ئەم پەڕەیە چاپ بکە

بەڵێندەر و فەرمانبەر پۆشمانی بێهنفرەهییا خوە نەبوون

دلۆڤان حەسەن

 

ژ سەرهلدانا "بوهارا ۱۹۹۱ تا ۲۰۱٤"ێ ب تایبەتی ژی چەند ساڵەكێن پشتی ژناڤبرنا رژێما بەعس، حكوومەتا هەرێمێ د وی ماوەیێ كورت دا پێنگاڤێن مەزن د بوارێ وەبەرهنێانێ دا هاڤێتن.
لێ پشتی هاتنا رێكخراوا تیرۆرستی و قەیرانا ئابوری بەر سینگێ حكوومەتا هەرێمێ گرتین.چاڤێ هەمی دوژمن و دۆستێن دوژمنان ل كەفتن و ژناڤچوونا كوردان بوو، ب هیڤیبوون كو ئەڤە دووماهیكا پێشكەفتن و ئارامییا كوردستانێ نێزیك بوو، خەون ب چۆك دانانا هەرێمێ ڤە د دیتن. چونكی ژ لایەكیڤە كوردستان د شەڕێ بەرەڤانیكرنێ دا بوو ل گەل "رێكخراوا تیرۆرستییا داعش" و ژلایەكی دیڤە هاتنا ژمارەیەكا مەزنا ئاوەرەیان بۆ بەر دەرازینكا دلۆڤانییا خەلك و سەركردایەتییا كوردستانێ، ئاستەنگێن هەرە مەزن بوون. سەرباری گڤاشتنێن وەڵاتێن هەڤسۆی و داكەفتنا بوهایێ نەفتێ، لەوما رۆژ ب رۆژ قەیرانا ئابووری دژوارتر دبوو. هەتا گەلەك لایەنێن كوردی ژی مینا دوژمنان بزاڤ دكرن بابەتێ مووچەی و ئاستەنگێن هەمبەر فەرمانبەران بكەنە رێك كو دووماهیێ ب بهێنفرەهییا وان بینن.لێ وەكی هەرجار خەلكێ هەرێمێ ب گشتی بێهنفرەهی ل سەر هەمی ئاستەنگ و نەخۆشییان كێشا، دلێ چ دوژمنان ب خوە خۆش نەكر. ژ بەركو پڕانی ب حكوومەتا خوە ب باوەربوون كو هەر دەمێ شەڕو ئالۆزی نەمینن و رەوشا ئابووری بەرەف پێش بچیت، حكوومەتا هەرێمێ ب تایبەتی ژی سەرۆكێ حكوومەتێ دێ ل سۆزێن خوە ب خودان دەركەڤیت. دیسان ژبلی فەرمانبەران، زەرەرمەندێن هەرە مەزن ژ قەیرانا دارایی بەڵێندەر بوون. ژبەركو پارەیێ پێدڤی ل بەردەستێ حكوومەتێ نەبوو كو بدەتە بەڵێندەران، بەڵێندەران ژی شیانێن ب دووماهیكئینانا پرۆژەیان نەمان، لەوما ژ سەرجەمێ ۳۰۰۰پرۆژەیان پڕانییا وان هاتنە راوەستاندن.لێ بەڵێندەر ژی مینا فەرمەنبەران ب حكوومەتا هەرێمێ و ب تایبەتی سەرۆكێ حكوومەتێ"نێچیرڤان بارزانی"ب باوەربوون.بێگۆمان مینا هەر جار سەرۆكێ حكوومەتێ ل سۆزێن خوە خودی دەركەفت.
پشتی هەمی شیانێن خوە یێن دبلۆماسی بكارئیناین و شیایی پەیوەندیێن د ناڤبەرا هەولێر و بەغدایێ تا رادەیەكێ باش ئاسایی بكەت، پەیوەندین كوردستانێ ل گەل وەڵاتێن زلهێز و هەڤسوی بەرەف پێش ببەت.دووماهیكهاتنا قەیرانێ ژی راگەهاند و بڕیارا ژ نەچاری یا پاشەكەفتكرنا مووچەی ژی هەڵوەشاند. بەڵێندەر ژی نەهاتنە پشتگۆهـ هاڤێتن، د پێنگاڤا ئێكێ دا ۱۰۰ملیۆن دۆلار بۆ بەڵێندەران هاتنە مەزاختن، دیسان بڕیارا ڤێ دووماهیێ ژی یا مەزاختنا ۱۰۰ملیۆن دۆلارێن دی بۆ بەڵێندەران، دێ بیتە پێنگاڤەكا باش و كاریگەر بۆ بۆژاندنا بازاڕی و لڤینەكا بهێز د وەبەرهێانێ دا و ئەو پرۆژێن ب نیڤ تمامی ماین دێ هێنە تمامكرن و دێ بیتە پێنگاڤەكا گرنگ كو بەڵێندەر بشێن هەڤڕكیێ بكەن بۆ جێبەجێكرنا هندەك پرۆژەیێن دی یێن د خێرا خەلكێ كوردستانێ دا".