حوزەیران 24, 2019

لە ناوچە شاخاوییەكان نەوت بەسەر هاووڵاتیاندا دابەشدەكرێت

لە سنووری بالیسان نەوت بەسەر هاووڵاتیان دابەشكراوە، لە سەنتەری شەقڵاوە و گوندەكانی دەوروبەری هەریر دەست بە دابەشكردنی نەوت كراوە و پرۆسەكە بەردەوام دەبێت تا هەموو هاووڵاتیان وەردەگرن. لەناوچە شاخاوییەكانیش لە ڕێگەی بڕیكارەكانەوە پارە لە هاووڵاتیان وەردەگیرێت و نەوت بەسەر هاووڵاتیاندا دابەشدەكرێت.

شەپۆلێكی بەفر بارین هەرێمی كوردستانی گرتۆتەوە، لە هەندێك ناوچە وەكو كانی ماسێ سەر بە شارۆچكەی ئامێدی زیاتر لە 60 سم بەفر و لە شارۆچكەی مێرگەسۆر 22 سم بەفر و لە حاجی ئۆمەران زیاتر لە 30 سم بەفر باریوە، كەشوهەوا سارد بووە، هاووڵاتیانیش بۆ خۆ گەرم كردنەوە پێویستیان بە نەوت هەیە و، داوای دابەشكردنی دەكەن، بۆ ئەوەی بەو زستانە سارد و سوڕە خۆیان پێ گەرم بكەنەوە.
جوان رەفیق، قایمقامی شارۆچكەی شەقڵاوە بۆ "هەولێر" گوتی:" پرۆسەی دابەشكردنی نەوت زۆر خاوە، لەبەر ئەوەی ئەو بڕە نەوتەی بۆ هەولێر دێت زۆر كەمە و بەش ناكات بە یەكجار دابەشی سەر هاووڵاتیان بكەین، بۆیە دابەشكردنی نەوت لە سنوورەكەمان قۆناغ بە قۆناغ دەبێت لە ئێستادا سنووری ناحیەی بالیسان بە كۆتا هاتووە و لە سەنتەی شاری شەقڵاوە و گوندەكانی دەوروبەری هەریر دەستمان بە دابەشكردنی نەوت كردووە و بە گوێرەی پسولەی خۆراك دەبێت".
بە پێی ئەو ئامارەی لە بەڕێوەبەرایەتی كشتوكاڵی مێرگەسۆر بە دەست "هەولێر" كەوتووە لە ماوەی 24 كاتژمێری رابردوودا 20 ملم باران و 22 سم بەفر باریوە، كۆی گشتی باران بارینی ئەمساڵ گەیشتووەتە هەزار و 109 ملم باران و 48 سم بەفر، زستانی رابردوو تا ئەمڕۆ 316 ملم باران و 8 سم بەفر باری بوو.
لە سنووری ناحیەی گۆڕەتوو سەر بە شارۆچكەی مێرگەسۆر لە ڕێگەی بڕیكارەكانەوە پارە لە هاووڵاتیان وەردەگیرێت، وەكو بڕیكارەكان دەڵێن، دوای وەرگرتنی پارە لە هاووڵاتیان، بەشە نەوتی پێویست دەگات و بەسەر هاووڵاتیاندا دابەشی دەكەن".

© 2017 Hawler