کانونی یەکەم 07, 2019

یەکەم کاروانی هاوکاریی ئەمریکا بۆ پەنابەرانی رۆژئاوای کوردستان گەیشتە هەولێر

یەکەمین کاروانی هاوکاری مرۆیی بۆ پەنابەرانی رۆژئاوای کوردستان لە هەرێمی کوردستان لەلایەن رێکخراوێکی ئەمریکییەوە لەڕێگەی فڕۆکەیەکی تایبەتەوە گەیێندرایە فڕۆکەخانەی نێودەوڵەتیی هەولێر.

بەگوتەی بەرپرسی دەزگای خێرخوازیی بارزانی، بڕیارە کاروانی دیکەش لەلایەن هەمان رێکخراوەوە بگاتە شاری هەولێر و دەشڵێت، هاوکارییەکان بەردەوام دەبن.
پەیامنێری رووداو لە هەولێر رایگەیاند، دوێنێ، فڕۆکەیەکی تایبەتی رێکخراوی سەمیرتان پرێس کە رێکخراوێکی ئەمریکیە بۆ گەیاندنی هاوکاری مرۆیی بۆ پەنابەرانی رۆژئاوای کوردستان گەیشتە فڕۆکەخانەی نێودەوڵەتیی هەولێر.
رێکخراوی سەمیرتان پرێس ساڵانێکی زۆرە لە هەرێمی کوردستان کاردەکات و هاوئاهەنگییەکی باشی لەگەڵ دەزگای خێرخوازیی بارزانیدا هەیە، گەیاندنی ئەو هاوکارییەش لەدوای هاتنی ئەو ژمارە زۆرەی پەنابەران دێت کە لە ئەنجامی هێرشی تورکیا بۆسەر رۆژئاوای کوردستان روویان لە باشووری کوردستان کردووە.
مووسا ئەحمەد، بەرپرسی دەزگای خێرخوازیی بارزانی سەبارەت بە گەیاندنی ئەو هاوکارییە مرۆییانە بۆ پەنابەرانی رۆژئاوای کوردستان راگەیاند "سوپاسی رێکخراوی سەمیرتان پرێس دەکەین کە یەکێکە لەو رێکخراوانەی بە درێژایی ئەو ماوەیە ئەو رەوشەی لە هەرێمی کوردستان دروستبووە، هاوکارییەکی زۆریان کردووین، هەم لەگەڵ ئاوارەکان و هەم لەگەڵ پەنابەران و هەمیش لەگەڵ خەڵکی هەژار و کەمدەرامەت".
بەگوتەی مووسا ئەحمەد ئەو کەلوپەلانەی ئێستا هاتوون، "بە تایبەت بۆ ئەو ئاوارانەیە کە تازە هاتوونە کاریگەرییەکی زۆر باشی دەبێت، کەلوپەلەکانیش بریتین لە پێڵاو، جلوبەرگی زستانە، پارچەی سەر خێمەکان، هەموویان ئەو پێویستیانەن کە ئێستا لەنێو کەمپەکاندا زۆر پێویستن بە تایبەتی بۆ کەمپی بەردەڕەش و ئەو شوێنانەی کە پەنابەران تازە روویان لێکردووە و نیشتەجێکراون".
بەرپرسی دەزگای خێرخوازیی بارزانی دەشڵێت "ئەمە کاروانی یەکەمە، کاروانی دیکەشی بەدوادادێت و گەیاندنی هاوکارییەکان بەردەوامی دەبێت".
هاوکات خالید جەمال، بەرپرسی کاروباری مەسیحییەکان لە وەزارەتی ئەوقاف و کاروباری ئایینی خۆشحاڵی خۆی بە گەیشتنی ئەو هاوکارییە مرۆییە بۆ پەنابەرانی رۆژئاوای کوردستان دەربڕی و رایگەیاند: "خۆشحاڵین بە گەیشتنی یەکەمین فڕۆکە کە هاوکاری مرۆیی لەگەڵ خۆی هەڵگرتووە بۆ پەنابەرانی رۆژئاوای کوردستان، کە لەلایەن رێکخراوی سەمیرتان پرێس بە هاوئاهەنگی لەگەڵ وەزارەتی ئەوقاف و کاروباری ئایینی گەیێندراوەتە شاری هەولێر، هاوکارییەکانیش بریتین لە جلوبەرگی زستانە، پێڵاو و فلتەری ئاو".
خالید جەمال گوتیشی: "ئەمە یەکەم فڕۆکەش نابێت، ئێستا سەرقاڵی ئامادەکردنی فڕۆکەیەکی دیکەن بۆ گەیاندنی هاوکاریی مرۆیی بۆ پەنابەرانی رۆژئاوای کوردستان بە هاوئاهەنگی لەگەڵ دەزگای خێرخوازیی بارزانی ئەو هاوکاریانە دەگەێیندرێتە پەنابەرانی رۆژئاوای کوردستان".
لەدوای هێرشەکانی تورکیا و ئۆپۆزیسیۆنی سووریا بۆ سەر رۆژئاوای کوردستان، پەنابەرانی ناوچە کوردنشینەکان بەلێشاو روو لە هەرێمی کوردستان دەکەن، بەگوتەی بەڕێوەبەری گشتی ناوەندی هاوبەشی هەماهەنگی قەیرانەكان لە هەرێمی كوردستان رۆژانە هاتنی پەنابەران لە زیادبووندایە و تاوەكو ئێستا زیاتر لە 15 هەزار ‌و 200 پەنابەری نوێ‌ هاتووە.
لە رووداوەوە

© 2017 Hawler