ئازار 22, 2019

جنێودەرەكان و رێككەوتنی حیزبەكان

شاخەوان برایم عەبدوڵڵا

 

لە دوای رێككەوتنی پارتی و گۆڕان، پارتی و یەكێتی، ئیدی جۆرێك ئارامی لەسەر ئاستیی كوردستان هەستی پێدەكرێت و دەكرێ وەك خاڵێكی دیكەی گرنگی ئەو رێككەوتننانە سەیری بكرێت و پێویستیشە رێككەوتنەكان فراوانتریش بكرێن بۆ ئەوەی هەموو حیزبەكان بگرێتەوە، بەو ئامانجەی خزمەتكردنی میللەت خاڵی ركابەرێتی نێوانیان بێت.
ئەوەی لە رابردوودا بەهۆی ئاڵۆزییەكانەوە زیانی بەركەوت، تەنیا میللەت و خەڵكە هەژارەكە و ئەزموونی سادەی دیموكراسیی هەرێمی كوردستان بوو، بە شێوەیەك ئەندامان و نووسەران و بەناو كەسانی سەربەخۆ بۆ ئاڵۆزتركردنی رەوشەكە هەرچی بۆیان كرا و توانیان بیڵێن، درێغیان نەكرد تا رەوشە ئاڵۆزەكە ئاڵۆزتر بكەن و ئێستاش وەك توتی بە دوای پۆست و ئیمتیازاتەوە تا لە كابینەی حكوومەتی نوێ چنگیان بكەوێت لە كاتێكدا زۆربەیان پێشتر بە قسە هەوڵی رووخاندنی حكوومەت و تەسلیمكردنەوەیان بە عەبادی دەدا، كەچی ئێستا خەریكی وەرگرتنی پۆستن و وەریشی دەگرن!
خاڵێكی دیكەی گرنگیش بەهۆی ئەو رێككەوتنەوە زۆربەی ئەوانەی خەریكی جنێودان و تەشهیر و قسەی زبر و بێ مانا و ماستاوچێتیی بوون، چەند هەفتەیەكە قسەیان بۆ گوتن نەماوە، بەپێچەوانەی جارانەوە كە لە پەنای بەرگی نووسەربوون و چالاكوانی مەدەنی و سۆشیاڵ میدیایەوە، ژەهری رق و كینەی حیزبیان دەڕشت و بەهۆیەوەش لای مەسئول و حیزبی كوردییەوە ئیمتیازات و دەستكەوتی ماددی باشیشیان بۆ دەبڕایەوە و هەندێكیشیان سوودمەندی سەفەری دەرەوەی وڵاتن و پۆستە حیزبییەكانیش بوون و دەبن، ئەوە پارە و راوە كچ هەر باس ناكەم!
بەڵێ، زۆرێك لەوانە (هەڵبەت مەبەستم هەموویان نییە لە دڵسۆزییەوە رەنگە هەندێجار بە هەڵچوونەوە قسەیان كردبێت)، بەڵام زۆرینەیان تەنێ بۆ ئەوەی جنێودەری باش بن، باكیان بەوە نەبوو ئەزموونەكە یەكجار ئاڵۆز بكەن، چونكە نان و گان و پۆستیان لەو ئاڵۆزییانە بوو! دەی ئەو جۆرە كەسانە لە ئاشتەواییدا خاوەنی قسە و رەئی نین، چونكە خاوەنی زاكیرەیەكی بیركەرەوە نین و وەك تووتی قسەی خەڵكی دیكە و بەشێوەی ئاڕاستەكراو دەڵێنەوە.
حیزبی كوردی ئەگەر بیەوێت گەشە بە دیموكراسییەت و ئایندەی خۆی بدات و میللەتیش ئاشت بكاتەوە، پێویستی بە ماكینەی جنێودەر و ماستاوچییەكان نییە، بەهۆی ئەوەی ئاییندەی ئەو جۆرە رەفتار و گوتارە جگە لە شەرمەزاری بۆ خاوەنەكانیان و شكستیش بۆ حیزب، هیچ بەرهەمێكی دیكەی نابێت، تۆ وەك نووسەر و شیكەرەوەیەك دەكرێ هەندێجار لە گوتار و بۆچوونەكاندا توند بیت و بەرگریی لە باوەڕی خۆتیش و پرەنسیپە نیشتمانییەكان بكەیت، بەڵام هەرگیز جنێو و ئەو رەفتارەی لە پێشتردا بایەخی پێدرا، سوودی بۆ حیزب و پێشكەوتنی كۆمەڵگە نابێت، بەڵام ئەوەی من دركم پێی كردووە حیزبی كوردیش ئەو جۆرە كەسە جنێودەر و ماستاوچییانەی دەوێت، كە ئامادەن لە پێناوی پارە و ئیمتیازات هەر رۆژەی بەجۆرێك وەك تووتی قسە بكەن و لە باوەڕ و مەبدەئی خۆیان لابدەن، تەنێ بۆ ئەوەی سوودمەندی ماددی و پۆست بن كە نموونەی زۆرمان بینیوە و هیتریش دەبینین!
كەوایە باشی رێككەوتنەكان لەوەدایە هەم میللەت مێشكی پشوو دەدات، هەمیش ئەو جۆرە جنێودەر و ماستاوچییانە بیانووێكیان بۆ نامێنێتەوە تا لە رێیەوە جنێو و رشتنی ژەهر بە ناوی نووسین و شیكردنەوە و كاری حیزبایەتی بە كۆمەڵگەدا بڵاو بكەنەوە، لە كاتێكدا كاری حیزبایەتی مۆدێلێكی بایەخداری ئێستای كۆمەڵگە پێشكەوتووەكانە و میللەتانیش لە سایەی دیموكراسییەتی حیزبەكان و ركابەرێتی شەریفانەی حیزبی، رۆژ دوای رۆژ زیاتر پێشدەكەون، بە پێچەوانەی ئەو مۆدێلەی كوردستان.

© 2017 Hawler