ئاب 11, 2020

فەرماندەی میحوەری ڕۆژئاوای کەرکووک: ته‌نیا پێشمه‌رگه‌ ده‌توانێت ئاسایش و ئارامی بۆ ته‌واوی پێكهاته‌كانی کەرکووک دابین بکات

بارودۆخی کەرکووک، لە ڕووی ئەمنی و ئیدارییەوە لە دوای ١٦ی ئۆکتۆبەری ساڵی ٢٠١٧ەوە، لە قەیراندایە و تا ئێستا ئەو هێزە عێراقی و میلیشییانەی لە نێو شارەکە و لە سنووری شارەکە جێگیر کراون، نەیانتوانیووە ببنە جێگرەوەی هێزەکانی پێشمەرگەی کوردستان و کە هاوکات دوای ١٦ی ئۆکتۆبەر مەلەفی ئەمنی شارکەش درایە دەست پارێزگاری سەپێنراو کە خاوەنی هیچ پلانێکی تۆکمە نییە و ڕۆژانە کاری نەخوازار و لە لایەن تیرۆرستان و چەکدارانی نەناسراو لە سنووری شاری کەرکووک ئەنجامدەدرێت.

نوری حەمە عەلی، فەرماندەی میحوەری ڕۆژئاوای کەرکووک، لە لێدوانیدا بۆ ماڵپەڕی فەرمی پارتی، باسی لە گرفتە ئەمنییەکانی شاری کەرکووک کردووە و دەڵێت:" ئێمه‌ به‌دڵنیاییه‌وه‌ گوتوومانه‌، ته‌نیا پێشمه‌رگه‌ ده‌توانێت ئاسایش و ئارامی بۆ ته‌واوی پێكهاته‌كانی کەرکووک بێ جیاوازی دابین بكات و مه‌ترسیی تیرۆریستانی داعش له‌سه‌ر ناوچه‌كه‌ نه‌هێڵێت".
هەروەها ڕایدەگەینێت:" چه‌كدارانی داعش به ‌شه‌ودا چه‌ك هه‌ڵده‌گرن و ئه‌و كارانه‌ی مه‌به‌ستیانه‌ دەیکەن، به‌ ڕۆژیشدا جلوبه‌رگی مه‌ده‌نی دەپۆشن و خۆیان به‌ هاووڵاتی نیشان ده‌ده‌ن، بۆیه‌ پێویستی به‌ هێزێكی سەربازیی به‌هێز هه‌یه‌ کە سنوورێك بۆ كرداره‌كانی داعش دابنێت".
ئەو فەرماندەیە باسی لەوەش کردووە، چەکدارانی داعش لە شەواندا بە ئاسانی بە چەکەوە لە نێو شارەکە دەسوڕێنەوە و هەرچیان بوێت ئەنجامی دەدەن، لە ڕۆژیشدا بە جل و بەرگی مەدەنییەوە دێنە نێو خەڵکی بێ ئەوەی ڕووبەڕووی بەرپەرچدانەوەی سەربازی ببنەوە و دەڵێت:" پێویستی به‌ هێزێكی سەربازیی به‌هێز هه‌یه‌ کە سنوورێك بۆ كرداره‌كانی داعش دابنێت"
باسی لە هەوڵە بەردەوامەکانیش کرد لە پێناو ئاسایی کردنەوەی دۆخی کەرکووک و دەڵێت هەرێم لە هەنگاوەکانی بەردەوامە لە ڕێگای گفتوگۆوە لەگەڵ حکومەتی عێراق و دەڵێت:" كۆبوونه‌وه‌ و گفتوگۆ له‌گه‌ڵ حكوومه‌تی عێراق به‌رده‌وامه‌ بۆ ئاساییكردنه‌وه‌ی دۆخی کەرکووک و گه‌ڕانه‌وه‌ی پێشمه‌رگه و دانانی پارێزگارێك به‌ ده‌سه‌ڵاته‌كانییه‌وه‌ و کارابوونەوەی ئه‌نجومه‌نی پارێزگا و ڕۆشتنه‌ ده‌ره‌وه‌ی ئه‌و هێزه‌ی عێراق له‌ کەرکووک".
لە ئێستادا حکومەتی هەرێم لە ڕێگای لیژنەیەک کە کار دەکات بۆ ئاسایی کردنەوەی دۆخی کەرکووک، لە گفتوگۆ و کۆبوونەوەکانیان بەردەوامن لەگەڵ حکومەتی عێراق لە پێناو ئاسایی کردنەوەی دۆخی کەرکووک.

© 2017 Hawler