ئازار 21, 2019

با كەركووك ببێتە نموونەی پێكەوەژیانی ئاشتی سەرجەم پێكهاتە و نەتەوەكان

موقتەدا سەدر، رێبەری رەوتی سەدر نامەیەك ئاراستەی كورد دەكات و داوا دەكات پێكەوە عێراق رزگار بكەن و كەركووك بكەنە نموونەی پێكەوە ژیانی ئاشتیانە.

ئێستا هێزە شیعە و سوننەكانی عێراق دەیانەوێت لاپەڕەیەكی نوێ لەگەڵ كورد هەڵدەنەوە و كوردیش بەپێویستی دەزانێ ئەو پەیوەندیانە لەسەر بنەمای هاوبەشی راستەقینە و تەوافق و هاوسەنگی بێت.
رێبەری رەوتی سەدر، نامەیەكی ئاراستەی كورد كردووە و دەڵێت: "دەمانەوێت یەكگرتوو و بەهێزبین خۆشەویستان، نە ستەم بكەن و نەستەمتان لێبكرێت، پارووی ژیان لە نێوانماندا بە ویژدان و دادپەروەرانە دابەش بكەین".
هەروەها گوتوویەتی: "رێگە نادەین دەستدرێژی بكرێتە سەرتان و ئێمە دەزانین لەناوتاندا كێ خوازیاری خۆشەویستی و میانڕەوییە، جیاوازی لە نێوان كورد و عەرەب نییە تەنها بە خواپەرستی و خۆشەویستی نیشتمان نەبێت".
سەدر لە نامەكەیدا كە رووی لە كوردە دەڵێت: "هاوكاربن عێراق رزگار بكەین و دەست لە پشك پشكێنە هەڵگرین، هەموو گەندەڵەكان دوورخەینەوەو سەردەمێكی نوێ بۆ عێراق بدۆزینەوە بە رووخساری نوێ و پاك و شكۆتان بپارێزن و پێگەتان بكەنەوە پاش ئەوەی عێراق و گەلەكەی پێگەیان باڵا دەبێت".
سەدر دەڵێت: "نەوەی كۆن و نوێتان یەكبگرن بۆ ئەوەی لەگەڵ ئێوە پاڵپشتی عێراق بكەین و كەركووك بكەینە نموونەی پێكەوەژیانی ئاشتیانە بۆ هەموو پێكهاتەكانی".

 

ڕائیب جادر ـ هەو‌لێر

© 2017 Hawler