تشرینی دووەم 16, 2019

٧٤ـەمین خولی گفتوگۆکانی رێککەوتننامەی سیداو لە جنێف بەڕێوە دەچێت

بڕیار وایە رۆژانی ٢١-٢٤/١٠/٢٠١٩ لە بارەگای ئەنجومەنی مافەکانی مرۆڤ لە جنێڤ خولی (٧٤) ی لیژنەی تایبەت بە رێککەوتننامەی نەهێشتنی جیاکاری دژی ئافرەتان (سیداو) ببەسترێت بە ئامادەبوونی پسپۆر و شارەزایانی لیژنەی (سیداو) و نوێنەرانی وڵاتانی ئەندام لە رێککەوتننامەکە و نوێنەرانی کۆمەڵگای مەدەنی و رێکخراوە ناحکومییە نێودەولەتیەکان بە بواری ئافرەتان بۆ گفتوگۆکردنی حەوتەمین راپۆرتی خولیی عێراق.

لەم گفتوگۆیانەدا شاندێکی حکومەتی هەرێمی کوردستان لە چوارچێوەی شاندی کۆماری عێراق بەشدار دەبێت لە نووسینگەی رێکخەری راسپاردە نێودەوڵەتییەکان و ئەندامیەتی وەزارەتی ناوخۆ و وەزارەتی پەروەردە و دامودەزگا پەیوەندیدارەکانی تری حکومەتی هەرێمی کوردستان بۆ خستنەرووی هەنگاوەکانی حکومەتی هەرێمی کوردستان لە پێناو نەهێشتنی هەموو جۆرەکانی جیاکاری و توندوتیژی خێزانی بەتایبەتی ئەو یاسای و رێنماییانەی کە لەلایەن حکومەتی هەرێمەوە دەرچوون و رۆڵی دامودەزگا تایبەتمەندەکانی هەرێمی کوردستان لە بنەبڕ کردنی توندوتیژی و بونیادنانی کۆمەڵگایەکی یەکسان.
شایەنی باسە د. دیندار زێباری رێکخەری راسپاردە نێودەوڵەتییەکان کە لە هەمان کاتدا ئەندامی لیژنەی نیشتمانی نووسینەوەی راپۆرتە نێودەوڵەتییەکان بۆ ئەو رێککەوتننامانەی کە عێراق ئەندامە تێیدا و پەیوەستن بە بابەتی پاراستن و پێشخستنی رەوشەکانی مافی مرۆڤ، سەرۆکایەتی شاندی هەرێمی کوردستان دەکات لە چوارچێوەی شاندی حکومەتی فیدراڵ.

© 2017 Hawler