حوزەیران 23, 2018

چاودێران و مامۆستایانی زانكۆ: سەرۆككۆمار یەك بڕیاری لە بەرژەوەندی گەلی كوردستان نەداوە

چاودێران و مامۆستایانی زانكۆ دەڵێن، لەوەتەی فوئاد مەعسووم، بۆتە سەرۆككۆمار نیشانەی پرسیاری لەسەرە، ئەو دۆخەی كە هاتووەتە پێش، یەكێك لە هۆكارە سەرەكییەكانی ئەوەیە كە سەرۆككۆمار نەیتوانیوە مومارسەی دەسەڵاتەكانی خۆی بكات، كە دەسەڵاتی هەیە و دەتوانێت داوای لێپرسینەوە بكات لە تەواوی ئەو پێشێڵكارییانەی كە دەكرێن. ئاماژە بۆ ئەوەش دەكەن، سەرۆككۆمار لە پشكی كوردە، لە پشكی حزبێك نیە، لەسەر حسابی هەموو كورد سەرۆككۆماری عێراقە، دەبێت هەڵوێستی هەبێت، بەتایبەتی لەو قۆناغەدا كە گوزەرانی هاووڵاتیانی هەرێمی كوردستان خراپە، بەڵام ئەوەی جێگەی داخە تا ئێستا لەسەر هەموو ئەو هێرشانەی دەكرێنە سەر كوردستان، بەتایبەتی لە پاش رووداوەكانی 16ی ئۆكتۆبەر هیچ هەڵوێستێكی ئەرێنی نەبووە بۆ ئەوەی داكۆكی لەو زوڵم و ستەم و ئەو ماڵوێرانیەی كە بەسەر گەلی كورددا هات بكات.

دیندار دۆسكی، سیاسەتمەداری كورد بۆ "هەولێر" دەڵێ، سەرۆككۆمار نوێنەرایەتی هەموو خەڵكی عێراق دەكات، بە پێی ئەو دەسەڵاتەی كە هەیە دەتوانێت هەڵوێست وەربگرێت، ڕاستە بە گوێرەی دەستوور دەسەڵاتەكانی ئەو كەمن و دیاری كراون، بەڵام دەتوانێت هەڵوێست وەربگرێت، ئەگەر بەراورد بكەین لەگەڵ مام جەلال، دەوری ئەو نەك تەنیا بە دەسەڵاتی سەرۆككۆمارەوە گرێدرابوو، بەڵكو بەردەوام هەوڵی چارەكردنی كێشەكانی دەدا، بۆیە دەبێت خزمەتی خەڵكی كوردستان بكات، فشار بخاتە سەر حكوومەتی عەبادی بۆ چارەكردنی كێشەكان، بەڵام پێموایە چارەكردنی كێشەكان بە كەسێك چارە نابن، چونكە هەندێك بابەت بە دەستوورەوە گرێدراون و لە 2003ـەوە تا ئێستا چارە نەكراون، لەوانە ماددەی 140، چارەكردنی كێشەكانیش دەبێت لە نێوان هەر دوو حكوومەتدا بن، نەك هەندێك كەس و لایەن.
دەشڵێ، لەدوای رووداوەكانی 16ی ئۆكتۆبەر و ئەو سزایانەی كە حكوومەتی عێراق خستوونەتە سەر هەرێم بەڕاستی دەبوایە سەرۆككۆمار هەڵوێستی هەبوایە، كە هەتا ئێستا بێ هەڵوێستە، هەر ئەوەش وای كردووە كە زۆر كەس و لایەن گلەییان لە هەڵوێستی سەرۆككۆمار هەبێت، بەڵام دەبێت هەموو لایەنە سیاسییەكان كۆببنەوە و هەڵوێستێكی جدی وەربگرن و خۆ لە پرۆسەی سیاسی بكشێنەوە و هەڵبژاردنەكانی عێراقیش بایكۆت بكەن، بەڵام دەبێت هەرێمی كوردستان ئەو كارە بكات، دەبێت سەرۆككۆماریش هەمان هەڵوێستی هەبێت، چونكە ئەو پۆستەی لەسەر حسابی كورد وەرگرتووە و لە هەمان كاتدا یەكێكە لە سیاسەتمەدارەكانی كورد، بەڵام بڕیاری كشانەوە هێشتا نەبۆتە بڕیاری هەرێمی كوردستان، پێموانیە ببێتە بڕیاریش، چونكە دەرفەت ماوە بۆ دانوستاندن و چارەكردنی كێشەكان، بەتایبەتی لە دوای هەڵبژاردنەكان زیاتر فشار دەخرێنە سەر حكوومەتی ناوەندی بۆ دانوستاندن و چارەكردنی كێشەكان لەگەڵ هەولێر، چونكە عێراق لەسەر بنەمای تەوافق و تەوازن و شەڕاكەت دامەزراوە، بەڵام ئەو هەرسێ بنەمایە نەماون، هەر ئەوەش بووە هۆی ئەوەی كە كورد ریفراندۆم ئەنجام بدات، كێشەكانی ئێمە لە بەغدانە و دەبێت بەهێزەوە بچینەوە بەغدا، بۆ ئەوەش پێویستە هەموو لایەنە سیاسییەكان خۆ بكەنە یەك و یەكهەڵوێست بن و وتارێكی یەكگرتوویان هەبێت.
عەبدوالحەكیم خەسرۆ، مامۆستای زانكۆ بە "هەولێر"ـی گوت" سەرۆك كۆمار، دەبێت هەڵوێستی هەبێت و زەخت لە سەرۆكوەزیران بكات بۆ چارەكردنی كێشەكان، بەڵام بێگومان سەرۆككۆمار سەكردەیەكی یەكێتی نیشتمانی كوردستانە، بەشێك بووە لە هەڵوێستی یەكێتی لە بەغدا هەر لە سەرەتاوە تا ئێستا، زیاتر پەیوەندی بە باڵێكی یەكێتییەوە هەیە، بەتایبەتی ئەو باڵەی دەوری هەبوو لە ڕێككەوتنی 16ی ئۆكتۆبەر، بۆیە سەرۆككۆمار هیچ هەڵوێستێكی سلبی دەربارەی حكوومەتی عێراق نابێت، هەوڵیش نادات ئەو هەڵوێستەی هەبێت، لەگەڵ ئەوەی وەكو پۆست، پۆستی سەرۆككۆمار، پۆستێكی زۆر گرنگ نیە، كورد بێت، یان كەسێكی دیكە، دیارە لە كاتی خۆی ئەو هەڵەیە كراوە كە دەسەڵاتەكانی سەرۆككۆمار هەموو دراون بە سەرۆكی ئەنجوومەنی وەزیران، هەر لەبەر ئەوە دەبینین چ شیعە وەربگرێت، چ سوننە، هەتا كوردیش ئەو پۆستە وەربگرێتەوە، هەتا سەرۆكایەتی پەرلەمانیش هیچ گرنگی خۆی نیە بۆ هەرێمی كوردستان."
زیاتر گوتی" ئەوەی ئێستا عەبادی دەیكات و هەموو سێ شەممەیەك دێتە سەر شاشەكان و بڕیارێكی نوێ دەدات، ئەوە بەشێكە لە هەڵمەتی هەڵبژاردن، كە ئەو هەڵمەتە لە مانگی 4 دەست پێ دەكات، هەر لە ئێستاوە هەر بڕیارێكی سیاسی، بڕیارێكی ئیداری، هەر بڕیارێكی ئەنجوومەنی وەزیران، كە هەر بڕیارێك دەربچێت، ئەوانە هەموو بەشێكن لە هەڵمەتی هەڵبژاردن و هیچی دیكە نیە، هەر لەبەر ئەوە زۆر زەحمەتە حاڵەتێكی پێچەوانە ڕووبدات، سیستەمی سیاسی عێراقی نوێ هەر لەسەرەتاوە كە دانرا لە ساڵی 2003 تا ئێستا تەنیا راگەیاند بووە و هەر كەسێك خۆی بە شتێك كردووەتە پاڵەوان و سیاسەتی حوكم لە ڕێگەی شاشەكانەوە كراوە، هەر ئەوەش بووە هۆكاری ئەوەی كە ڕەوشی عێراق رۆژ بۆ رۆژ خراپتر ببێت و بگاتە ئەو قۆناغەی كە ئەمڕۆ ئێمە تێداینە.
كاروان ساڵح، چاودێری سیاسی بۆ "هەولێر" ڕایگەیاند، لەو چەند ساڵەدا هەندێك شت بۆ خەڵكی كوردستان و ڕای گشتی ڕوون بوویەوە، كە هەندێك لە بەرپرسان كە لە بەغدا پۆستیان هەیە، بەتایبەتی سەرۆككۆمار كە لە پشكی كوردە، لە پشكی حزبێك نیە، لەسەر حسابی هەموو كورد سەرۆككۆماری عێراقە، تا ئێستا بۆ یەكجاریش بێت هەڵوێستێكی نەنواندووە بەتایبەتی لە پاش رووداوەكانی 16ی ئۆكتۆبەرەوە، هیچ هەڵوێستێكی ئەرێنی نەبووە بۆ ئەوەی داكۆكی لەو زوڵم و ستەم و ئەو ماڵوێرانیەی كە بەسەر گەلی كورددا هات بكات، بۆیە پێموایە ئەگەر لایەنە سیاسییەكان و حكوومەت و پەرلەمان بڕیاری خۆیان بدەن، بڕیارێكی یەكلاكەرەوە ئەو كاتە بۆ سەرۆككۆمار و ئەوانەی كە خۆیان بە بەغداوە بەستووە هیچیان بۆ نامێنێتەوە، خیانەت لە میللەتی ئێمە لە زۆر قۆناغ و ساڵانی رابردوو لە خەبات و تێكۆشانی گەلەكەمان روویداوە، ئەو جۆرە دەست تێكەڵكردنە بە ڕای من جۆرێكە لەو خیانەتە لە ئەنجامی بەرژەوەندی كەسی بێت، یان بەرژەوەندی سیاسی بێت، بەهەر شێوەیەك لە شێوەكان، دەچێتە ئەو بوارە و هیچ مەجاڵێكی بۆ نامێنێتەوە، چونكە ئەگەر میللەتێك هەموو مافەكانی پێشێڵ بكرێت، مافە بنەڕەتییەكان، مافە دەستوورییەكان بۆ ئەویش هەبێت وەكو سەرۆككۆمار وەكو پەرلەمانتار، وەكو وەزیر، كە قسەیەكی خێر بۆ ئەو میللەتە نەكات، ئەوە لە كەمتەرخەمی دەچێتەدەر، ئەوە دەچێتە بوار و حسابی تر، ئەمڕۆ میللەت لە هەموو كەسێكی دیكە بە ئاگایە، سەرۆككۆمار دەبینی و ئەو پەرلەمانتارانەش دەبینێت كە چۆن پەیوەندییان لەگەڵ ئەو لایەنانە كە بە شۆفینیستی خۆیان بە هەموو شێوەیەك دژایەتی گەلی كوردستان و ئەزموونی كوردستان دەكەن دەستیان تێكەڵ كردووە.
ساڵح، ئاماژەی بەوەش كرد، حەیدەر عەبادی، وەكو براوەیەكی شەڕ مامەڵە لەگەڵ كوردستان دەكات، هەتا قوتی خەڵكی كوردستان وەكو هەڵمەتی هەڵبژاردن بەكاردێنێت، بۆیە پێویستە هەموو دامودەزگا شەرعییەكان و خەڵكی كوردستان بە هیچ شێوەیەك چاویان لەوە نەبێت رۆژێك لە رۆژان نە عەبادی، نە ئەوانەی پێش عەبادی و نە ئەوانەی دوای ئەویش دێنە سەر حوكم خێر بە گەلی كورد بكەن، خاوەن سۆز و پەیمانی خۆیان بن، بەڕاستی ئەوەی كە ئێستا لە عێراق دەگوزەری تاكڕەوییەك و دكتاتۆرییەكی زۆر زەقە پرۆسەی سیاسی لە عێراق لە مەترسی دایە، بۆیە دەبێت هەموو لایەنەكان لە هەرێمی كوردستان باش خۆیان بۆ ئەو مەسەلەیە ئامادە بكەن، ئەگەرەكانی دوای هەڵبژاردنیش ڕەنگە لێرەو لەوێ پلانەكانی وڵاتانی دەوروبەر، نیەتەكانی رژێمی ناوەندی عێراقی دەرحەق بە هەرێمی كوردستان ئەنجامی بدەن و بە دیار بكەون، دەبێت لەوە دەربچین كە گومانمان لەوە هەبێت عەبادی و غێرە عەبادی بەردەوامن لە پیلان گێڕان، ڕەنگە زۆر پیلانی گەورەتریان بە دەستەوە بێت ئەگەر بۆیان كرابایە، یان بۆیان بكرێت لە ئایندەدا بكەن.
لە كۆتاییدا د. قانع محەمەد، مامۆستای زانكۆ بۆ "هەولێر" ئاشكرای كرد، لەوەتەی فوئاد مەعسووم، بۆتە سەرۆك كۆمار نیشانەی پرسیاری لەسەرە، ئەو دۆخەی كە هاتووەتە پێش، یەكێك لە هۆكارە سەرەكییەكانی ئەوەیە كە سەرۆككۆمار نەیتوانیوە مومارسەی دەسەڵاتەكانی خۆی بكات، كە دەسەڵاتی هەیە و دەتوانێت داوای لێ پرسینەوە بكات لە تەواوی ئەو پێشێڵكارییانەی كە دەكرێن، دوای ئەوەی كە سەردانی كەركووكی كرد، پرۆسەی تەعریب كردن لەو شارە دەستی پێ كرد، دەبێت سەرۆككۆمار هەڵوێستی هەبێت، بەتایبەتی لەو قۆناغەدا كە گوزەرانی هاووڵاتیانی هەرێمی كوردستان خراپە، لەگەڵ ئەوەی سەرۆككۆمار نوێنەری حزب و لایەنێك نیە، بەڵكو نوێنەری هەموو خەڵكی كوردستانە، بەڵام ئەوەی جێگەی داخە تا ئێستا لەسەر هەموو ئەو هێرشانەی دەكرێنە سەر كوردستان یەكهەڵوێستی نەبووە كە لە بەرژەوەندی كوردستاندا بێت".

© 2017 Hawler

Please publish modules in offcanvas position.