حوزەیران 04, 2020

زۆربەی تووشبووە نوێکانی کۆرۆنا لە سلێمانی بەرکەوتەی نانەوایەکی تووشبووی ڤایرۆسەکەن

جارێکی دیکە کۆرۆنا و تووشبووەکانى بوونەوە بە هەواڵى گەرم لە هەرێمى کوردستان، دواى دوو هەفتە لە تۆمارنەکردنی تووشبووی نوێ لە سلێمانی، چەند تووشبوویەکی نوێی کۆرۆنا تۆمارکران و ئەمڕۆش لە هەولێر تووشبوویەکی دیکە تۆمارکرا. 
 
تووشبووانی ڤایرۆسەکە لە سلێمانی زیادیانکرد و لە چەند رۆژێکدا نزیکەی 30 کەس تووشبوون، بەڵام بەگوتەى وەزیری تەندروستی و سەرپەرشتیارى رووبەڕووبوونەوەى کۆرۆناش لە سلێمانى، ئەوەى ئێستا چاوەڕانکراوبووە و شەپۆلى دووەمى ڤایرۆسەکە نییە.
 
د. هێرش حەیدەر، سەرپەرشتیارى رووبەڕووبوونەوەى کۆرۆنا لە سلێمانى بە تۆڕی میدیایی رووداوی گوت "شەپۆلى دووەم کاتێک دێت کە لانیکەم بۆ دوو مانگ هیچ حاڵەتێک نەبووبێت، بۆیە ئێستا لەسەر ئاستى ناوخۆ و دەرەوەش شەپۆلى یەکەمە".
 
ئەوەى تائێستا لاى تەندروستیی سلێمانى بووەتە پرسیارى بێوەڵام، روون نییە یەکەم تووشبووى نوێ کە خاوەنى نانەواخانەیەکە، لە کێوە بۆى گواستراوەتەوە. بە گوتەی د. هێرش حەیدەریش، "ئەم ژمارە لە تووشبووەی کە هەیە 80%یان بەرکەوتووی ئەو کەسەن کە نازانرێت سەرچاوەی تووشبوونەکەی کوێیە".  
 
دەربارەى گومانى ئەو کەسانەى کە باوەڕیان بەوە نییە کۆرۆنا لە هەرێمى کوردستان هەبێت، د. سامان بەرزنجی، وەزیری تەندروستیی هەرێمی کوردستان دەڵێت، هەرکەس باوەڕ ناکات، رێگەى پێدەدەین لە هەولێر یان لە سلێمانى سەرێک لە نەخۆشخانەکانى کۆرۆنا بدات و وەڵامەکەى وەردەگرێت. 
 
تاوەکو ئێستا 424 کەس لە هەرێمی کوردستان تووشی کۆرۆنا بوون، 383 کەسیان چاکبوونەتەوە و پێنج کەسیش گیانی لەدەستداوە، لە ئیدارەی راپەڕین و گەرمیان و پارێزگاکانی دهۆک و هەڵەبجە هیچ تووشبوویەک لە نەخۆشخانەکان نەماون
© 2017 Hawler