تەمموز 16, 2019

سەروكا لیژنا دەڤەرێن كۆردستانێ یێن دەرڤەی كارگێریا حكومەتا هەرێمێ ل پەرلەمانێ كۆردستان: نەبوونا هێزێن پێشمەرگەی ل وان ناوچەییان بوویە ئەگەرێ سوتنا هزارەهان دوونەمێن گەنمی

گەنمێ وان هاتییە سوتن، ماندوی بوونا وان دگەل دویكێلا ئاگری بەر ب ئاسمانی ڤە چوویە، ئەو گەلەك بێ زار بووینە، چاڤەرێ بریارەكا داد پەروەرن، هەم قەرەبووكرنا وان بهێتە كرن، هەم تاوانبار ب وێ بریارێ بگەهنە سزایێن خۆ.

جوتیارێن زیان ڤێ كەفتی، ب هزارەهان دوونەمێنگەنمێ وان هاتییە سوتن،ئەردێن وان ل ناوچەیێن كوردستانی نە، و كارگێریا وان ناوچەییان دەرڤەی كارگێرییا حكومەتا هەرێما كۆردستانێ نە. ل دویف گوتنا ژێدەرەكێ راگەهاندنێ "ئەگەرێ سوتنا گەنمی ژچاقماقەكێ نینە، كو هەلبگری و پاشان ئاگری بەردەیە گەنمی و هەموو بسوژیت".و سەبارەت ب ڤێ چەندێ رۆژنامەیا "هەولێر" ب رێیا خۆ لێدوانەك ل دور چەوانییا پەیدابوونا ڤێ كێشەیی و دیسان پێنگاڤێن چارەسەریێ دگەل سەروكا لیژنا دەڤەرێن كۆردستانێ یێن دەرڤەی كارگێرییا هەرێمێ جوان یونس كر كو تێدا گوت: سەبارەت ب وی گەنم ودانێ ل وان ناوچەیان هاتییە سوتن نوكە ئەم نەشێین چ بكەین،ژبلی هەولدانا راوستاندنا سووتنا ئەرد وگەنمێ مایی، و هەروەسا قەرەبووكرنا وان جوتیارێن زیان ڤێ كەفتی، لەوما راپورتەكا مە دگەل دەستەیەكا پەرلەمانی ل بەغداد ژبۆ قەرەبووكرنا وان جوتیاران ئامادەنە، ب تنێ ئەم چاڤەرێی دروستكرنا حكومەتا نوی یا بەغداد ین، دگەل دروستكرنا حكومەتێ دێ دەست ب ڤان كاران كەین چونكە دنوكەدا دا ئەم نەشێن چ پێنگاڤان بهاڤێین بەری دروستكرنا حكومەتێ.
پشتی دروستكرنا حكومەتا نوی یا بەغداد شاندەكی پەرلەمانێ هەرێما كۆردستانێ دگەل شاندەكێ حكومەتی دێ سەرەدانا بەغداد كەنو ل وێرێ گفتوگو ل سەر چەندین كێشە و بابەتان ل دور ناوچەیێن هەرێما كۆردستانێ دێ هێتە كرن و هەمی وەك راپورتەك دێ رادەستی حكومەتا ناوەندی(بەغداد)بیت.
ب گورەی ئامارێن بەرەڤانییا باژێری ل عیراقێ دئەڤ سالە نێزیكی 300 روویدانێن ئاگر بەربوونا گەنمی پەیدابووینە و ب هزارەهان دوونەمێن ئەرد و گەنمی هاتینە سووتن.
جوان یونس دووپات دكەت كو دڤێت حكومەتا ناوەندی(حكومەتا عیراقێ) قەرەبووكرنا وان جوتیاران بكەت و هەروەسا دیاردكەت ئەگەر حكومەتا عیراقی نەشیا هەمی جوتیاران قەرەبوو بكەت دبیت حكومەتا هەرێما كۆردستانێ هاریكاربیت و پێكڤە قەربووكرنا وان بكەن.
داخازا ئامارەكا وورد ژلایێ لێژنەیا دەڤەرێن كوردستانێ یێن دەرڤەی كارگێرییا هەرێمێ ل پەرلەمانێ كۆردستانێ هاتییە كرن،تێدا داتایێن سوتنا وان ئەردان بهێتە دیاركرن كو چەند دوونەم هاتینە سوتن و چەند كۆژمێ پارەی یێ زیان ڤێ كەفتنێ هاتییە توماركرن. و پشتی ئامادەبوونا وێ ئامارێ ل ڤێ حەفتیێ دێ سەرەدانا مەخموور و كەركووك هێتە كرن بۆ دویتنا وان زەڤی و ئەردان.
جوان یونس دبێژیت: من باوەرە حكومەتا عیراقێ و پەرلەمانتارێن عیراقێ ب تایبەتی یێن فراكسیونا كوردستانێ فشارەكا زور ل سەر خۆ و حكومەتا عیراقی بكەت ژبۆی قەربووكرنا وان جوتیاران و حكومەتا عیراقێ ژی ب راستی هەتا نوكە هاریكارە و چ بەرسڤێن نەرێنی ب چ شێوەیان دیارنەكرینە و مە باوەرە ئەو پێنگاڤەكێ بهێنە پێش بۆ قەرەبووكرنا جوتیاران،
هەروەسا ئاشكرا كر: ئەو كەسێن ب ڤێ كریارێ رابوین ئەم دێ ب جدی ل سەر سزادانا وان راوستین و ئەز باوەرم ئەم دزانین كینە بەلكو نابیت ل دەسپێكێ كەسێ تاوانبار بدانین و بدەینە ناس كرن بەلكو یادیار ئەز دێ بێژم دەستێ رێكخراوا داعش تێدایە.
پشتی پرسیاركن ل ئەگەرێن ئەنجام دانا ڤان جورە كریاران وێ ئەگەر ب پلا ئێكێ بۆ نە بوونا هێزێن پێشمەرگەی ل وان ناچەیان ڤەگەراند و گوت: نە بوونا هێزێن پێشمەرگەی وە كرییە كو ئەو تاوانبار گەفان ل جوتیاران بكەن و داخازا پارە و سامانی بكەن و ئەگەر جوتیار وی پارە و سامانێ داخازكری نەدەن دێ ئەو ب ڤان كریاران رابن و دەخل و دانێ وان سۆژن و ئەڤە بابەتەكی مەترسیدارە. لەوما داخازا دێ هێتە كرن هێزێن پێشمەرگەی جارەكا دی ڤەگەرن وان ناوچەیان بۆ هندێ پاراستنا وان ناوچەیەیان بهێتە كرنو دووپات ژی كر كو لەوانەیە بەری قەرەبووكرنا جوتیاران و بەری هاڤێتنا هەر پێنگاڤەكی هێزێن پێشمەرگەی ل وێرێ ئامادەببن بۆ پاراستنا وان ناوچەیان و ئەڤ بابەتە ئێك ژوان خالێن سەرەكی یە د راپورتێ دا.

© 2017 Hawler