شوبات 28, 2020

هاوپەیمانان: پەیوەندی و هەماهەنگیمان لەگەڵ هاوبەشانمان بەردەوام دەبێت

 

دلۆڤان رەحیم - هه‌ولێر

 

هەڕەشە و خۆپیشاندانەکانی عێراق کاریگەریی له‌ سەر شەڕی داعشیش هه‌یه‌ و، هاوپەیمانیی نێودەوڵەتی بڕیاریدا ئۆپەراسیۆنەکان دژی داعش رابگرێت. دەڵێت ئامانجمانە هێزەکانمان پارێزراون بن و دیاریش نییە کەی ئۆپەراسیۆنەکان و مەشقەکان دەست پێدەکەنەوە.

رۆژی هەینی، لە بەغدا، خۆپیشاندانێکی فراوان کرا و داوای کرا ئەمریکا لە عێراق بچێته‌ دەرەوە، خۆپیشاندەران داوا دەکەن عێراق نەکرێتە گۆڕه‌پانی ململانێی نێوان وڵاتان و، دەبێت کێشەکان ببرێتە دەرەوەی عێراق. بەڵام سێ مانگە خۆپیشاندانەکان لە عێراق هیچی لێ شین نەبووە، دەسەڵاتدارانی بەغدا، بەپێی گوتەی شارەزایان، سەرکەوتوو نەبوون لە جێبەجێکردنی داواکانی خۆپیشاندەران. خۆپیشانده‌ران ڕه‌وتی سه‌در به‌ خیانه‌تکاری خۆپیشاندانه‌کان داده‌نێن، چونکه‌ وازیان له‌ خۆپیشاندان هێناوه‌.
هەم بڕیاری تاکلایەنەی شیعە بۆ دەرکردنی هێزەکانی ئەمریکا، کە کورد و سوننە بەشدارنەبوون تێیدا، هەمیش خۆپیشاندانەکان کاریگەریی گەورەیان لەسەر ئۆپەراسیۆن و مەشقی هاوپەیمانان بە هێزە عێراقییەکان، لەنێویاندا پێشمەرگە، هەبووە. دوای ساڵێک لە بڕیاری دۆناڵد ترەمپ لە سووریا، ئێستا بابەتەکە گوازراوەتەوە سەر ئەوەی ئەمریکا لە عێراق دەربچێ، بەڵام سەرکردایەتیی کورد مانەوەی هاوپەیمانان بە پێویست دەزانێت بۆ هەڕەشەی داعش، کە هێشتا کۆتایی نەهاتووە .
کێنێت مەکێنزی، فەرماندەی فەرماندەیی ناوەندی ئەمریکا، دەڵێت:" لە شەڕی دژی داعش و هەوڵی بنەبڕکردنی هەڕەشەی چەکداران بەردەوام دەبین، ڕاگرتنی ئۆپەراسیۆنەکان بەشێوەیەکی کاتییە."
ئۆپەراسیۆنی دژی داعش نزیکەی سێ هەفتەیە وەستاوە، ئەوەش دوای کوژرانی قاسم سلێمانی، فەرماندەی سوپای قودسی سەر بە پاسداران لە لایه‌ن ئەمریکاوه‌ و بۆردومانکردنی بنکەی سەربازی عەین ئەسەد لەلایەن ئێرانەوە، ئێستا هاوپەیمانان لەگەڵ ئەوەی دەڵێن ئۆپەراسیۆنیان وەستاندووە، بەڵام هاوبەشی و کارکردن و پەیوەندی نزیکمان لەگەڵ هێزە هاوبەشەکانمان لە پێشمەرگە و سوپای عێراق و هەسەدە بەردەوامە .
مایلز کاگینز، گوتەبێژی هاوپەیمانان، دەڵێت:" هاوپەیمانان هیچ ئۆپەراسیۆنێکیان نییە دژی داعش لە دەرەوەی بنکەکان، ئامانجی یەکەمی ئێستامان پاراستنی سەرباز و راوێژکارانمانە ." کاگیز ئاماژەی بە کاتی دەستپێکردنەوەی ئۆپەراسیۆنەکان نەکردووە، بەڵام دەڵێت: پەیوەندیمان لەگەڵ هێزە هاوبەشەکانمان بەردەوامە.
گوتیشی:" بە بەربەستی زیاتر ئەمنیەتی بنکە سەربازییەکان بەهێزتر دەکەین، ئەو رێوشوێنانەی دەیکەین بۆ پاراستنی خۆمانە لە هەر هێرشێك، پلانی ئەوەش نییە سەربازی زیاتر بهێنرێن بۆ عێراق ."
هاوپەیمانی نێودەوڵەتی، لە سەرەتای شەڕی داعشەوە، هاوبەشێکی گرنگی هێزەکانی پێشمەرگە بووە، ئەو هێزە رۆڵی کاریگەری هەبووە لە شکستی خەلافەتی داعش. ئێستا هەزاران راوێژکاری ئەو هاوپەیمانێتییە لە کوردستانن و مەشقیان بە زیاتر لە ٥٠ هەزار پێشمەرگە کردووە لە ٥ ساڵی رابردوودا .
لە دوای رووخانی خەلافەتەکەی داعش، کە لەسەرەتا رووبەری دەسەڵاتەکەی ١٠٠ هەزار کیلۆمەتر چوارگۆشە بوو و، ئێستا بۆ تەنیا ناوچەیەک کەمبووەتەوە، داعش دەستیکردووە بە شەڕی چەتەیی و ناوە ناوە هێرش دەکات، وەزارەتی بەرگری ئەمریکا پێشبینی دەکات نزیکەی ١٤ بۆ ١٨ هەزار چەکداری داعش لە سووریا و عێراق مابن و، خۆیان حەشاردابێت. بەپێی راپۆرتێکی مانگی ئاداری وەزارەتەکە، گرووپەکه‌ خەریکی خۆ رێکخستنەوەیە، هاوپەیمانی نێودەوڵەتی داوا دەکات هەولێر و بەغدا هاوکاربن لە رووبەڕووبوونەوەی چەکدارانی داعش .
سەرەڕای نەمانی خەلافەتەکەی داعش، سوودی لەو بۆشاییە ئەمنییە بینیوە لە هەندێک ناوچە دروستبووه‌، بەتایبەت لەدوای ساڵی ٢٠١٧وە، مەخموور وەکو ناوچەی کوردستانی دەرەوەی ئیدارەی هەرێمی کوردستان دادەنرێت، لەدوای ١٦ـی ئۆکتۆبەرەوە دۆخی ئەو ناوچانە ئاسایی نییە، نەک هەر مەخموور، بەڵکو خانەقین و جەلەولا و کەرکووک و ناوچەکانی دیکەش. بۆیە هاوپەیمانان هەماهەنگی لەگەڵ پێشمەرگە بە گرنگ دەزانن بۆ پاراستنی ئاسایشی ئەو ناوچانە.
سەرچاوە: ئەسۆشیەتد پرێش

© 2017 Hawler