نیسان 03, 2020

وەزیری پێشمەرگە بە وەکالەت: چاكسازی لە وەزارەتی پێشمەرگە چووەتە بواری جێبەجێكردنەوە

دوێنێ، بە بەشداری کەریم شنگالی، وەزیری پێشمەرگە بە وەکالەت و بەرپرسانی وەزارەتی پێشمەرگە و نوێنەری هاوپەیمانان، کۆنفرانسی چاکسازی وەزارەتی پێشمەرگە بەڕیوەچوو.

لە کۆنفرانسەکەدا وەزیری پێشمەرگە بە وەکالەت کەریم شنگالی، وتارێکی پێشکەش کرد و تیایدا ڕایگەیاند:" لە كۆی 35 خاڵی پڕۆژەی چاكسازی 5 خاڵ جێبەجێكراون، لەم ماوەیەشدا كار لەسەر 8 خاڵی دیكە دەكرێت و پڕۆسەكە بەردەوام دەبێت تا دەگاتە كۆتایی".
كەریم شنگالی، وەزیری پێشمەرگە بە وەكالەت گوتی: "بیرۆكەی چاكسازی لە وەزارەتی پێشمەرگە یەكەمجار لە دیدارێكی سەرۆك بارزانی و وەزیری بەرگری بەریتانیا باسی لێوەكرا، دواتر ئەو بیرۆكەیە كرایە پێشنیار و پلان بۆ ریفۆرمی گشتی وەزارەتی پێشمەرگە دانرا تا بەسەر كۆسپ و تەگەرەكان زاڵبین، پاشان بەریتانیا و ئەمەریكا و ئەڵمانیا ئامادەییان دەربڕی بۆ ئەوەی پشگیری لە پرۆسەكە بكەن".
لە بەشێکی تری وتارەکەیدا کەریم شنگالی ڕایگەیاند: " لیژنەیەک بە مەبەستی چاکسازی پێکهێندراوەو ھەنگاوی یەکەمی ئەو لیژنەیەش دانانی بەرنامەیەکی (٣٥) خاڵی بوو، لەژێر ناونیشانی ''بەرنامەی پێشمەرگە لە ئایندەدا'' ھەر بۆیە لە وەزارەت پلانێکمان داڕشت بەھەماھەنگی ھێزەکانی وڵاتانی ھاوپەیمان بۆ جێبەجێ کردنی بەرنامەکە لەرێگەی گواستنەوەی ژمارەیەک لە ئەفسەری بە ئەزموون و خاوەن بڕوانامەی زانستی، شارەزا لە بواری چاکسازیدا بۆ پاڵپشتی کردن لە پرۆسەکە.
لە درێژەی وتارەکەیدا وەزیری پیشمەرگە بە وەکالەت تیشکی خستە سەر رۆڵ و گرنگی سەرباز و ڕاوێژکاری وڵاتانی هاوپەیمان لەوانەش: بەریتانیا و ئەمریکا و ئەڵمانیا بۆ هاوکاری و سەرخستنی پلانەکان، ناوبراو ڕاشیگەیاند، لەسەرەتای ساڵی داهاتوو بڕیارە وڵاتی هۆڵەنداش راوێژکاری خۆیان بنێرن بۆ ئەوەی لەگەڵ راوێژکاری وڵاتانی هاوپەیمان پاڵپشتی پلانی چاکسازی پێشمەرگە بن لە ئایندەدا.
هەر لەو كۆنفرانسەدا كۆلۆنیۆل ویڵ دەیڤز، راوێژكاری سەربازیی بەریتانیا كە رۆڵیان هەیە لە ئەنجامدانی پرۆسەی چاكسازیی لە وەزارەتی پێشمەرگە، رایگەیاند، كە هەموو هێز و سوپایەك پێویستە بەشێوەیەكی بەردەوام چاكسازیی ئەنجام بدات، تاوەكو ئەو هێزانە بتوانن بە بەهێزیی بمێننەوە، ئەو پرۆسە ریفۆرمە پێویستی بە هاوكاریی لایەنە سیاسییەكان و حكوومەتیش هەیە.

© 2017 Hawler