تشرینی یەکەم 21, 2019

لەبەر بوونی پەكەكە رۆژانە توركیا سیدەكان بۆردوومان دەكات

بەڕێوەبەری شارەدێی سیدەكان دیاركرد، لەبەر بوونی هێزەكانی پەكەكە، توركیا 7 كیلۆمەتر لە سنووری سیدەكان هاتووەتە پێشەوە و رۆژانە بە تۆپ ناوچەكە تۆپباران دەكەن و فڕۆكەی شەڕكەریش بەردەوام بەناوچەكەدا دەسووڕێتەوە، ئەوەش ترس و دڵەڕاوكێی لای هاووڵاتیان دروست كردووە و داوا دەكەن هێزەكانی توركیا و پەكەكە ناوچەكە چۆڵ بكەن.

شارەدێی سیدەكان دەكەوێتە سنووری شارۆچكەی سۆران، سێگۆشەی توركیا، ئێران، هەرێمی كوردستان، ناوچەیەكی سنوورییە و لە 250 گوند پێك دێت، بەڵام لەبەر پەكەكە تا ئێستا 115 گوند ئاوەدان نەكراونەتەوە، خەڵكی ناوچەكەش داواكارن پەكەكە لەناوچەكە نەمێنێت، بۆ ئەوەی بگەڕێنەوە سەر گوند و ئاواییەكانی خۆیان، كە خەڵكی ناوچەكە زۆربەیان كاری ئاژەڵداری و كشتوكاڵی دەكەن.
ئێحسان چەلەبی، بەڕێوەبەری شارەدێی سیدەكان بۆ "هەولێر" دەڵێ: لە سنووری شارەدێی سیدەكان، بەتایبەتی لە گوندی بەرمیزە هێزەكانی توركیا نزیكەی دوو مانگ دەبێت 7 كلیۆمەتر هاتوونەتە پێشەوە و سنووری كوردستانیان بەزاندووە و مەترسیان لەسەر گوندی بەرمیزە دروست كردووە و زۆرجار بەهۆی پەكەكەوە نزیك گوندەكە تۆپباران دەكەن، پرۆژەی ئاوی گوندەكەش تێكچووە و تا ئێستا لەبەر پەكەكە و سوپای توركیا نەمان توانیوە نۆژەن بكەینەوە.
ڕوونیشیكردەوە، بیانۆی هاتنی ئەوان تەنیا پەكەكەیە و رۆژانە شەڕ و پێكدادان لە نێوانیاندا روودەدات، بەڵام تا ئێستا زەرەروزیانەكان نەزانراون، فڕۆكەی شەڕكەریش بەردەوام بەناوچەكەدا دەسووڕێتەوە.
چەلەبی، ئەوەشی گوت: ئەگەر پەكەكە لەو ناوچانە نەبووایە ئەوان نەدەهاتنە پێشەوە، چونكە بیانۆی داخیل بوونی ئەوان تەنیا پەكەكەیە لەو ناوچانە، هاووڵاتیان داوای كشانەی هێزەكانی توركیا و نەمانی پەكەكە لەو ناوچانە دەكەن، ئێمەش سەرووی خۆمان ئاگاداركردۆتەوە كە بكشێنەوە و پەكەكەش جموجۆلەكانی ڕابگرێت، بەڵام پەكەكە پابەند نییە".

 

© 2017 Hawler