ئایینی یان نەتەوەیی بن و ڤەكرنا كەنیسا مەزن یا ئەرمەنیان ل هەرێما كوردستانێ نیشانەكا دی یا هەبونا لێبورینا ئاینی یە ل كوردستانێ كو خالەكا هەتا هەتایە مللەتێ كورد و سەركردایەتی و حكومەتێن كوردستانێ شانازیێ پێ دبەن.
گەلەك كوسپ و هەول دهێنە كرن ژلایێ گروپێن جودا جودا ڤە چ ئەو گروپ ئایینی بن یان سیاسی بو تێك دانا ئەڤێ لێبورینی دناڤبەرا پێكهاتێن جودا جودا ل كوردستانێ بەلام كەلتور و داب و نەریتێن مللەتێ كورد ژی رێكێ نادەنە ئەڤان توخمە گروپان كو هزرێن وان زال بن یان جێگیر بن ل شوینا هزرێن لێبورین و پێگڤە ژیانێ، گەلەك هەول هەنە ب رێكا راگەهاندنێ یان دروست كرنا حزبێن ئایینی پەنایێ دبەنە بەر ئامرازێن توندرەویێ بێی كو رەوشا ئەوان پێكهاتێن دی بەر چاڤ بهێتە وەربگرتن..
مە ل داهاتی پێویستی ب هندێ هەیە لسەر هەرسێ ئاستێن (سیاسی و جەماوەری و ئایینی) پتر گرنگیێ ب تێگەهێن (لێبورین – پێكڤە ژیان – ئاشتی –ئازادی) بدەین بو هندێ هەمی خەلك ل ئەڤێ هەرێمێ هەست ب هاولاتی بونا خو بكەت ئێزدی یان مەسیحی یان موسلمان یان هەر كەسەكێ دڤێت ل ناخێ خودا ئەو باوەری بو دروست بیت كو هاولاتیەكە و چ جوداهی دناڤبەرا وی و كەسەكێ دی دا نینە ل سەر بنەمایێ باوەری و ئاینی و سیاسی و نەتەوەیی و ئەڤە ل دەمێ بووری دا ئێك بویە ژ خالێن هێزێ بو حكومەتا هەرێما كوردستانێ كو زوربەیی لێقەومیێن پێكهاتێن دی ژ هەر دەڤەرەكێ دەڤەرەكێ قەستا كوردستانێ كرینە و كوردستان ب مال و ئارامگەها خو هژمارتی یە، ل دوماهیكێ دێ بێژین (بەلێ بو جڤاكەكێ ئارام كو لێبورین تێدا شەنگسە بیت بو ژیانێ).

© 2017 Hawler