تشرینی دووەم 19, 2019

پەکەکە بۆتە هۆکاری چڕکردنەوەی بۆردومانەکانی سوپای تورکیا لە ناوچە سنوورییەکانی هەرێم

لەبەر بوونی بنكە و بارەگاكانی پەكەكە لە گوند و ئاواییەكانی سنووری هەرێمی كوردستان، توركیا بەردەوام بۆردومانی گوند و ئاواییەكان دەكات، ئەوەش خەڵكی ئەو ناوچانەی بێزار كردووە و داوا دەكەن پەكەكە لە گوندەكانیان دوور بكەوێتەوە، بۆ ئەوەی چی دیكە بیانۆ نەداتە دەست توركیا بۆ بۆردومانكردنی ناوچەكانیان، ئەگەرنا ناچار دەبن شوێنەكانی خۆیان بەجێ بهێلن، بەوەش گوند و ئاواییەكان چۆڵ دەبن.

ماوەی چەند هەفتەیەكە سوپای توركیا بۆردومانی لە ناوچە سنوورییەكانی هەرێمی كوردستانی زیادكردووە، ئەوەش كاریگەری لە سەر ژیانی خەڵك هەبووە.
پارتی كرێكارانی كوردستان حزبێكی كوردی چەپە و لە ساڵی 1978 لە باكوری كوردستان دامەزراوە و دواتر لە چیای قەندیل نیشتەجێ بوون و ماوەی نزیكەی 30 ساڵە لەگەڵ توركیا شەڕ و ناكۆكییان هەیە.بەهۆی پەكەكە و بۆردومانی فڕۆكە جەنگییەكان بۆ سەر ئەو ناوچانە، زیانی زۆری گیانی و دارایی بەر هاووڵاتییان كەوتووە، سەرەڕای ئەوەش ئەو ناوچانە، زۆر ناوچەی گەشتیاری تێدانە و ئەگەر پەكەكە لە ناوچەكە نەبووایە، دەتوانرا سوودی لێ ببینرێ بۆ گەشتیاری و پڕۆژەی زۆر گەورەی گەشتیاری لێ جێبەجێ دەكرا، بەمەش داهاتی زۆری بۆ حكوومەت دەبوو و دەرفەتی كاری زۆریشی بۆ خەڵكەكەی دەڕەخساند.
بەهۆی بوونی بارەگاكانی پارتی كرێكارانی كوردستان و بەردەوامی بۆردومانەكانی توركیا خەڵكی ناوچە سنوورییەكان لە سرووشت و جوانییەكانی ناوچەكەیان بێبەش بوونە و لە وەرزی بەهار و وەرزەكانی دیكەش ناتوانن بچنەوە ناوچەكانیان.
بە بڕوای چاودێران، هەرێمی كوردستان شوێنی پەكەكە نییە و ناكرێت بۆ بەرژەوەندی و ئامانجە سیاسییەكانی خۆیان زیان بە هەرێمی كوردستان بگەیەنن و بەو جۆرە دەست لە ژیانی هاووڵاتییان وەربدەن و خەڵك بێزار بكەن".
بە هۆی بوونی پەكەكە لە ناوچە سنوورییەكانی هەرێمی كوردستان، فڕۆكە جەنگییەكانی توركیا رۆژانە ئەو ناوچانە دەكەنە ئامانجی بۆردومانەكانیان و بەو هۆیەشەوە تا ئێستا دەیان هاووڵاتی لە ناوچەكانی وەك، بناری قەندیل، كانی ماسی، بەرواری باڵا، سیدەكان، مێرگەسۆر سنووری قەزای ئامێدی بە تایبەت و درێژایی هێڵی سنوور بە گشتی بوونەتە قوربانی.
خەڵكی ئەو ناوچانە داوا لە پەكەكە و توركیا دەكەن شەڕی نێوانیان لە ناوچەكانی ئەوان دوور بخەنەوە.
هورمز قیومە، هاووڵاتیەكی كریستیانە و لە دەڤەری ئامێدی نیشتەجێ یە بۆ "هەولێر" دیاركرد:" ژیانمان زۆر ناخۆشە و رۆژ بۆ رۆژیش ناخۆشتر دەبێت، ئەوەش هەموو لەبەر پەكەكەیە، چونكە رۆژانە بە ناو گوند و ئاواییەكانی ئێمەدا تێپەڕ دەبن، ئەوەش وای كردووە كە هەر كاتێك توركیا ئەوان ببینێت بۆردومان بكات، لەو نێوەندەشدا زەرەرمەندی یەكەم ئێمەین، داوا دەكەین پەكەكە لە گوند و ئاواییەكان دوور بكەوێتە، توركیاش چی دیكە ناوچەكانمان بۆردومان نەكات، ئەگەرنا لە پێناو سەلامەتی گیانی منداڵەكانی خۆمان ناچار دەبین ناوچەكە چۆڵ بكەین، بەوەش گوند و ئاواییەكان چۆڵ دەبن.
میرزا عەزیز، هاووڵاتیەكی دیكەیە بۆ "هەولێر" ئاشكرای كرد:" بەردەوام توركیا تۆپبارانی ناوچەكانی ئێمە دەكات، خاكی خۆمانە كەچی لەبەر بوونی پەكەكە لەو ناوچانە ناوێرین بچینە دەرەوە، داوا دەكەین سنوورێك بۆ ئەو تۆپبارانە دابنرێت، ئەگەرنا ناچار دەبین گوند و ئاواییەكانی خۆمان چۆڵ بكەین و دەست لە كاری كشتوكاڵی و ئاژەڵداری بەر بدەین.
رەشید مەجید، هاووڵاتیەكی سنووری سیدەكانە بۆ "هەولێر" گوتی:" ئەمساڵ زیاتر لە دووجار لەبەر پەكەكە و توركیا ئاوارە بووینە و تا ئێستاش زۆر لە خەڵكی گوندەكە نەگەڕاونەتەوە، جگە لەوەی بە هەزاران دۆنم پوش و پاوان سووتاوە، هەرچی رەز و باخ و بێستانە هەمووی لەناو چووە، زیانێكی زۆری ماددەی بەر ئێمە كەوتووە، جگە لەوەی دوو لە خەڵكی گوندەكەمان شەهید بوونە، ئەگەر پەكەكە لە گوندەكان دوور نەكەوێتەوە، توركیاش بۆردومانی گوند و ئاواییەكان رانەگرێت، ناچارین گوندەكانمان بۆ ئەوان بەجێ بهێڵین، بۆیە داوا لە حكوومەتی هەرێم دەكەین سنوورێك بۆ پەكەكە و بۆردومانی توركیا دابنێت، بۆ ئەوەی ئێمەش بە ئاسوودەی لەسەر گوندەكانی خۆمان بژین.
ستار رەمەزان، هاووڵاتیەكی دیكەی ناوچە سنوورییەكانە بۆ "هەولێر" دركاندی:" پەكەكە دەیان گوندی داگیركردووە و وێرانكردوونە و گوندەكان دەرفەتی ئاوەدانكردنەوەیان نییە، هەندێكیان بە هۆی بەردەوامیی جووڵەی پەكەكەوە بەرەو وێرانبون دەچن، گوێ بە حكوومەت و ئیدارە و هێزە ئەمنییەكان نادەن، ئەوەش وای كردووە كە توركیا رۆژانە گوند و ئاواییەكانی ئێمە بۆردومان بكات و زیانی گیانی و ماددیمان بەر بكەوێت".

© 2017 Hawler