کانونی یەکەم 07, 2019

دوو كوتله‌ی شیعه‌ له‌ په‌رله‌مانی عێراق بوو به‌ شه‌ڕیان

سه‌رچاوه‌یه‌ك له‌ ئه‌نجوومه‌نی نوێنه‌رانی عێراق رایگه‌یاند، دوو په‌رله‌مانتاری كوتله‌كانی سائیرونی سه‌ر به‌ موقته‌دا سه‌در و سادیقونی سه‌ر به‌ قه‌یس خه‌زعه‌لی له‌سه‌ر خۆپێشاندانه‌كانی به‌غدا و شاره‌ شیعه‌نشینه‌كانی دیكه‌ی عێراق بوو به‌ شه‌ڕیان.

ئه‌و سه‌رچاوه‌یه‌ به‌ میدیا عێراقییه‌كانی راگه‌یاندووه‌، شه‌ڕه‌كه‌ له‌ نێوان رامی سكینی، په‌رله‌مانتاری كوتله‌ی سائیرونی سه‌ر به‌ مه‌قته‌دا سه‌در و عه‌بدولئه‌میر ئه‌لدوبی، په‌رلمانتاری كوتله‌ی سادیقونی عه‌سائیب ئه‌هلول حه‌قی سه‌ر به‌ قه‌یس خه‌زعه‌لی بووه‌، كه‌ له‌سه‌ر هێرشكردنه‌ سه‌ر خۆپێشانده‌ران روویداوه‌ و سه‌ره‌تا ئه‌لدوبی قسه‌ی كردووه‌ و سكینیش وه‌ڵامی داوه‌ته‌وه‌ و بووه‌ته‌ شه‌ڕیان.

دوای ئه‌وه‌ی ده‌نگ له‌سه‌ر یاسای پێشنیازكراوی هه‌مواری دووه‌می یاسای هه‌ڵبژاردنی ئه‌نجوومه‌نی پارێزگا و قه‌زاكان درا، به‌هۆی ئه‌و شه‌ڕه‌ به‌شێك له‌ په‌رله‌مانتاران هۆڵی په‌رله‌مانیان جێهێشت، نیسابی یاسایی تێكچوو و محه‌مه‌د حه‌لبوسی، سه‌رۆكی ئه‌نجوومه‌نی نوێنه‌رانیش دانیشتنه‌كه‌ی دواخست.

ئه‌و سه‌رچاوه‌یه‌ ئاماژه‌ی به‌وه‌شدا، ئه‌نجوومه‌نی نوێنه‌ران به‌ ئاماده‌بوونی 224 په‌رله‌مانتار ده‌نگی له‌سه‌ر یاسای پێشنیازكراوی هه‌مواری دووه‌می یاسای هه‌ڵبژاردنی ئه‌نجوومه‌نی پارێزگا و قه‌زاكان دا.

© 2017 Hawler