ئەم پەڕەیە چاپ بکە

سەرۆک بارزانی بە بۆنەی کۆچی دوایی دلۆڤان ئیدریس بارزانییەوە پەیامێکی ڕاگەیاند

دوێنێ دووشەممە ٤/٢، دلۆڤان ئیدریس بارزانی کە دەکاتە برای نێچیرڤان بارزانی، سەرۆکی ئەنجوومەنی وەزیرانی هەرێمی کوردستان و کوڕی شەهیدی هەمیشە لە یاد ئیدریس بارزانی، لە تەمەنی ٥٢ ساڵیدا و بە جەڵدەی دڵ، ماڵئاوایی یەکجاری کرد، کۆچی دوایی ناوبراو خەمێکی گەورە بوو بۆ گەنجان و لاوانی کوردستان و لە تۆڕە کۆمەڵایەتییەکان بەشێوەیەکی بەرچاو هاوخەمی خۆیان دەربڕی و هەر بەم بۆنەیەشەوە، سەرۆک بارزانی پەیامێکی ڕاگەیاند و جگە لە دووپاتکردنەوەی هەواڵەکە هاوخەمی و پرسەداری خۆی ڕاگەیاندووە کە ئەمە دەقەکەیەتی:

 بە داخێكی زۆرەوە بەیانی ڕۆژی دووشەممە 2ـی 4ـی 2018 دلۆڤان ئیدریس بارزانی كوڕی ڕەحمەتی ئیدریس بارزانی بەهۆی جەڵتەی دڵەوە كۆچی دوایی كرد و چووە بەر دلۆڤانیی پەروەردگاری مەزن. لە كاتێكدا كە ئەو هەواڵە خەمناكە ڕادەگەیێنم، لە خودای مەزن داواكارم خوالێخۆشبوو بە ڕەحمەت و میهرەبانیی خۆی شاد بكات و سەبر و ئارامی بە هەموو لایەكمان ببەخشێت.

 انا لله و انا الیە راجعون

مسعود بارزانی2ـی 4ـی 2018

لە هەمان کات و بە هەمان بۆنەوە، حەیدەر عەبادی سەرۆک وەزیرانی عێراق، له‌ په‌یوه‌ندییه‌كی ته‌له‌فۆنیدا له‌گه‌ڵ به‌ڕێز نێچیرڤان بارزانی، سه‌رۆك وه‌زیرانی هه‌رێمی كوردستان، ، بۆ كۆچی دواییی خوالێخۆشبوو دلۆڤان ئیدریس بارزانیی برایان، پرسه‌ و سه‌ره‌خۆشی له‌ بنەماڵەی ناوبراو كرد و هاوده‌ردی و هاوخه‌میی خۆیان له‌گه‌ڵ نێچیرڤان بارزانی و خانه‌واده‌ی بارزانی ده‌ربڕی. عه‌بادی، هیوای خواست خوای گه‌وره‌ خوالێخۆشبوو به‌ به‌هه‌شتی خۆی شاد بكات و ئه‌مه‌ دوایین كۆستی خانه‌واده‌ی بارزانی بێت.

لای خۆیه‌وه‌ نێچیرڤان بارزانی سوپاسی عه‌بادی كرد بۆ ئه‌و په‌یوه‌ندییه‌ و پێشكه‌شكردنی پرسه‌ و سه‌ره‌خۆشی و هاوخه‌مییان.

هەر دوێنێش فراکسیۆنی پارتی دیموکراتی کوردستان لە پەرلەمان، پەیامێکی هاوخەمیان ئاراستە کرد بە بۆنەی کۆچی ناوادەی ناوبراو، کە ئەمە دەقەکەیەی بوو:

بەناوی خودای بەخشندە و میهرەبان بە داخ و پەژارەی زۆرەوە ڕۆژی دووشەممە 2ـی 4ـی 2018 هەواڵی کۆچی ناوادەی کاک دلۆڤان ئیدریس بارزانی مان بیست. لە پەروەردگاری میهرەبان داواکارین خوالێخۆشبوو بە دلۆڤانی و رەحمەتی خۆی شاد بکات و پرسە وسەرەخۆشی خۆمان ئاراستەی جەنابی سەرۆک مەسعود بارزانی و جەنابی نێچیرڤان بارزانی دەکەین. خوای گەورە سەبر و ئارامی بە هەموو لایەكمان ببەخشێت.

انا لله و انا الیە راجعون

 فراکسیۆنی پارتی دیموکراتی کوردستان لە پەرلەمانی کوردستان

کۆچکردوو، دلۆڤان ئیدریس بارزانی، لە دایکبووی ساڵی ١٩٦٦ە و لە ناوچەی بارزان هاتۆتە دنیاوە، زۆربەی کات لە نێو شۆڕشەکانی کوردستاندا بووە و گرنگییەکی زۆری بە ئەرشیف کردنی شۆڕشەکان داوە، ئەگەرچی پلە و پۆستێکی حکومی و حیزبی نەبووە، بەلام نوێنەرایەتی سەرۆکی حکومەتی دەکرد لە کار و بارە کۆمەڵایەتیەکان و لە بۆنە کۆمەڵایەتییەکاندا بەشدارییەکی بەرچاوی هەبووە.

دواترین دەستکاریکردن لەسەر دوو شەممە, 02 نیسان 2018 13:14