تەمموز 23, 2018

شانازی و سەروەرییە مێژووییەكانی كورد، بۆ پارتی دەگەڕێنەوە

هاووڵاتیانی سنووری سۆران پشتگیری خۆیان بۆ سەرخستنی لیستی پارتی ژمارە 184 بۆ ئەنجوومەنی نوێنەرانی عێراق دووپات دەكەنەوە، چونكە وەكو خۆیان دەڵێن، ئەو لیستە دەتوانێت ئەو هیوا و ئاواتانەمان كە تا ئێستا نەهاتوونەتەدی بەدی بهێنێت، بۆیە وەكو هاووڵاتیانی سنووری حەوزی سۆران بە ئەركی خۆمان دەزانین رۆژی دەنگدان روو لە سندووقەكانی دەنگدان بكەین و دەنگ بە پارتی و كاندیدەكانی پارتی بدەین. چالاكوانێكی بواری سیاسییش دەڵێ، دروشمەكانی پارتی بەپێی قۆناغ و هەلومەرجی سیاسی بەرز كراونەتەوە، لەگەڵ ئەوەی شانازی و سەروەرییە مێژووییەكانی كورد بۆ پارتی دەگەڕێنەوە، بۆیە خەڵكی كوردستان مافی خۆیانە شانازی بە پارتییەوە بكەن و دەنگ بە لیستی پارتی و كاندیدەكانی ئەو حزبە بدەن.
ڕزگار شەمسەدین، كە رۆشنبیرێكی سۆرانە بۆ "هەولێر" دەڵێت" من دەنگی خۆم دەدەمە لیستی پارتی و هیوادارم هەموو خەڵكی سنووری سۆران، مێرگەسۆر، چۆمان و رواندز دەنگ بەو لیستە بدەن، چونكە لیستی بەدیهێنانی خەونەكان و پاراستنی دەستكەوتەكان و لیستی خوێنی شەهید و ئەنفالكراوانە، لیستی برایەتی و پێكەوەژیانە، لیستی ئاوەدانییە، لیستی بارزانی نەمرە، كە هەموو ژیانی خۆی بۆ كورد و كوردستان تەرخان كردبوو، بۆیە ئێمە لە رۆژی دەنگدان بە ئەركی خۆمان دەزانین بچووكترین وەفا بەرامبەر بە لیستی بارزانی بكەین، كە ئەویش چوونە سەر سندووقەكانی دەنگدانە و دەنگ بە لیستی پارتی و كاندیدەكانی ئەو لیستە بدەین.
تالب محیەدین، كە شوفێری تەكسیە لەناو بازاڕی سۆران بۆ "هەولێر" دەڵێ، لە سۆران بە گوڕ و تین خۆمان بۆ هەڵمەتی هەڵبژاردن ئامادە كردووە، بە ئەركێكی نیشتمانی دەزانم روو لە سندووقەكانی دەنگدان بكەم و دەنگ بە لیستی ژمارە 184 بدەم، چونكە ئەو لیستە، لیستی ئازادی و سەربەخۆیی كوردستانە، ئەو دەستكەوتانەی بە دەستمان هێناوە زۆربەیان بۆ پارتی دیموكراتی كوردستان دەگەڕێنەوە، بۆیە بۆ پاراستنی ئەو دەستكەوتانە و دەستكەوتی زیاتر داوا لە خەڵكی ناوچەكە دەكەم دەنگ بە پارتی و كاندیدەكانی بدەن.
ئارمان سادق، فەرمانبەری ڕۆشنبیری لە رواندز بۆ "هەولێر" دەڵێ، دەبێت ئەو كەسانەی خۆیان كاندید كردووە، كاتێك كە دەردەچن لە بەغدا بە هەموو هێز و توانایەكەوە بەرگری لە مافی كورد بكەن، لە رۆژی دەنگدان دەنگی خۆم دەخەمە پاڵ دەنگی خەڵك، بۆ ئاسایشی زیاتر، بۆ سەقامگیری زیاتر، دەنگ دەدەمە لیستی 184 كە لیستی برایەتی و تەبایی و پێكەوە ژیانە، لیستی ئەمن و ئاسایشی خەڵكە.
تینا جیهاد، قوتابی زانكۆی سۆران بۆ "هەولێر" دەڵێ، دەبێت ئەو كەسەی دەنگی پێ دەدەم، دەبێ كەسێكی لێهاتوو و جێگەی متمانەی خەڵك بێت، بەر لەوەی بیر لە بەرژەوەندی حزبایەتی بكاتەوە، گەلەكەی بەلایەوە گرنگ بێت، خەمخۆری خەڵك بێت، هاوخەمی هەژاران و فەقیران بێت، منیش وەكو خەڵكی دیكە بە حەزەوە دەنگ دەدەم و دەنگی من و ماڵەوە ڕەنگی زەردە و ژمارەكەشی 184ـە.
هۆزان خۆرشید، چالاكوانی بواری سیاسی بۆ "هەولێر" دەڵێ، پارتی تاكە حزبە لە گۆڕەپانی سیاسییدا كە بە خوێندنەوەی قۆناغەكانەوە دروشمی خۆی بەرز كردووەتەوە و نەیویستووە بەردێك هەڵگرێ كە توانای هاویشتنی نەبێت، دروشمەكانی پارتی بەپێی قۆناغ و هەلومەرجی سیاسی بەرز كراونەتەوە، هەروەها پارتی لەرووی نەتەوەییەوە گرەوی لە هەموو هێزە سیاسییەكانی تر بردووەتەوە، بۆیە خەڵكی كوردستان مافی خۆیانە شانازی بە پارتییەوە بكەن، لەگەڵ ئەوەی هەمیشە خەونی پارتی سەربەخۆیی بووە، پارتی باوەڕی بە بنەماكانی دیموكراسییەت هەیە، بە ڕەچاوكردنی بەها كۆمەڵایەتی و كوردەوارییەكانی كۆمەڵگەی خۆمان و خەباتی هاوبەش.

 

© 2017 Hawler

Please publish modules in offcanvas position.