نیسان 21, 2019

ئامێدی زیاتر لە 20 ساڵە بۆتە مەیدانی شەڕی پەكەكە و توركیا

ئامێدی زیاتر لە 20 ساڵە بۆتە مەیدانی شەڕی پەكەكە و توركیا، هەر بەو هۆیەوە زیاتر لە 200 گوندی ناوچەكە چۆڵكراون و بەدەیان هاووڵاتیش شەهید و بریندار بوونە. هاووڵاتیانیش داوا لە پەكەكە و توركیا دەكەن كێشە و ئالۆزییەكانی خۆیان ببەنە مەیدانی خەباتی خۆیان.

نوری كازم، هاووڵاتیەكی شارەدێی شێڵادزێیە بۆ "هەولێر" دەڵێت:" كێشەی سەرەكی ئێمە هەبوونی پەكەكەیە لەناوچەكە، هیوادارین پەكەكە و توركیا شەڕی خۆیان لەنێو ماڵەكانی ئێمەدا نەكەن و كێشە و ئالۆزییەكانی خۆیان ببەنە مەیدانی خەباتی خۆیان، بۆ ئەوەی چی دیكە نەبینە قوربانی دەستی ئەوان.
هاشم سدیق، كە تەمەنی لەسەرووی 80 ساڵە بۆ "هەولێر" دەڵێت:" ئەوە زیاتر لە 25 ساڵە لە ترسی پەكەكە و توركیا ناوێرین بچینەوە سەر گوند و ئاواییەكانی خۆمان، ئێستا ئەگەر لەسەر گوندەكانی خۆمان باین، كاری كشتوكاڵی و ئاژەڵداری و چەندین كاری دیكەمان دەكرد و بژێوی ژیانی خۆمان دابین دەكرد.
دەشڵێ:" بەهۆی هەبوونی پەكەكە و بۆردومانكردنی ناوچەكانی ئێمە لەلایەن توركیاوە زیاتر لە 40 هاووڵاتی ناوچەكە شەهید و بریندار بوونە، جگە لەوە زیانێكی زۆری ماددیی بەر ناوچەكانی ئێمە كەوتووە و ناتوانین بگەڕێینەوە سەر گوند و ئاواییەكانی خۆمان.
مونیر حەسەن، هاووڵاتیەكی دیكەی هەمان شارەدێیە، بۆ "هەولێر" گووتی:" بەو دوایە هەندێك ناخۆشی و ئالۆزی لەناوچەكە دروست بوون و بۆیە هۆی شەهید بوون و بریندار بوونی هاووڵاتیان، ئەوەش هەموو هۆكارەكەی هەندێك لایەنی سیاسی بوون، خەڵكی ناوچەكەیان بەكارهێنا تاكو ئالۆزی دروست بكەن و ئارامی لەناوچەكە تێك بدەن، ئێمە لەگەڵ ئالۆزی و دروستكردنی كێشەدا نین، تەنیا ئەوەی ئێمە دەمانەوێت ئەوەیە كە پەكەكە بنكە و بارەگاكانی خۆی لە گوند و ئاواییەكانی ئێمە بباتە دەرەوە و توركیاش ناوچەكە بۆردومان نەكات، بۆ ئەوەی ئێمەش بتوانین بە ئازادانە و بە بێ ترس بگەڕێینەوە سەر گوند و ئاواییەكانی خۆمان و دەست بە ژیانێكی نوێ بكەین".

© 2017 Hawler