ئەیلول 21, 2019

تا مانگی نوێ حکومەت پرۆژە یاسای چاکسازی ڕەوانەی پەرلەمان دەکات

سکرتێری پەرلەمانی کوردستان، ڕایدەگەیەنێت، تا ١ی مانگی ٩، کە ئەوکات پشووی پەرلەمان کۆتایی دێت، حکومەت پرۆژە یاسای چاکسازی ڕەوانەی پەرلەمان دەکات و لە پەرلەمان تاوتوێی پرۆژە یاساکە دەکات، ئەوەش دەخاتە ڕوو، کە حکومەتی هەرێم کاری زۆر باشی لەسەر پرۆژە یاساکە کردووە.

لە لێدوانێکدا بۆ ماڵپەڕی پارتی، مونا قەهوەچی، سکرتێری پەرلەمان دەڵێت:" پێش جەژنی قوربان یەكەم كۆبوونەوەی نێوان هەردوو دەسەڵاتی یاسادانان و جێبەجێكردن ئەنجام درا، كە كۆبوونەوەیەكی زۆر ئەرێنی بوو و لە ئاست چاوەڕوانیی خەڵكی كوردستاندا بوو، بۆ ئەوەی هەماهەنگیی باش هەبێت لە نێوان هەردوو دەسەڵاتدا و بەپێی پەیڕەوی ناوخۆی پەرلەمانیش، پێویستە حكوومەت پڕۆژەیاسا بۆ پەرلەمان رەوانە بكات بۆ ئەوەی كاری لەسەر بكرێت و پەسەند بكرێت.
دەشڵێت:" حكوومەت و پەرلەمان سوورن لەسەر پەسەندكردنی پڕۆژەیاسای چاكسازی، لەبەر ئەوەی هەموو لایەنەكان لە كاتی بانگەشەی هەڵبژاردندا بەڵێنی چاكسازییان بە خەڵك داوە، بۆیە چاوەڕێ دەكرێت حكوومەت ئەو پڕۆژەیاسایە بۆ ئێمە رەوانە بكات و پەسەند بكرێت لە پەرلەمان و ئەو بەڵێنەی بە خەڵك درابوو، جێبەجێ بكرێت".
سەبارەت بە دووبارە پێداچوونەوەی پرۆژە یاساکە لە لایەن ئەنجوومەنی وەزیرانەوە دەڵێت:" حكوومەتی هەرێمی كوردستان كاری زۆر باشی بۆ ئامادەكردنی پڕۆژەیاسای چاكسازی كردووە و بەم زووانە رەوانەی پەرلەمانی دەكات و ئێمەش داوامان كردووە هەماهەنگی لە نێوان حكوومەت و پەرلەمان لەبارەی ئەو پڕۆژەیاسایەوە هەبێت و هەر كەموكوڕییەكیش هەبێ پیكەوەچارەسەری بكەین، بۆ ئەوەی وەكوو خولی پێشوو نەبێت، كە هاتە پەرلەمان و دواتریش ڕەت كرایەوە و بووە موزایەدەی سیاسی، بەڵام ئێستا حكوومەت ئامادەیی نیشان داوە بۆ هەموو جۆرە هاوكاری و هەماهەنگییەك"
باس لەوەش دەکات دوای تەواو بوونی پشووی پەرلەمان لە مانگی نوێ، کۆبوونەوەی فراکسیۆنەکان دەستپێدەکات بە مەبەستی تاوتوێ کردنی پرۆژە یاساکە .
پرۆژە یاسای چاکسازی کۆمەڵێک خاڵی گرنگی لە خۆ گرتووە و بە جێبەجێکردنی داهاتێکی زۆر بۆ حکومەتی هەرێم دەگەڕێتەوە، لە ماوەی ڕابردوودا بەهۆی ئەوەی پرۆژە یاساکە لە کاتی قەیرانەکاندا نوورابۆوە حکومەتی نوێ دووبارە پرۆژە یاساکەی نوێ کردۆتەوە بەشێوەیەک لەگەڵ گۆڕانکاری و نەمانی قەیراندا بگونجێت.

© 2017 Hawler