ئاب 07, 2020

لە پارێزگای دهۆك دەست بەسەر چەكی بێ مۆڵەتدا دەگیرێت

گوتەبێژی بەڕێوەبەرایەتیی گشتی پۆلیسی دهۆك ڕایدەگەیەنێت، هێزە ئەمنییەكانی پارێزگای دهۆك بەردەوامن لەسەر هەڵمەتی ڕاماڵینی چەكی بێ مۆڵەت و توانیویانە دەیان كەس دەستگیر بكەن و دەستیش بەسەر چەكی ئەواندا بگیرێت.

لیژنەی ئەمنیی پارێزگای دهۆك بۆ زیاتر پاراستنی سەروماڵی هاووڵاتییان و نەهێشتنی حاڵەتی كوشتن سێ بڕیاری دەركرد و تێیدا مۆڵەتی پازدە ڕۆژی بە هاووڵاتییانی دهۆك دا كە چەكی بێمۆڵەت ڕادەستی هێزە ئەمنییەكان بكەن، بەپێچەوانەوە لێپرسینەوەیان لەگەڵ دەكرێت.
دوای زیادبوونی حاڵەتەكانی كوشتن و خۆكوشتن، ئەنجومەنی ئاسایشی هەرێمی كوردستان هۆشداریی دا لە هەبوونی چەكی بێمۆڵەت و ئۆتۆمبێلی بێ ساڵیانە و دەستی بە داماڵینی چەك كرد.
ڕائید هێمن سلێمان، گوتەبێژی پۆلیسی پارێزگای دهۆك بە "هەولێر"ـی گوت:" وەكو بەڕێوەبەرایەتی پۆلیسی پارێزگای دهۆك پێش ماوەیەك هەڵمەتێكمان دەست پێ كرد، ژمارەیەك كەس دەستگیر كران كە چەكی بێ مۆڵەتیان پێ بوو، بەردەوامیش دەبین و بەردەوام مەفرەزەكانی ئێمە دەگەڕێن و هەر كەسێك چەكی بێ مۆڵەتی پێ بێت دەستگیر دەكەین، ئیدی نابێ بە هیچ شێوەیەك دیاردەی چەك هەڵگرتنی بێمۆڵەت لە پارێزگای دهۆك بمێنێت و ڕێوشوێنی ئەمنی و یاسایی باش گیراوەتەبەر.
زۆربوونی ڕێژەی چەكی بێ مۆڵەت لای هاووڵاتییانی سڤیل كاریگەریی هەبووە لەسەر زیادبوونی ڕێژە تاوان و لەبارەی كاریگەریی هەڵمەتی دەزگا پەیوەندیدارەكانەوە، گوتەبێژی پۆلیسی پارێزگای دهۆك دەڵێ:" ئامانجی ئێمە لەو هەڵمەتە ئەوەیە كە سەرو ماڵی هاووڵاتیان پارێزراو بێت و نەبنە قوربانی خراپ بەكارهێنان و هەڵگرتنی چەكی بێ مۆڵەت، چونكەی ئارمانجی سەرەكی ئێمە ئەوەیە كە هاووڵاتیانی ئێمە پارێزراو بن، بەردەوام مەفرەزەكان دادەنرێن بۆ ئەوەی ئەو كەسانەی سەر پێچی، یان دژی یاسا دەوەستنەوە دەستگیر بكەین و رووبەڕووی یاسا بكەینەوە، بۆیە هەڵمەتی هێزە ئەمنییەكان كاریگەریی خۆی هەبووە لەسەر كەمكردنەوەی دیاردەی چەكداری و ئەو ڕووداوانەی پێشتر هەبوون، سەرپێچیكارانیش بە پێی یاسا مامەڵەیان لەگەڵدا دەكرێت و ڕەوانەی دادگا دەكرێن."

© 2017 Hawler