ئایار 23, 2022

زۆرترین بینراو

Error: No articles to display

سیستانی فتوایەک لە بارەی ڤاکسینی کۆرۆنا دەدات

عەلی سیستانی، مەرجەعی باڵای شیعە لە نەجەف، رایگەیاند وەرگرتنی پێکوتەی ڤایرۆسی کۆرۆنا دەبێ بە رێنمایی پزیشکە پسپۆڕەکان بێت و لە رووی ئاینیشەوە بە مەرج رێگەپێدراوە.
 
عەلی سیستانی، لە فەتوایەکدا کە نووسینگەکەی دەقەکەی بڵاوکردەوە، سەبارەت بە لێکەوتەی نەرێنی وەرگرتنی پێکوتەی دژە ڤایرۆسی کۆرۆنا، کە کۆمپانیاکانی فایزەری ئەمریکی و ئەسترازینکای سوێدی و کۆمپانیای دیکە بەرهەمیان هێناون، رایگەیاند: "لەم دۆخەدا پێویستە پشت بە رێنمایی پزیشکە پسپۆڕ و بە ئەزموونەکانەوە ببەسترێت، بەڵام لە دیدی ئاینی ئیسلامەوە دەبێ ئەو پێکوتە وەربگیرێ کە مۆڵەتپێدراوە، جیا لەوە دەبێ پێکوتەکە کاتێک وەربگیرێت ئەگەر تووشبوون بە ڤایرۆسی کۆرۆنا مەترسی بێت بۆ سەر ژیانی کەسەکە یان زیانێکی گەورەی پێبگەیێنێت بە رادەیەک ئەو زیانە لە لێکەوتەی نەرێنی وەرگرتنی پێکوتەکە زیاتر بێت".
 
عەلی سیستانی راشیگەیاند: "پێدانی پارەی زیاتر بۆ وەرگرتنی پێکوتەکە پێش کەسانێکی دیکە، کە حکومەتەکان دیارییانکردووە بۆ زوو وەرگرتنی پێکوتەکە رەوا نییە".
 
سەبارەت بە گومانی ئەوەی جیلاتینی بەراز بۆ بەرهەمهێنانی پێکوتەی کۆرۆنا بەکارهێندرابێت و ئایا لەو دۆخەدا وەرگرتنی پێکوتەکە لە رووی ئاینییەوە رێگەپێدراوە یان نا؟، عەلی سیستانی، مەرجەعی باڵای شیعە لە نەجەف، دەڵێ: "بەهەر شێوەیەک بێت ئەو بابەتە لە دیدی ئاینی ئیسلامەوە کێشە نییە".
 
پێشتر، دکتۆر سەیف بەدر، گوتەبێژی وەزارەتی تەندروستی و ژینگەی عێراق، بە تۆڕی میدیایی رووداوی راگەیاندبوو: "بڕیارە مانگی شوباتی داهاتوو یەکەم کاروانی پێکوتەی دژە کۆرۆنای بەرهەمی کۆمپانیای فایزەر بگاتە عێراق، کە 1 ملیۆن و 500 هەزار ژەمەپێکوتەیە، دوای گەیشتنیشی بەپێی رێژەی بەسەر هەموو پارێزگاکان عێراق و هەرێمی کوردستان دابەشدەکرێت".
 
هەروەها فارس بریفکانی، ئەندامی لێژنەی تەندروستیی لە پەرلەمانی عێراق بە تۆڕی میدیایی رووداوی راگەیاند: "تاوەکو کۆتایی مانگی ئادار 25 ملیۆن و 550 هەزار ژەمە ڤاکسین دەگاتە عێراق ئەمەش بەشی 12.5 كەس دەکات بەوپێیەی هەر کەسێک دەبێت دووجار بکوترێت".
 
تائێستا 614 هەزار و 576 کەس لە عێراق و هەرێمی کوردستان تووشی کۆرۆنا بوون، 583 هەزار و 127 لەو تووشبووانە چاکبوونەتەوە، کە دەکاتە 94.9٪ تێکڕای تووشبووان، 18 هەزار و 449 تووشبووش هێشتا چارەسەر وەردەگرن، 158 لەو تووشبووانە لەژێر چاودێری چڕدان، 13 هەزار تووشبووی دیکەش گیانیان لەدەستداوە.
© 2017 Hawler