نیسان 06, 2020

ئەو خێزانانەی گەڕابوونەوە مووسڵ، دووبارە ئاوارەی كوردستان بوونەتەوە

بە هۆی خراپیی ڕەوشی ئەمنی و نەبوونی خزمەتگوزارییەوە، ئاوارە مەسیحییەكانی دەشتی نەینەوا و مووسڵ دوای گەڕانەوەیان بۆ شارەكەیان، دووبارە ئاوارەی هەرێمی كوردستان دەبنەوە. نوێنەرێكیشیان لە پەرلەمانی كوردستان باس لە دۆخی خراپی ئاوارەكان دەكات.

بە پێی ئامارە نافەرمییەكان، نزیكەی 300هەزار مەسیحی و كریستیان بە هۆی شەڕی داعشەوە ئاوارەی هەرێمی كوردستان و سووریا و توركیا بوون، كە زیاتر لە نیوەی ئەو ژمارەیە لە هەرێمی كوردستانن و، بەشێكیشیان بەرەو دەرەوەی وڵات كۆچیان كردووە و لە لایەن ڕێكخراوە جیهانییەكانەوە سەرپەرشتی دەكرێن.
ڕۆمیۆ هەكاری، سەرۆكی پارتی بەیت نەهرێن و نوێنەری مەسیحی و كریستیانەكان لە پەرلەمانی كوردستان، بۆ ماڵپەڕی فەرمیی پارتی دیموكراتی كوردستان گوتی: "ئەو ئاوارانەی لە كوردستانەوە گەڕابوونەوە بۆ دەشتی نەینەوا و پارێزگای مووسڵ، خەریكە وردە وردە جارێكی دیكە دەگەڕێنەوە بۆ هەرێمی كوردستان، چونكە دۆخی خراپی مووسڵ و نەبوونی خزمەتگوزاری لەو ناوچانەدا وای كردووە كە نەتوانن لە مەنزڵی خۆیان بمێننەوە و بە ناچاری دووبارە دەگەڕێنەوە هەرێمی كوردستان".
هەكاری گوتیشی: "بەداخەوە هاوكاریی ڕێكخراوە نێودەوڵەتییەكان بۆ كریستیانەكان كەمە و لە ئاستی پێویستدا نییە، بۆیە ئەوەی دەكرێت بە هاوكاریی حكوومەتی هەرێمی كوردستانە كە دەمانەوێت شوێنێكی ئارام بۆ مەسیحییەكان دابین بكرێت".
هەکاری دەشڵێ: "لە ئەنجامی پەلاماری داعش، سەرجەم كڵێسا و شوێنە ئایینییەكان لەناو براون، كە ئەمانە مێژووی شارستانیەتی كۆنی عێراقیان دەرخستووە و نیشانەی پێكەوەژیان بوون".
لە دوائاماری ڕێكخراوە نێودەوڵەتییەكاندا لەسەر وێرانكردنی عێراق، باس لەوە كراوە كە لە پارێزگای مووسڵ زیاتر لە 120 كڵێسا ڕووخێنراون.
بە پێی قسەی پەرلەمانتارانی شاری مووسڵ لە پەرلەمانی عێراق، هەتا ئێستا 16هەزار خێزانی كریستیان گەڕاونەتەوە و زۆربەیان چوونەتەوە حەمدانییە، تەنیا 40 خێزانیش گەڕانەوە سەنتەری شاری مووسڵ."
لە ماڵپەڕی پارتییەوە

© 2017 Hawler