ئاب 18, 2018

فێربوون و پیادەكردن وەك دوو چەمكی گرێدراو لەپرۆسەی پەروەردەدا

لەگەیاندنی پەیامی پەروەردەیدا دوو شاڕێگەی سەرەكی هەیە مامۆستا دەتوانێ بەو هۆیەوە پەرە بە بەهرە و تواناكانی خۆی بدات و حاڵەتەكە بۆ خوارەوە بەرەو ناخی قوتابی شۆڕ بكاتەوە، لەوەشدا یەك لەو كەناڵانە بەشێكی بۆ خۆیەتی و ئەویتریش بۆ خودی قوتابیان دەگەڕێتەوە، ئەوانیش:
1-فێربوون:
فێربوون وەكو چەمكێكی زانستی و پەروەردەیی هەرچیەكبێ شتێكی تیۆرییە و لە بنچینەدا تاقیكردنەوەی مومارەسەی خەڵكی ترە بەرەو دەرەنجام و نیشاندانی واقیع و تێگەیشتن لەڕاستی شتەكان، لەوەشدا مامۆستا شتەكان دەبیستێ و دەبینێ و دەیانخوێنێتەوە و لەڕێی ئەزموونی ئەم و ئەوەوە دەبێتەوە خودان ئەزموون(ئەزموون لەڕووی تیۆرییەوە.
1-پبادەكردن (مومارەسە)
هەرچەند لە دەستخستنی هەر ئەزموونێكدا تاقیكردنەوەی هزر و زەین و بیردانی خەڵكی تر زیاتر بزانێ ئەوەندە زیاتر لە پیادەكردنی ئیش و كارەكاندا سەركەوتوو دەبێت. وەلێ پیادەكردن بە تەنیا و لەولاوە فێربوون بەتەنیا بەهەر یەك لەم دوو چەمكە مامۆستا پێ دەگات و تێ دەگات، وەلێ جیاوازی هەریەكەیان لەوەدا بەرجەستە دەبێت كە فێربوون و ڕۆشنبیری بەتەنها مامۆستای تیۆری لێ دروست دەكات كە لە پیادەكردنیدا مەرج نیە كەسێكی سەركەوتووی لێ دەرچێ، بەهەمان شێوە بۆ پیادەكردنیش بەتەنها مەرج نیە مامۆستایەكی وای لێ بەرهەم بێ بتوانێ ئیش و كارەكانی بەتەواوی جێ بەجێ بكات وەئەگەرنا بۆی هەیە ڕووتەنێ بەشێوەیەكی سنووردار ئیش و كارەكانی ڕابپەڕێنێت

.
كەواتە فێربوون و مومارەسەكردن وەكو دوو ڕووی دراوێكن بۆ زامن و دەستنیشانكردنی مامۆستای سەركەوتوو، بەواتایەكی دیكە كاتێك مامۆستا بە كردەوە پیادەی ئیش و كارەكانی دەكات ئەوا لە سەركەوتن و ژێركەوتنی خۆیەوە فێردەبێ و دەزانێ هەموو كردارێك لەشتی تیۆری سەخت و دژوارترە، بۆ نموونە ئەو شتەی بەپێنج دەقە دەیخوێنێتەوە ڕەنگە بە كردەوە لەڕووی مومارەسەوە نەتوانێ بە سەعاتێك جێ بەجێی بكات، لەوەشدا بڕوا و متمانە بەخۆبوونی مامۆستا پێوەرێكی گرنگە تا لە دومایی ئەنجامەكان نەترسێ لە كاتێكدا كەس لەئێمە ناتوانێ ئەگەر ئەركێكی بەیەكێك سپارد لەسەدا سەد مسۆگەری ئەوە بكات تیایدا سەركەوتوو دەبێت، خۆ ئەگەر شەست لەسەدا بوو ئەوە بۆ ئەو قۆناغە سەكەوتنی بەدەست هێناوە.
مامۆستا لە شكست و سەرنەكەوتن دا دەبێ هەوڵ بۆ هەستانەوە بدات و لەلایەن سەرپەرشتیاری پەروەردەییەوە وەكو ڕوانگەی ئاڕاستەكردن دەلوێ بەدواداچوون بۆ گرفت و ئاستەنگەكانی بكات و لەنزیكەوە وێڕای دەستخستنە سەر زامی گرفت و دەست نیشانكردنی هەڵەكە، بەشێنەیی ڕێنوێنی ڕێی ڕاستی نیشان بدات وەكو دۆستی ڕەخنەگر لەپێش چاوی قوتابیان نەیشكێنێتەوە و ڕەخنەی لێ نەگرێ و هاوڕێ ئاسا بەو ڕوحیەتەوە بیدوێنێ و هاوكاربێ بەكڵۆجێ متمانە و باوەڕ بەخۆبوونی بۆ بگەڕێنێتەوە.
مرۆڤ هەمیشە پێویستی بە ڕۆشنبیری و فێربوونی زانستی هاوچەرخ هەیە تا لەڕووی پەیداكردنی ئەزموونەوە هەنگاو بۆ پڕاكتیزەكردن و پیادەكردنی گواستنەوەی ئەو شتانە بكات كە فێریان بووە، ئەوەش پەیامێكە دەبێ هەموو مامۆستایەك لە ژیانی ڕۆژانەی خۆیدا بایەخی پێ بدات و ڕەنگدانەوەی لەسەر ڕەفتار و هەڵسوكەوەكانی جێ بێڵێ، ئەوەش پرۆسەیەكە بەهەماهەنگی سەرپەرشیار و دەستەی كارگێری قوتابخانە و ناوەندەكانی ڕۆشنبیری ئامانجی ڕاستەقینەی خۆی دەپێكێ.
بۆ ئەوەی مامۆستا ببینە پێشەنگ و نموونەی كەسایەتیەكی سەركەوتوو دەبێ شت فێرببین و پەرە بە ئاستی ڕۆشنبیریمان بدەین تا لەو هەگبەیەی دەستمان دەكەوێ بتوانین بەجوانی مومارەسەی پیشەكەمان بكەین

 

شاخەوان عەلی حەمەد مامۆكی
.

© 2017 Hawler

Please publish modules in offcanvas position.