ئەیلول 19, 2018

داوای 10 ملیۆن دۆلار دەكەن لە بەرامبەر ئازادكردنیدا

جێگری پێشووی پارێزگاری موسڵ، 2 ساڵ بەر لە ئێستا هاتوەتە ئیستەنبۆڵ، بەڵام لە لایەن چەند كەسێكەوە لە مانگی 10ی 2016 رفێنراوە و تاوەكو ئێستاش هەواڵی نازانرێت.

فەیسەل ئەلیاوەر، بەر لە هاتنی گروپی تیرۆرستی داعش بۆ موسڵ، وەكو جێگری پارێزگار كاری كردوە، بەڵام لە 2016 بە سەردانێكی فەرمی هاتوە بۆ ئیستەنبۆڵ و لەوێ رفێنراوە.
تەلەڤزیۆنی NTV توركی، لە راپۆرتێكدا ئاشكرای دەكات، دوای داگیركردنی موسڵ لە لایەن داعشەوە، فەیسەل چوەتە ئوردن و لەوێ نیشتەجێ بوە. بەڵام لە مانگی 10ی 2016 لە كۆنفراسێكدا لە ئیستەنبۆڵ داوەت دەكرێت و كاتێك دەگاتە ناو فڕۆكەخانەی ئەتاتورك، سەیارەیەكی سپی دێت بە شوێنیدا و ئیتر دەڕفێنرێت و هیچ هەواڵێكی نییە.
ئەو كەسانەی فەیسەلیان رفاندوە، داوای 10 ملیۆن دۆلاریان لە خانەوادەی كردوە لە بەرامبەردا ئازادی دەكەن، بەڵام خانەوادەكەی ئەو پارەیەیان نەبوە و لە ئیستەنبۆڵ داوای یاساییان تۆمار كردوە. دوای ئەوەی 2 ساڵ بەسەر رفاندنەكەی تێپەڕ دەبێت و فەیسەل بێسەر و شوێنە، خانەوادەكەی پەنایان بۆ میدیای توركیا بردوە و داوای هاوكارییان كردوە.
هەر لە راپۆرتەكەدا هاتوە، كە رفێنراوان ڤیدیۆیەكی فەیسەلیان بۆ خانەوادەكەی ناردوە و داوای 10 ملیۆن دۆلاریان كردوە، بەڵام خانەوادەكەی گومانیان لە بەروارەكەی هەبوە و ترسیان هەبوە كوژرابێت، بۆیە داوایان كردوە ڤیدیۆیەكی بەرواری تازە بنێرن، بەڵام وەڵامیان نەبوە.
رفێندراوان لە ڤیدیۆیەكی تردا داوایان لە خانەوادەی فەیسل كردوە، لە بری 10 ملیۆن دۆلار، 3 ملیۆن دۆلار بدەن، بەڵام لەبەر ئەوەی دوای هاتنی داعش سەروەت و سامانی فەیسەل لە لایەن داعشەوە دەستی بەسەردا گیراوە، بۆیە نەیانتوانیوە ئەو پارەیە دابین بكەن.
پۆلیسی ئیستەنبۆڵ بە دوای فەیسەلدا دەگەڕێت و تاوەكو ئێستا هیچ سەرەداوێكی نەدۆزیوەتەوە

 

كارزان گلی ـ هه‌ولێر
.

© 2017 Hawler

Please publish modules in offcanvas position.