شوبات 19, 2018

زكری موسا

 

عەبادی لە چوارچێوەی پلانی لاوازكردنی كوردستان یاری بە كات دەكات، بەڵێن دەدات، درۆ دەكات، بیانوو دەهێنێتەوە. ئەو پلانە نوێ نییە، كاتی خۆی مالیكیش وای دەكرد، بەڵام هاتنی داعش ئەو پلانە گشتی و ستراتیژییەی حزبی دەعوە و عەرەبە شیعەكانی دوا خست.
ڕیفراندۆمیش نەكرابا، ئەم یارییە ناڕەوایە بەردەوام دەبوو. هۆكارەكەی زۆر سادەیە، عەقلیەتی بەرانبەر عەقلیەتێك نییە شەراكەت و دەستووری لا پەسەند بێت.
بەشداری هەڵبژاردن ببین یان نەبین ئەم ڕەوشە بەردەوامە چونكە سیستەمی سیاسیی عێراق لە بەرژەوەندیی عەەبی شیعە دیزاین كراوە و لەبری فیدرالی و دەستوور تەنیا لۆژیكی زۆرینە و فەتوا و خۆسەپاندن و فرتوفێڵ دەیخوات.
هەموومان ببین بە ئاڵا و ئارام و عێراقچییە كوردەكانی تر و ببین بە تاقمی 16ـی ئۆكتۆبەر، هەموومان ببین بە جاش هەمدیسان چارە نییە و ئەم پلانە هەر درێژەی دەبێت.
وردەوردە بۆ هەموو لایەك دەركەوتووە كە ڕیفراندۆم چەندە ئەكتێكی ڕەوا و لەشوێن خۆی بووە. ئێستا گەلی كوردستان لەبەرانبەر عێراقدا تەنیا ڕیفراندۆمی هەیە كە ناكرێ موناقەشەی لەسەردا بكرێ چونكە دەنگی گەلە.
حەقیقەتی سەرەكی دەنگی 93%ـی گەلی كوردستانە كە نایەوێت لەگەڵ عێراقدا بژیێت. حەقیقەتی كەركووك داگیركاری نییە، وێنەی ڕاستەقینەی كەركووك دەنگی 95%ـی خەڵكی ئەو شارەیە كە نایەوێ لەگەڵ عێراقدا بمێنێتەوە.
لەبەرانبەر تەوژمی پڕ لە فرتوفێلی عەرەبی شیعەی دەستەڵاتداردا دەبێ سیاسییە كوردستانییەكان بە جاش و عێراقچییەكانیش بگەڕێینەوە بۆ ویستی گەلەكەمان و لە پشت گەل بن و گەل لە پشتیان بێت. دەبێ هەموویان یەك دەنگ بن چونكە تاكە كەلێن كە بەغدا و داگیركارەكانی تر توانیان پلانەكانیان لە دژی خەڵكی كوردستان بچەسپێنن، دووبەرەكی و پەرتەوازەیی سیاسییەكانی كوردستانە.
هەموو هێزە كوردستانییەكان دەبێ مشوریی ئەوە بخۆن كە چیتر چاویان لە بەغدا نەبێت، تەنانەت عێراقچییەكانیش، خۆبادان و لووسكەیی و خاكفرۆشی و بێگانەدۆستی دادیان نادات. مەرد بن وڵاتی خۆتان بوێت و یەكبگرن و وەك دوژمن ژیرانە و ستراتیجی بیر بكەنەوە.

© 2017 Hawler

Please publish modules in offcanvas position.