تەمموز 23, 2018

ئەم عەبادییە سەری خۆی دەخوات

ئاریان فەرەج

 

لەوە گەڕێن عەببادی و نەدیتكەكانی دیكەی بەدەسەڵات گەیشتووی بەغدا، هیچ دەرسێكیان لە مێژووی دور و نزیكی عێراق هەڵنەكراندووە، هیچ عیبرەتێك فێرنەبوون كە دژایەتی كورد و ئینكاری مافە رەواكانی، بۆ هیچ دەسەڵاتێكی لەمان بەهیزتر نەچووەتە سەر تا بۆ ئەمانی تازە هەڵتۆقیوی لاواز بچێتەسەر، لەوەش حاڵی نەبوون كە جەوهەری گرفتی عێراق و هۆكاری هەرە بنەڕەتیی بە ئیستقرار نەگەیشتنی، نكۆڵی لە كورد و مافی كورد و هەوڵە نەزۆكەكانی سەركوتكردنی میللەتێكە كە بە هیچ كلۆجێك دەست لە ناسنامە و ماف و وجودی خۆی هەڵناگرێ و تەسلیم نابێت. هەتا ئەم فەرهەنگە بەسەرچوو و بێ فایدەیەش نەپێچرێتەوە، مەحاڵە عێراق ببێتە ووڵات و كەمترین سەقامگیری تێدا بەرقەرار بێت.
كێشەی گەورەتری عەببادی ئەوەیە كە بە وەهمەكانی خۆی باوەڕی هێناوە و لێی بووە بە راست كە گوایە شكستی بە كورد هێناوە. توشی زڕە خەونێك بووە كە گوایە ئەوەی لە سەد ساڵی رابردودا هیچ دیكتاتۆر و دەسەڵاتێكی ملهوڕ و فاشی لە عێراقدا نەیتوانیوە بیكات، ئەم ئەنجامی داوە و كوردی بە چۆكدا هێناوە. ئەم بوغرابوون و لەخۆ گۆڕان و سەرلێشێوانە، عەببادی بەو جێگەیە گەیاندووە تەنانەت لە نێو ئەقران و هاومەزهەبەكانی خۆشیدا خۆی لێ ببێتە قائیدی زەرورە و قاهری ئەكراد و بەدیهێنەری مەحاڵ و پێی وایە ئیدی نابێت كەس شان لە شانی بدات و كەس بیر لە جێگرتنەوە و كێبەركێی بكاتەوە.
ئەم پیاوە كە سێبەرەكەی خۆی لێ گەورە بووە، جڵەوی بۆ خەونە نەخۆشەكانی شل كردووە و خەرێكە نەزانێت تەنانەت لە بندەستی خۆی چی دەگوزەرێ و چۆن دانی لێ جێر دەكرێتەوە و چۆن چاڵی قوڵی بۆ هەڵدەكەنرێ. بوغرایی بەو ئاستەی گەیاندووە كە پێی وابێت دەتوانێ لە یەك كاتدا هەموو سەرە داوەكان پێكەوە بگرێ و هێزە جیهانی و ئیقلیمییەكان وەك یەك بكاتە پشتیوانی خۆی و گرەو لە هەموان بباتەوە و كڵاو لەسەری هەموو لایەك بنێ.
پێداگریی ئەم سیاسییە كەم تەجروبەیە لەسەر دژایەتی بێ بەهانەی كوردستان و بێ منەتی بەرامبەر فشارە نێودەوڵەتییەكان و تەنانەت بێ منەتی بەرامبەر مونافیسە هاوكوف و هاومەزهەبەكانی، دواجار دەیگەیەنێ بە تەنیایی، ئەو تەنیاییەی خەڵكی پێش ئەم تاڵییەكەیان نۆشی و تەختی دەسەلاتی بەغدایان بە هۆیەوە لەدەستدا و بەڵام عەببادی هیچ عیبرەتێكی لێ وەرنەگرت.
پێش ریفراندۆم، هەموو فشارەكان لە سەر كوردستان بوون، سیاسەتی حەكیمانەی حكومەتی هەرێم بە چەند مانگێك هاوكێشەكەی هەڵگێرایەوە و ئێستا هەموو فشارەكان لەسەر بەغدان. كەسێك لەم گۆڕانكارییە جەوهەرییە تێنەگات یاخود نادیدەی بگرێ، دیارە هێندە لە سیساسەت حاڵی نییە كە چانسی گەورە و مسۆگەری لە پێش بێت.

© 2017 Hawler

Please publish modules in offcanvas position.