نیسان 26, 2018

عومەری چنگیانی

 

ئەم جیهانی "سۆشیاڵ‌میدیا"یەی بە باش و خراپیەوە هەموومانی بە خۆیەوە سەرقاڵ كردووە، زۆر شت لەخۆ دەگرێت و مەرج نیە هەرچی گوترا خراپ بێت، یان باش، جا یەكێك لە خراپیەكانی ئەو بەدەم خەڵكەوە گوتنە و ئەو دزییە بێسنوورە بەربڵاوەیەتی كە هەركەس چی بیەوێت بە دەم كێوە بیڵێ دەیڵێ و، چ شتێكی كێی بوێ دەیكاتە زادی بیری خۆی و پاشاگەردانیەكە نە سەری دیارە نە بنی، دۆستێك لە ڕێگای نامەی "واتساپ"ـەوە نامەیەكی وەرگیراوی عەرەبی بۆ ناردم و نە ئەو باسی كردووە قسەی كێیە و نە منیش دەزانم ـ باوەڕ ناكەم زۆریش لێی تێگەیشتبێت ـ بەڵام من سپاسم كرد و وێنەیەكی "دەست"ـەكەم بۆ نارد كە هێمای دەستخۆشیە و هەمووان پێی فێرین و نازانین لە كوێدا بەكاری دێنین، بە هەرحاڵ زۆربەیم هێندە بەدڵ و بە لاوە ڕاست بوو نەمتوانی نەیكەمەوە كوردی و، نەیخەمە بەر دیدی ئێوەی بەڕێز و گۆمەكەی پێ نەشڵەقێنم. نامەكە بەو ناونیشانەی سەرەوە دەست پێدەكات و دەڵێ: "گەلانی دووڕوو لە خنكان ڕزگاریان نابێت!"
دووڕوویی ئەوەیە كە شكستەكانمان بەوە پاساو بدەینەوە كە دوورین لە خواوە؛ کەچی کەم نەتەوە و گەل و کۆمەڵی ئەم دنیایە هەنە بەقەدەر ئێمەومانان بڕوایان بە خوا هەبێ و بیپەرستن.
دووڕوویی ئەوەتانێ بڵێین بۆیە دەشکێین کە ئافرەتمان ڕووتوقووتن؛ کەچی ژن و ئافرەتی کەم ناوچەی دنیا، هێندەی ئافرەتی لای خۆمان سەرپۆشتە و داپۆشراون.
دووڕوویی ئەوەسانێ وا بزانین ناخۆشی و ژیانی چەرمەسەریمان هی ئەوەیە خوا لێمان تووڕەیە؛ كە بەپێی ئەم بۆچوونە بێت، دەبێ بڵێین: هۆكاری برەو و پێشكەوتنی ئەمریكا و بەهێزیی ئەوروپا لەبەر ئەوەیە كە خوا لێیان ڕازییە و هەر بۆ ئەوەیشە نازونیعمەت دەڕێژێت بەسەریاندا.
دووڕوویی ئەوەسە كە بزانی بە پێی ئامار و ژمارە و دیاریكردنی دروست كۆمەڵگەكانی خۆیان وا دیار دەخەن كە ئاییندار و خواناسن، لە هەموو شوێن گەندەڵترن لە ڕووی كارگێڕییەوە و، لە هیچکوێی دنیادا لە بە ناو دادگادا ئەوەندە بەرتیل ناخۆری و، لە سیاسەتی هیچکوێی ئەم دنیادیەدا هێندە درۆ ناکەن و درۆزنی تێدا نیە؛ پێشێلكردنی مافی منداڵان و گێچەڵكردن بە ئافرەت و بگرە لاقەكردنیش ئەوەندەی لای ئەوانە زۆر نیە وا دەڵێن هۆكاری بەدڕەوشتی، ئەوەیە بە ئایینەوە پابەند نینە! ئای لەو شەرمەزارییە.
دووڕوویی ئەوەیە ببینی لە ئەفغانستان و پاكستان ڕێژەی گێچەڵكردن بە ژنان لە سەدا نەوەد زیاترە و پاشان بڵێیت بەهۆی نەپۆشتەیی و سەرکۆتیەوەیە ئافرەت تووشی گێچەڵ دەبێت!
لەو دووڕووییە خراپتر نیە داوای جێبەجێكردنی شەریعەتی ئیسلام بكەیت لە وڵاتی خۆت و، بە خۆیشت كۆچ بكەیت و بچی لە وڵاتێكی عەلمانیدا بژیت!
لەوە بێبەهاتر نیە كە داوای زیادكرنی وانەی پەروەردەی ئیسلامی بكەیت و منداڵەكانی خۆت بنێریت بۆ قوتابخانەی فەرەنسی و بەریتانی و ئەمریكی و، هتد!
ئای لەو بێقمەتیەی وەخت و ناوەخت بچی ئاڵای ئەمریكا بسووتێنی و، سەرە بگریت بۆ دیدارێکی باڵوێزخانە و كونسوڵخانەكانی ئەو وڵاتە بەشکەم ڤیزەیەکی سەردانی ئەمەریکات وەچنگ بكەوێت.
دووڕوویی ئەوەیە لەكاتێكدا خۆشحاڵی دەردەبڕیت بەوەی كە مزگەوتی گەورە گەورە لە شار و پایاتەختەكانی وەك نیۆیۆرك و وڵاتانی تر دەكرێتەوە و خۆشحاڵبیت بەوەی كە دەبینی لاوێك، كیژێكی ئەورووپایی بە زمانەلاڵەیەكەوە لە دوای مەلایەكەوە شایەتمان دێنێ و نەڵێی ئەمە دەگەڕێتەوە بۆ ئازادی تاك لەو شوێنانە و بەهەندگرتنی بەهای مافی مرۆڤە و بەڵگەی ئازادیی بیروڕا و ئایین هەڵبژاردنە لایان، كەچی لە هەمان كاتدا ئەگەر بینیت "كەشیش"ێك لە "كڵێسا"یەكدا مەسیحییەت دەدات بەگوێی مسوڵمانێكدا، دنیا پڕكەیت لە قیڕە و هاوار و بڵێی موئامەرە و پیلان و پلانێكی پێشوەختەیە دژی ئیسلام و مسوڵمانان.
دووڕوویی ئەوەیە هیچ بەها و بایەخێك نەدەیت بە گەندەڵی بەرتیلخۆری و دادگای پڕ لە ستەم و بێداد و لە باج و سەرانە خۆدزینەوەی دەستڕۆیشتووەكان و ساغكردنەوەی ماڵی دزراوی خەڵك و فرۆشتن و هاوردەكردنی شتومەك و كاڵای خراپ و پەیرە (ماوەبەسەرچووگ) و بەنگەمەنی‌فرۆشی و ئاسانكاری بۆیان و، دەیان بازاڕ و شوێنی فرۆشتنی چەكوتەقەمەنی، كەچی دنیا بێنیتەوەیەك لە تابلۆی هونەرمەندێك ئەگەر ماچێكی تێدا بێت یان خانمێك كەمێك تەنوورەكەی كورت بێت.
دووڕوویی ئەوەیە كە بە ڕاستە و بە چەپەدا نازناو و سیفەتی شەهید ببەخشیتەوە بەسەر ئەوانەدا كە ئاشۆ و ئاژاوەی هۆزهۆزانێیان لە وڵاتدا بڵاو دەكردەوە و بەر لەەوەی تێدا بچن بۆ داكۆكی لە گەندەڵی و پیسیەكانی خۆیان هەندێك دروشم بڵێنەوە و لە بیرت بچێتەوە كە ئەوان بوونە هۆكاری ئەم هەموو ماڵوێرانیەی گەلانی ناوچەكە؛ قەزافی و سەدام و هاوشێوەكانیان وەك نموونە.
دووڕوویی ئەوەیە كە ببینی ئەنگڵا مێرکڵ خەڵكەكەی خۆی بەختەوەر دەكا و ترێزا مەی، سەرۆكایەتیی حكوومەتی بەریتانیا دەكا و زۆرێك لەوخانمانە ببینی كە حوكمی جیهان دەكەن لە ئەوروپا و ئەمریكای باكوور و باشوور و ئوستورالیا و ڕۆژهەڵاتی ئاسیا و ئەفریقیا سندوقی دراوی جیهانی و دادگای دادپەروەریی نێودەوڵەتی و ڕێكخراوەكانی نەتەوە یەكگرتووەكان و خانمان سەرۆكارییان دەكەن و وەزیری جەنگ و بەرهەڵستكاری لە نەرویج و سوید و هۆڵەندا و ئەڵمانیا و ئەسپانیا و یابان ببینی كە خانمن و هێشتا بڵێی ژن بەكەڵكی بەڕێوەبردنی كاری گرنگ و گشتی نایەت.
دووڕوویی واتە هەموو ژنی دنیا بە نوقسان‌ئەقڵ و كەمهۆش و كەمدین تێبگەیت و بڵێی ئەوان گوریسی شەیتانن و عەورەتن بەدەر لە دایكت نەبێ كە بەهەشت وا لەژێر پێیدا.
دووڕوویی و دۆزەخ ئەوەیە كە لەوە تێنەگەیت كە هۆكاری دواكەوتن بە هۆی دووری لە دینەوە نیە، ئاخر نەتەوە و گەلە بێبڕواكان ئایینیان نیە؛ دەستمان بە هۆكارەكانی پێشكەوتنەوەوە نەگرتووە بۆیە دواکەوتووینە؛ حكوومەتەكانمان گەندەڵن بۆیە داڕووخاوین؛ نەزان و بێزانستین بۆیە دوا دەکەوین؛ شەرمەزاریە گەرە گەورەکەیش ئەوەیە وا دەزانین لە خۆمان بترازێ دنیا چاكی تێدا نیە!
دەی ئەگەر كافرێك و بڕوادارێك كەوتنە دەریایەكەوە مەلەوانەكەیە ڕزگاری دەبێت....
ئەوە وەرگێڕانی ئەو نامەیە بوو چەندیم بەدڵە و چەندی جێگای دانووسان و قسە لەسەركردنە؟

© 2017 Hawler

Please publish modules in offcanvas position.