کانونی یەکەم 12, 2019

شێرزاد عەبدولڕەحمان

 

• دەمامك، ئەو قیناعەیە، كە زۆربەمان ڕووی ڕاستەقینەی خۆمانی پێ دەشارینەوە، چونكە ترسێكی گەورەمان لەوەیە، كە بەبێ قیناع خەڵك بە حەقیقەتی خۆی بمانبینێت...بەتایبەتی كاتێك قیناعێكی جوانمان لەبەركرد، كەچی لە ناواخندا زۆر ناشیرین بووین، بۆ شاردنەوەی ڕووی ناشیرین هەوڵی بە دەمامك كردنی خۆمان دەدەین و بە هەزار و یەك شێوە هەوڵ دەدەین، كە ئەو دەم و چاوە بشارینەوە!.
• ژیانمان پڕە لە دەمامك، بڕوامان زۆرە بە زەردەخەنەی درۆزنانە و بە ڕووكەش پێدەكەنین و بە ڕووی یەكتردا تێر دەبین لە زەردەخە، كەچی لە ناخی خۆماندا سەرقاڵی تۆڵەسەندنەوەین...پەیامی لێبوردەیی دەكەینە دروشمی ڕۆژانە، كەچی ناخمان پڕە لە ڕق و كینە و تێرنابین لە هەوڵی لە باربردنی یەكتر.
• ژیان پڕ دەكەین لە مانای دیموكراسیەت، كەچی ئامادەنین گوێ لە بچووكترین ڕای هاوكارێكی خۆمان بگرین و زۆرجار لەسەر ڕایەكی موخالیف لەگەڵ ئێمە، ئەوەی بەرامبەرمان بۆ ئەبەدی ڕەش دەكەینەوە...
• باس لە زەروورەتی پشكداریی ژن دەكەین، لە هەموو كایەكانی ژیان و دەنووسین ژیان بێ ژن تاوانە...كەچی، ڕێگە نادەین كچێك یان ژنەكانمان بەشداری بینینی شانۆگەرییەك بێت..چونكە دوو قیناعمان هەیە، یەكێكیان پیاوێكی مۆدێرنیزم و نوێخواز، ئەوەی دووەمیان كابووسی ماڵێك، كە جەلادێكی بۆ پیاوسالاریی و كارەساتیش لەوەدایە، ئەمە قیناعی زۆر لە نووسەر و ڕووناكبیرانە، كە زیاد لە خەڵكی دیكە ژن دەستەمۆ دەكەن و دەیكەنە مۆمیا و مەرگی نیشان دەدەن!.
• دیمەنەكانی دەمامك زۆرن.. لەوانەیش ژوورەكان پڕ دەكەین لە ڕق ...باسی یەكسانی و دادپەروەریی ڕەها دەكەین و كە بوونیشی بە بچووكترین بەرپرس، ڕابردوو لەبیر دەكەین و قێزمان لەوە دەبێتەوە كە چەند دەقیقەیەك لە وەختی خۆمان بۆ گوێگرتن لە خەمی مرۆڤێك تەرخان بكەین.

 

© 2017 Hawler