تەمموز 15, 2020

له‌ په‌یوه‌ندییه‌کی ته‌له‌فۆنیدا سه‌رکۆماری عیراق و سه‌رۆکی هه‌ڵبژێردراوی هه‌رێمی کوردستان دۆخی سیاسیی عیراق و ناوچه‌که‌ و کوردستانیان تاوتوێ کرد.

سه‌رله‌ئێواره‌ی ئه‌مڕۆ ٣/٦ به‌رێز نێچیرڤان بارزانی  سه‌رۆکی هه‌ڵبژێردراوی هه‌رێمی کوردستان په‌یوه‌ندییه‌کی  ته‌له‌فۆنی له‌گه‌ڵ به‌ڕێز د. به‌رهه‌م ساڵح سه‌رکۆماری عیراق ئه‌نجام دا و تیایدا وێرای به‌ فه‌رمی بانگهێشتکردنی سه‌رکۆمار بۆ ڕێوڕه‌سمی سوێندخواردنی سه‌رۆکی هه‌رێم، هه‌ردوولا دۆخی سیاسیی عیراق و ناوچه‌که‌ و هه‌رێمی کوردستانیان تاوتوێ کرد.
 
 له‌و په‌یوه‌ندییه‌ ته‌له‌فۆنییه‌دا هه‌ردوولا هاوڕا بوون له‌سه‌ر بایه‌خی پاراستنی یه‌کڕیزی و هه‌ماهه‌نگی له‌م هه‌لومه‌رجه‌ هه‌ستیاره‌ی که‌ ناوچه‌که‌ پێیدا تێپه‌ڕ ده‌بێ، جه‌ختیشیان کرده‌وه‌ که‌ پێویسته‌ هه‌وڵه‌کان یه‌کبخرێن له‌پێناو تێپه‌ڕاندنی ناکۆکییه‌کان و به‌دوورگرتنی عیراق و هه‌رێمی کوردستان له‌ ئاڵۆزییه‌کان.
 
 هاوکات سه‌رکۆمار و سه‌رۆکی هه‌ڵبژێردراوی هه‌رێم پێویستیی هه‌ماهه‌نگی و هاریکاریی نێوان هەرێمی کوردستان و حکوومەتی فیدراڵیان له‌ قۆناغی داهاتوودا دووپات کرده‌وه ‌و پیرۆزباییی جه‌ژنی ڕه‌مه‌زانیان له‌ یه‌کتر کرد و هیوایان خواست که‌ ئه‌م بۆنه‌یه‌ ببێته‌ مایه‌ی ئۆقره‌یی و ئارامی و کۆتاییهاتنی قه‌یرانه‌کان.
 
هه‌روا سه‌رکۆمار پیرۆزبایی له‌ سه‌رۆکی هه‌ڵبژێردراوی هه‌رێمی کوردستان كرد و هیوای سه‌رکه‌وتنی بۆ خواست.

 

 
© 2017 Hawler