ئاب 05, 2020

ل پارێزگەها دهۆكێ خانیێن زێدە گاڤی دێ هێنە تاپوكرن

رێڤەبەرێ باژێرڤانییان ل پارێزگەها دهۆكێ:
دهێتە پێشبینیكرن رێژەیەكا زورا ژخۆدان خانیێن زێدە گاڤی مفایی ژڤێ بریارێ وەلگرن

بەری سەرێ ساڵا نوی 2020 بریارەك ژلایێ حكومەتا هەرێما كوردستانێ ژبۆ تاپوكرنا خانیێن زێدەگاڤی دەركەفتییە و ئامادەكاری ژبۆ جێبەجێكرنا بریارێ دهاتنە كرن، لێ پاشان ڤایروسێ كورونایێ وەكو رەوشەكا نەچاڤەرێكری دروست بوو و بوویە ئەگەرێ راوستاندنا ڤێ بریارێ وەكو هەر بریارەكا دی، لێ دنها دا بریار هاتە نوی كرن ڤە و كەفتە قوناغا جێبەجێكرنێ.

دیار بەحری رەسول، رێڤەبەرێ باژێرڤانییان ل پارێزگەها دهۆكێ: ل دویف ئامارێن بەردەست دهێتە پێشبینیكرن نێزیك 25 هزار یەكێن نێشتەجێبووونێ وەكو زێدەگافی ل سەرانسەر پارێزگەها دهۆكێ هەبن لێ هەتا نوكە نەهاتییە زانین كو چەند یەك ژوان دێ هێنە تاپوكرن چونكە ب گور یاسایا ژمارە 3 یا تاپوكرنا خانیێن زێدەگاڤی، هەر خانییەكێ بەری 13 مەها 3 سالا 2008 هاتبیتە ئاڤاكرن و ب گورەی شێوازی خانییەكێ ئاگنجیبونێ بیت بریار دێ ژێ گریت، لێ رەنگە خانییەك هەبیت دنەخشەی دا ل جهێ جادەیەكێ هاتبیتە دروستكرن یان ژی ل جهێ كەسكاتییەكێ بیت یان جهێ ئاڤاهیێن حكومی بیت لەوما ب گورەی یاسایێ ئەو خانی ناهێتە تاپوكرن بەلكو دێ هێتە راكرن بەرامبەر قەرەبوكرنا خۆدانی ب پارچەیەكا ئەردی.
بەری نوكە پارێزگارێ پارێزگەها دهۆكێ كومبوونەك دگەل هەمی لایەنێن پەیوەندیدار رێكخست و لیژنەیەك ژی ل سەر ئاستێ هەمی قەزایان پێك ئینایە و ل دویف زانییارییان ئەوان لیژنەیان ژی لیژنە ژلایێ خۆڤە دروستكرینە ژبۆ ب رێڤەبرنا ڤێ پرۆسێ، و دنها دا خەلك هەمی ب رێكا راگەهاندنێ هاتییە ئاگەهداركرن كو مامەلێن خۆ ب رێڤەببەن چونكە هەتا 10 مەها 10 ژئەڤ سالەدڤێت هەمی خودان خانیێن زێدەگاڤی داخوازا تاپوكرنا خانیێن خۆ بكەن ئەگەر نە ژی دێ دەم ب سەرڤە چیت و دێ مافێ خۆ ژدەست دەن، و پشتی 10/10 دەست ب تاپوكرنی دێ هێتە كرن و بگورەی یاسایێ دڤێت هەتا 3 ساڵێن بهێت جێبەجێكرنا بریارێ بهێتە ب دویماهیك ئینان و هەمی خانیێن هاتینە دەستینیشانكرن ب گورەی مەرجێن دانایی بهێنە تاپوكرن "و ئەز باوەرم رێژەیەكا هەرە زورا خۆدان خانیێن زێدە گاڤی دێ مفایی ژڤێ بریارێ بینن" بەحری گوت.
دیار بەحری دیاردكەت كو گەلەك جاران خەلك پرسیار دكەن "ئەرێ پارچە ئەردێن زێدەگاڤی دێ هێنە تاپوكرن؟" لێ بەرسڤا مە بۆ وان "نە خێر"ە چونكە چ پێ نەڤێت ئەگەر ئەرد زێدە گاڤی بیت هەر رێ پێ ناهێتە دان بهێتە ئاڤاكرن و دێ بۆ حكومەتێ ڤەگەریت. هەروەسا هەر كەسەكێ مافێ تاپوكرنا ئێك خانیێ زێدەگاڤی ب تنێ هەیە، ئانكو ئەگەر كەسەكێ پتری ئێك خانی یێ زێدەگاڤی هەبیت ئێك ب تنێ دێ بۆ هێتە تاپوكرن و یێن دی ژی دێ بۆ حكومەتێ ڤەگەرن و بریارە بۆ هەر مەتركا چوار گوشە 10 هەتا 15 هزار دینارێن عیراقێ بهێتە وەلگرتن.

سەجا شێرزاد - دهۆک

© 2017 Hawler