ئاب 22, 2019

ڕێککەوتننامەکە لە ٩ خاڵ پێکهاتووە و مافەکانی کوردی بە تەواوی لە پارێزگاکە پشتگوێ خستووە

لە ئێستادا بەهۆی گرفتی ئیداری و ئەمنییەوە، بارودۆخی شاری کەرکووک و ناوچە دابڕێنراوەکانی هەرێم کە ئێستا لە ژێر کۆنتڕۆڵ و ئیدارەی حەشدی شەعبی و سوپای عێراقدان، لە لێواری تەقینەوەن و هاووڵاتیانی کورد لەو ناوچانە ڕووبەڕووی نایاسایی و زوڵم دەکرێنەوە و زەوی و زار و موڵکیان لە ژێر ڕەحمی دەسەڵاتی ناوچەکاندایە و بە پێی میزاج بڕیاریان لەسەر دەدرێت و تەسلیم بە عەرەبی هاوردە دەکرێن لە هەندێک ناوچە و لە هەندێکی تریش داعش هەڕەشەیە بۆ سەر زەوی و زارە جواتیارەکانیان.

ئەوەی لە ئێستادا نیگەرانی لای هاووڵاتیانی کەرکووک و خەڵکی کوردستان دروستکردووە، ئاشکرا بوونی بەڵگە نامەیەکە، کە لە یەکێک لە خاڵەکانیدا داوای مانەوەی "ڕاکان سەعید جبوری' دەکات تا کاتی ئەنجامدانی هەڵبژاردنی پارێزگاکان.
بە پێی بەڵگەنامەکان بێت، ڕێککەوتنەکان لە نێوان سه‌رۆکی کوتله‌ی عه‌ره‌بی و تورکمانی و ئەندامێکی ئەنجوومەنی پارێزگای کەرکووک لەسەر لیستی یەکێتی بە ناوی کاکە ڕەش سدیق ئەنجامدراوە و هاوکات ناوبراو لە جێگای سەرۆکی فراکسیۆنی برایەتی ڕێککەوتنەکەی واژۆ کردووە لە کاتێکدا سەرۆکی لیستی برایەتی لەسەر فراکسیۆنی پارتییە و ئاگاداری ئەو ڕێککەوتنە نهێنییەش نەبووە کە ئەنجامدراوە لە نێوان ئەو دوو سەرۆک لیستە و ئەو ئەندامە کوردەی لیستی برایەتی کەرکووک.
ناوەڕۆکی ڕێککەتننامەکە لە ٩ خاڵ پێکهاتووە کە سەرجەمیان مافی پێکهاتەی کوردی تێدا پشتگوێ خراوە، خاڵی یه‌که‌می رێککه‌وتنه‌که‌، راکان سه‌عید جبوری تا ئه‌نجامدانی هه‌ڵبژاردنی ئه‌نجومه‌نی پارێزگای که‌رکوک له‌ پۆسته‌که‌ی وه‌ک جێگری پارێزگار و پارێزگار به‌وه‌کاله‌ت به‌رده‌وام ده‌بێت.
خاڵی دووه‌م و سێیه‌می تایبه‌ته‌ به‌ هێشتنه‌وه‌ی هه‌ر یه‌ک له‌ عه‌لی حه‌مادی له‌ پێکهاته‌ی عه‌ره‌ب و رائید جه‌مال له‌ پێکهاته‌ی مه‌سیحی له‌ پۆستی یاریده‌ده‌رانی پارێزگار بۆ کاروباری هونه‌ری و کاروباری کارگێڕی.
هه‌روه‌ها له‌خاڵی چواره‌مدا بڕیاردراوه‌ به‌ دانانی خه‌بات ئه‌سعه‌د له‌ پێکهاته‌ی کورد به‌ یاریده‌ده‌ری پارێزگار بۆ کاروباری خزمه‌تگوزاری.
به‌پێی خاڵی پێنجه‌میش که‌سێکی تورکمان به‌ناوی یاڵچین مه‌هدی وه‌ک یاریده‌ده‌ری پارێزگار بۆ کاروباری وزه‌ ده‌ستنیشان کراوه‌.
هه‌رچی خاڵی شه‌شه‌م و حه‌وته‌مه‌ باس له‌ هێشتنه‌وه‌ی پۆستی راوێژکاری پارێزگار بۆ کاروباری یاسایی و رێکخراوه‌کان و راوێژکاری کارگێڕی که‌ یه‌که‌میان له‌پێکهاته‌ی عه‌ره‌بیه‌و ئه‌ویتریان تورکمانه‌.
هاوکات له‌خاڵی هه‌شته‌میشدا پۆستی راوێژکاری ئه‌منی پارێزگار دراوه‌ به‌ که‌سێکی تورکمان و به‌پێی خاڵی نۆیه‌میش پۆستی راوێژکاری هونه‌ری پارێزگار دروست ده‌کرێت و ده‌درێت به‌ پێکهاته‌ی کورد.
ڕۆژنامەنوسێکی شارەزای بواری سیاسی و نزیک لە یەکێتی نیشتیمانی كوردستان، دڵگرانی خۆی بە بوونی ڕێککەوتننامەکە ڕادەگەینێت و لە تۆڕی کۆمەڵایەتی فەیسبووک و لاپەڕەی خۆی دەنوسێت، خۆزگە هیچ نەبوایە واژۆی کوردی پێوە نەبوایە ئەم ڕێککەوتنە، عارف قوربانی نوسەر و ڕۆژنامەنووس لە پەرەی تایبەتی خۆی لە فەیس بووک، وێنەی بەڵگەنامەی ڕێککەوتنەی داناوە و دەربارەی دەڵێت:" بەڵگەکان لە سەتان وتار باشتر دۆخەکە رون دەکەنەوە کە حاڵی کورد چۆنە لە کەرکوک، پێویستی بە ھیچ رونکردنەوەیەک نیە، ئێستا ئەگەر تەنھا رەخنەی ئەوە بگریت بڵێی ھیچ نەبێ کورد ئیمزای نەکردایا، وەک چۆن عەڕابەکانی بەیاساییکردنی حەشدی شەعبی پاساوی ناڕەوایان دەھێنایەوە، بۆ ئەمەش عوزریان حازرە".
ڕاکان سەعید جبوری، پارێزگاری کەرکووک بە وەکالەت، دوای لەکار لابردنی د.نەجمەدین کەریم پارێزگاری کەرکووک، هاتە سەر کار و لەگەڵ دەستبەکاربوونیشی وەک پارێزگاری سەپێنراو هەر زوو کەوتە دژایەتیکردنی کورد لە کەرکووک و لە ئێستادا لەلایەن لایەن کوردستانییەکانەوە تۆمەتی تەعریبکردنی کەرکووکی دراوەتە پاڵ، ئەوەی لەسەر راکان سەعید تا ئێستا زانراوە، عەرەبێکی هاوردەی کەرکووکە و دیار نییە لە ڕابردوودا کار و چالاکییە سیاسییەکانی چی بووە.

© 2017 Hawler