تشرینی دووەم 16, 2018

هەڕەشەکانی داعش لەسەر عێراق سەرهەڵدەدەنەوە

لەو ماوەیەدا جوڵەکانی داعش لەسەر سنورەکانی عێراق و سووریا زیاتربوون، هاوکات لەهەندێک ناوچەی ناوخۆی عێراقیش چالاکی چەکداریان دەستپێکردۆتەوە، شارەزاییان هۆشداری دەدەن لەو ڕەوشە و بەمەترسی ناودەبەن لەسەر دواڕۆژی سەقامگیری و ئاسایشی ناوچەکە.

بەگوێرەی ڕاپۆرتێکی (ئێن‌بی‌سی نیوز) لەسووریاوە جارێکی دیکە داعش مەترسی دروستدەکاتەوە بۆ سەر عێراق، هەروەک ئەو مەترسیەی لەساڵی (٢٠١٤) ەدا دروستبوو و چوار ساڵی ڕێک شەڕ و وێرانکاریان هێنایە ناوچەکەوە.
لەحەفتەی ڕابردوودا عێراق نزیکەی (٣٠ هەزار) سەربازی بەناوچەکانی سنوری لای ڕۆژئاوای عێراقدا بڵاوکردۆتەوە کە دەکەوێتە سنوری نێوان عێراق و سووریا، لەو ناوچەیەدا لەدیوی سووریا داعش جوڵە و چالاکی چەکداری هەیە و مەترسی هەیە لەوێوە دزەبکەن بۆ ناو خاکی عێراق.
بەپێی ڕاپۆرتەکە ئەو هێزانە لەدوو لیوای عێراقی و چەند هێزێکی حەشدی شەعبی پێکهاتوون، ئەو دوو لیوایە نزیکەی (٣ بۆ ٥ هەزار) سەربازیان لەخۆگرتوە، وە ئامانج لەبڵاوەپێکردنی ئەو هێزانە دابینکردنی ئاسایش و سەقامگیری سنوریە و ڕێگاگرتنە لەپەڕینەوەی چەکدارەکانی داعش بۆ عێراق.
هێزەکانی حەشدی شەعبیش لەوێ بڵاوەیان پێکراوە، بەپێی بڵاوکراوەی حەشدی شەعبی نزیکەی (٢٠ هەزار) چەکداریان بەو سنورانەدا بڵاوەکردۆتەوە.
هەندێک لەو ناوچانەی لای ڕۆژئاوای عێراق و هەروەها بەدیوی سووریاشدا تازە لەژێردەستی داعش ڕزگارکراون، وە بەشێکی دیکەی ئەو ناوچانەی ڕۆژئاوای (ئەنبار) لەعێراق هێشتا ماڵی زۆربەی چەکدارە توندڕەوەکانە و بەشێکی ئەو ناوچانە لەژێر کۆنتڕۆڵی عێراقدا نین، عێراق ترسی هەیە هاوشێوەی ساڵی (٢٠١٤) جارێکی دیکە ئەو ناوچانەی بکەونەوە بەر مەترسی چەکدارە توندڕەوەکان و داعش و هەروەها هاوشێوەکانی.
هەبوونی پێکدادانی بەردەوام لەو ناوچانەی ڕۆژئاوای عێراق و لەسووریا نیشاندانی بەردەوامی هەڕەشەکانی داعشە لەسەر ئەو ناوچانە، ئەوە لەکاتێکدایە کە چەندین مانگ دەبێ دەسەڵاتدارانی هەردوو دیو شکستی داعش و سەرکەوتنیان بەسەر ئەو گروپە تیرۆریستیەدا ڕاگەیاند.
هەر لەبارەی هەڕەشەکانی داعش لەسەر عێراق، (هیشام ئەلهاشمی) شارەزا لەسەر داعش و، ڕاوێژکاری حکومەتی عێراقی گوتی، ئەو شێوە چەکدارییە و چالاکیانەی گروپە توندڕەوەکان کە لەئێستادا هەیانە هاوشێوەی ساڵی (٢٠١٠) یە، سەرەڕای ئەوەی کە لەئێستادا ناوچەکانیان لەدەستداوە، بەڵام هێشتا ڕێگایەکی دووری شەڕکردنیان پێ ماوە.
لەمانگی ئابی ڕابردوو، نەتەوە یەکگرتوەکانی ڕاپۆرتێکیان لەسەر ژمارەی چەکدارەکانی داعش بڵاوکردەوە، بەپێی ئەو ڕاپۆرتە داعش نزیکەی (٣٠ هەزار) چەکداری بڵاوکردۆتەوە بەشێوەیەکی یەکسان بەسەر سووریا و عێراقدا، هەروەها لەڕاپۆرتەکەیاندا ئەوەش هاتوە کە داعش تۆڕێکی تیرۆریستی گلۆباڵیە و، هەڕەشەکانیان لەزیادبوندان.
شیاوی باسکردنە، هەڕەشەکانی داعش خەریکە سەرهەڵدەدەنەوە و، بەرەو زیادبونن وە بەشێکی ناوچەکانی عێراق و سووریا هێشتا لەبەردەم ئەو مەترسیانە ڕزگاریان نەبوە.
نزیکەی ساڵێک لەمەوبەر، (حەیدەر عەبادی) سەرۆکوەزیرانی پێشوی عێراق سەرکەوتنی کۆتایی بەسەر داعشدا لەعێراق ڕاگەیاند بەڵام هەر ئەو کاتە ڕاپۆرتە نێودەوڵەتیەکان وێڕای بایەخ و گرنگی ئەو سەرکەوتنە هۆشداریشیاندا لەمانەوەی هەڕەشەکانی داعش بۆ کاتێکی درێژخایەن لەو ناوچەیەدا.
ئەو کاتە ڕاپۆرتێکی (بی‌بی‌سی) نوسیویەتی، ڕاگەیاندنی سەرکەوتنی کۆتایی بەسەر داعشدا لەلایەن عێراقەوە بەمانای تەواوبوونی شەڕەکە نایەت، هێشتا شەڕی ئایدۆلۆژی و توانای چەکداری داعش بۆ کاری پارتیزانی تەواونەبوە نە لەعێراق و نە لەسووریاشدا.
وە هەر لەسەر کۆتایهێنان بەداعش لەو کاتەدا(گاردیان)نوسیبوی، واپێدەچێ داعش کاریگەری هەبێ و کێشەش دروستبکات بۆ چەند ساڵی داهاتوو لەسەر عێراق، ئەو گروپە لەنێو بزوتنەوەی چەکدارە یاخیبوەکانەوە ڕیشەی گرتوە و گەورەبوە، وە دەبێ ئەو ڕاستیەش بزانین کە هەموو چەکدارەکانی داعش لەمەیدانەکانی جەنگدا نەکوژراون و هێشتا بەشێکی زۆری چەکدارەکانی ئەو گروپە توندڕەوە تیرۆریستیەپێدەچێ لەنێو ناوچە دەشتیەکان و گوندەکاندا لەشێوەی خانەی نوستودا خۆیان حەشاردبێ، بۆیە ئەوانە لەکاتی شیاو و گونجاودا وەکو کاری سه‌ربازی دەردەکەونەوە و کردەی تیرۆریستی لەدژی حکومەت و خەڵکی ئەو ناوچانە ئەنجامدەدەن.
وە ماڵپەڕی (رۆیتەرز) یش لەڕاپۆرتێکدا وێرای باسکردن لە ڕاگەیاندنی حکومەتی عێراقی سەبارەت بە سەرکەوتن و کۆتا ڕزگارکردنەوەی ناوچەکانی عێراق لەژێر دەستی داعش، هاوکات باسی لە تەحەدداکانی بەردەم دواڕۆژی عێراق کردوە، کە ئەگەر چارەسەرنەکرێن کاریگەری خراپیان لەسەر دواڕۆژی عێراق دەبێت.
ئەو کاتە (ڕۆیتەرز) لەڕاپۆرتەکەیدا نوسیویەتی ململانێ ناوخۆییەکانی عێراق کاریگەریان لەسەر دواڕۆژی عێراق دەبێ، وە هەوڵە سەربازی و ئابورییەکانی عێراق لەدژی ناوچەی ئۆتۆنۆمی کوردستان یەکێکە لەو کێشە تازە ناوخۆییانەی عێراق کە ململانێکان قوڵتردەکاتەوە و هۆکار دەبێ لەسەر ناسەقامگیری ئەو وڵاتە بۆ ماوەیەکی دووروبەردرێژ، هەڵبەتە لەدوای ساڵێک بەسەر ئەو بارودۆخەدا ئێستا ئەو ڕەوشەی کە حکومەتی ئەوسای عێراق بەسەر ناوچە کێشەدارەکانیدا سەپاند مەترسیەکانی اباشتر هەستیان پێدەکرێ کە ناوچەکانی دەوروبەری کەرکوک ئاسایش و سەقامگیریان لەدۆخێکی باشدانیە و، کێشەکان لەنێوان خەڵکی ناوچەکەدا قوڵبونەتەوە وە ئەوەش هۆکار و هاندەردەبێ بۆ تێكچونی ئاسایشی ئەو ناوچانە.

دوا ژمارە

  • رۆژنامه‌كان
    ت دووەم 15 2018
  • رۆژنامه‌كان
    ت دووەم 14 2018
  • رۆژنامه‌كان
    ت دووەم 13 2018
  • رۆژنامه‌كان
    ت دووەم 12 2018
  • رۆژنامه‌كان
    ت دووەم 11 2018
  • رۆژنامه‌كان
    ت دووەم 08 2018
  • رۆژنامه‌كان
    ت دووەم 07 2018
  • 1
  • 2
  • 3
  • 4
  • 5
  • 6
  • 7
© 2017 Hawler