ئاب 23, 2019

سەرکردەکانی جیهان پیرۆزبایی لە سەرۆکی نوێی هەرێمی کوردستان دەکەن

دوای ئەوەی لە رێوڕەسمێكی شایستە و شاهانەدا، نێچیرڤان بارزانی وەکو دووەمین سەرۆکی هەرێمی کوردستان سوێندی یاسایی خوارد، پەرلەمانیش لە دانیشتنێکدا بە دەنگی ٨٧ پەرلەمانتار مەسروور بارزانی دەستنیشانکرد بۆ پێکهێنانی حکومەتی هەرێمی کوردستان.

لە دانیشتنەکەی پەرلەماندا کە ٩٧ پەرلەمانتار ئامادەبوون، ٨٧ پەرلەمانتار دەنگیان بە مەسروور بارزانی دا بۆ سەرۆکایەتی کابینەی نۆیەمی حکومەت، فراکسیۆنی پارتی مەسروور بارزانی دەستنیشان کرد، بڕیارە نێچیرڤان بارزانی مەسروور بارزانی بۆ سەرۆکایەتی حکومەت رابسپێرێت .

مانگێكی دیکە حکومەت پێکدێت
دوای چاوەڕوانی و گفتوگۆی زۆری پارتی وەکو براوەی هەڵبژاردن بە ٤٥ کورسی، دواجار دوای دەرکردنی مەرسوومی سەرۆکایەتی بۆ پێکێنانی حكومەت پێکدێت و مەسروور بارزانی دەبێتە لەو مانگەدا کابینەکەی پێشکەشی پەرلەمان بکات، پاشان لە دانیشتنێکی پەرلەمان دەنگ لەسەر ئەو وەزیرانە دەدرێت کە راسپێردراوی پێکهێنانی کابینەی نۆیەمی دەستنیشانیان دەکات، دوای هەڵبژاردنی کوردستان و ٢٥٤ رۆژ قۆناغەکانی پێکهێنانی حکومەت جێبەجێ دەکرێت، درووشمی کوردستانێکی بەهێز کە پارتی لە هەڵبژاردندا بەرزی کردبووەوە، بە کردار بۆ لەمەودوا لەژێر سەرکردایەتی نێچیرڤان بارزانی وەکو سەرۆکی هەرێمی کوردستان و مەسروور بارزانی سەرۆکی حکومەت، بە رابەرایەتی مەسعود بارزانی دەستپێدەکات .
پارتی دیموکراتی کوردستان ئامانجیەتی بۆ ٤ ساڵی داهاتوو هەم چاکسازی و هەم ناوماڵی کوردی و نێوانی لایەنەکان خۆش بێت،وەکو سەرۆکی هەرێمی کوردستان دەڵێت ستراتیژی کارکردن ئەوە دەبێت سەرۆکایەتی هەرێمی کوردستان چەتری یەکڕیزی و کۆکەرەوەی سەرجەم هێز و لایەنە سیاسییەکانی کوردستان و پێکهاتە ئیتنی و ئایینییەکان دەبێت بە سەرجەم بیروباوەڕە جیاوازەکانەوە".

رێوڕەسمێکی گەورە و پیرۆزبایی سەرکردەکانی جیهان
رۆژی 10ـی حوزەیران بە گوتەی هەموو سەرکردە و لایەنەکان مێژوویی بوو بۆ هەرێمی کوردستان لە مەراسیمێکی شایستە و گەورەدا نێچیرڤان بارزانی وەکو سەرۆکی نوێی هەرێمی کوردستان سوێندی یاسایی خوارد، لە مەراسیمەکەدا زیاتر لە هەزار سەرکردە و کەسی یەکەمی لایەن و پێکهاتە و ئاینەکانی کوردستان ئامادەی سوێندخواردنی سەرکردە میانڕەوەکەی کوردستان بوون.
مەولوود چاوشئۆغڵو، وەزیری دەرەوەی تورکیا، شاندێكی باڵای ئێران،کەسی یەکەمی کریستیانەکانی عێراق، کەسی یەکەمی کریستیانەکانی رۆژهەڵاتی ناوەڕاست، هەروەها سەرکردە و بەرپرس و نوێنەری وڵاتان ئامادە بوون، بەئامادەبوونی سەرۆک مەسعود بارزانی، بەرهەم ساڵح سەرۆک کۆماری عێراق، عەمار حەکیم، سەرۆکی رەوتی حیکمە نێچیرڤان بارزانی سوێندی یاسایی خوارد .
سەرۆک بارزانی لە گوتارێکدا هەموو پاڵپشتییەکی بۆ نێچیرڤان بارزانی راگەیاند و گوتی:" پیرۆزبایی لێدەکەم و پشتیوانیشی دەکەم هاوکات سەرۆک کۆماری عێراق لە گوتارەکەیدا جگە لە پیرۆزبایی لە سەرۆکی نوێی هەرێمی کوردستان، رایگەیاند رۆڵی سەرۆک بارزانی وەکو سەرۆک وسەرکردە هەر دەمێنێت و پێگەی ئەو بە پلە و پۆست نییە .
نێچیرڤان بارزانی لە گوتارێکدا ستراتیژی چوار ساڵی داهاتووی خۆی روونکردنەوە و رایگەیاند:" جەنابی سەرۆک بارزانی رۆڵێکی گرنگ و سەرەکی بینی لە بەرپەرچدانەوەی تیرۆریستانی داعش و تێکشکاندنی خەونی تاریکپەرستی و وێرانکاریان. جەنابیان وەک فەرماندەی هێزی پێشمەرگەی هەرێمی کوردستان بەو پەڕی توانایەوە راستەوخۆ بەشداری لە پاراستن و بەرگری لە هەرێمی کوردستان کرد. شەونخوونی بێوچان لەبەرەی شەڕدا لەگەڵ پێشمەرگە قارەمانەکاندا بەسەر برد و بە خۆڕاگری و ئەزموونی پێشمەرگایەتی هەر لە 16 ساڵییەوە تاوەکو ئەمڕۆ خستیە خزمەتی بەرگری و پاراستنی ژیان و مرۆڤایەتی لە هەرێمی کوردستان و عێراق و سەرتاسەری جیهان.
دەشڵێت :" دەبێت لەگەڵ حکومەتی فیدراڵی لە بەغدا پێکەوە کار بکەین بۆ دۆزینەوەی چارەسەری هاوبەش لە چوارچێوەی دەستووری فیدراڵی عێراقدا، ئەو دەستوورەی کە گەلی عێراق چەندەها ساڵ خەونیان پێوە دەبینی، تا ببێتە بنەمای عێراقێکی نوێ کە تێیدا مافەکانی هەرێم هەموو عێراقییەکان لە چوارچێوەی حکومڕانییەکی دیموکراتی و فیدراڵی بپارێزرێت. دەستوورێک کە چوار لەسەر پێنجی دەنگدەران لە سەرتاسەری عێراق دەنگیان پێداوە. دەستوورێکی فیدراڵی کە جێبەجێکردنی تەواوی ماددەو بەندەکانی ببێتە زامنکردنی پێکەوەژیان و لێکتێگەیشتن و لە یەکتر پەسندکردن و بەهێزکردنی پرۆسەی سیاسی لە عێراقدا.
لەبارەی ناوخۆی هەرێمی کوردستانیش گوتی :" سەرجەم کوردستانییانی ئازیز دڵنیا دەکەمەوە کە سەرۆکایەتیی هەرێم چەتری یەکڕیزی و کۆکەرەوەی سەرجەم هێز ولایەنە سیاسییەکانی کوردستان و پێکهاتە ئیتنی و ئایینییەکان دەبێت، بە جیاوازی بیرو بۆچوونەکانیانەوە، لە پێناو ژیانێکی ئاشتییانە و ئارامی گەلی کوردستاندا،هەرێمی کوردستان موڵکی هەموو کوردستانیانە بە هەموو جیاوازییەکانیانەوە. سەرۆکایەتیی هەرێمیش سەکۆی ئیرادەو خواست و مافەکانیان دەبێت بەبێ هیچ جیاکارییەک، بۆ هەمووان دەبێت و بە یەکچاو سەیری هەمووان دەکرێت.
دووپاتی دەکەمەوە ئارامی و ئاشتی و زامنکردنی مافی تاک و کۆمەڵگا ئامانجی سەرەکیمان دەبێت، بە گرتنەبەری دیالۆگ و چارەسەرکردنی سەرجەم کێشەکانی نێوان هەرێمی کوردستان و حکومەتی فیدراڵ لە چوارچێوەی دەستووردا. هەروەها پاراستنی پەیوەندیی دۆستانەی بەهێز لەگەڵ وڵاتانی دراوسێ و ناوچە و بەردەوامیدان بە بەهێزکردنی پێگەو سەنگی هەرێمی کوردستان، لەسەر ئاستی هەرێم و نێودەوڵەتیدا. کاری جیددی دەکەین و هەموو هەوڵێک دەدەین بۆ بەدەستهێنانی مافە دەستوورییەکانی هەرێمی کوردستان و زامنکردنی مافی مرۆڤ و ئازادییەکان و بەها و پرسەنسیپەکانی جیهانی پێشکەوتوو.
لە نوێترین کاردانەوەدا دوای دەستبەکاربوونی وەکو سەرۆکی هەرێمی کوردستان تارۆ کۆنۆ، وەزیری دەرەوەی ژاپۆن لەنامەیەکدا بۆ نێچیرڤان بارزانی نووسیویەتی:" ستایشی رۆڵی سەرکردانەی بەڕێزتان دەکەم لە ماوەی سەرۆکایەتیکردنی حکومەتی هەرێمی کوردستاندا، بەتایبەت لە تێپەڕاندن و زاڵبوون بەسەر ئەو قەیران و کۆسپانەی لەم ساڵانەی دواییدا بەرۆکی گەلی کوردستانیان گرتبوو."
جەختیش لەوە دەکاتەوە:" کە بەردەوام دەبن بە پشتیوانیی ژاپۆن لە هەوڵەکانی هەرێمی کوردستان لەپێناو بونیاتنان و پێشکەوتن و گەشەسەندنی زیاتری گەلەکەیدا.
هەروەها ئەبو مەقسود باڵیۆزی بەنگلادیش لە عێراق لە نامەیەکدا بۆ سەرۆکی هەرێمی کوردستان دەڵێت :"بەبۆنەی بوونت بە سەرۆکی هەرێمی کوردستان گەرمترین پیرۆزباییت لێدەکەم و دڵنیام لە ژێر رێنمایی و هەروەها روانینی تۆ کوردستان بەردەوام دەبێت لە گەشەکردن و بەرەوپێشچوون''.
رێوڕەسمی سوێندخواردنی سەرۆکی نوێ بووە بابەتی گەرمی میدیاکانی جیهان و زۆربەی سەرکردە و بەرپرسان هەم پێش سوێندخواردنەکە و دەستبەکاربوونی .،هەمیش دوای رێوڕەسمەکە پیرۆزبایی لە نێچیرڤان بارزانی کرد و جەختیان لەوە کردەوە کوردستان پێی ناوەتە قۆناغێكی نوێ .

 

© 2017 Hawler